Un moviment di popul le à fate nassi, tant che imprest di disvilup di un teritori, ma vuê ce restial di chês sperancis?
Cumò che e finìs 40 agns, no si pues plui clamâle zovine. Ma viodût che cuant che e je nassude e je stade volude tant che fie di cheste tiere, la domande vuê e je une sole: trop ise furlane la Universitât dal Friûl? E podarès someâ banâl come cuistion, ma nol è cussì. La mission istitutive dal Ateneu (al è dai 6 di Març dal 1978 il decret dal President de Republiche che i à dât inviament) e jere propit chê di tamesâ i filons origjinâi de culture e de storie di chenti. Un moviment di popul le à fate nassi, tant che imprest di disvilup di un teritori, ma vuê ce restial di chês sperancis? Jal vin domandât a Enrico Peterlunger, delegât dal retôr Alberto
Felice De Toni par ce che al inten la promozion de lenghe e de culture furlane. «Magari cussì no – nus dîs – impegnâsi pal Friûl e pal furlan al covente ogni dì. Parcè che lis resistencis a son tantis. Come che intai agns ’60 e ’70 e jere la sudizion viers di Rome e di Triest che a volevin frenâ lis miris dai furlans par une lôr Universitât, ancje cumò no ducj a sintin la furlanetât tant che un valôr». No dome intal cuarp docent, che naturalmentri nol è dut furlan ni di lenghe ni di divignince, ma ancje jenfri dai students. Peterlunger al fâs un esempli: «O vin fat cors di furlan pai iscrits de Universitât, metint fûr biei manifescj che a vevin di stiçâ la partecipazion dai plui zovins. Dopo cualchi dì, ju vin cjatâts ducj sbregâts». Chest «nol à impedît dut câs di rivâ a vê 30-40 students che a àn frecuentât i cors, sedi tal pôl sientific che in chel umanistic: la sensibilitât su la marilenghe e je», e duncje l’Ateneu al fâs ben a coltâle. Ma lu fasial pardabon?
Par chest rûl al è stât creât il Cirf, il Centri Interdipartimentâl di Ricercje su la lenghe furlane. «Lu vin riformât che al è pôc – al spieghe Peterlunger – di mût che ogni Dipartiment al sedi clamât a aderî cuntune delibare specifiche e che al vedi un so rapresentant dentri dal diretîf». Chest al permet di slargjâ a dutis lis areis didatichis dal Ateneu la pussibilitât di davuelzi azions a pro dal furlan. «Al di là de tabele di oton difûr di Palaç Florio, al è cetant di plui chel che si fâs intes nestris aulis. Dispès nol è visibil, ma la nestre Universitât e davuelç une azion simpri plui fuarte par pandi la identitât profonde dal Friûl. Desenis di ricercjis e cunvignis, tesis di lauree e progjets, a cirin di scuvierzi la nestre storie di îr, la nestre culture di vuê e di dissegnâ il Friûl di doman».
Alore, dut ben? «Si pues fâ cetant di plui e la Universitât e je in vore par fâlu». No a câs, Peterlunger al è stât cooptât pal consei di aministrazion de Arlef. «Si sta cirint di meti in vore ancje in Ateneu lis misuris dal Plan Gjenerâl di Politiche Linguistiche fat bon de Regjon. Ma in tantis robis o sin za inviâts benon».
La liste e promet ben: «O vin inviât il curicul di furlan tal cors di lauree di Siencis de Formazion Primarie che al sta zaromai fasint specializâ 15 futûrs mestris. O puartìn indevant i cors di furlan previodûts de leç 482 pai dipendents de publiche aministrazion e pai students. A consegnâ i diplomis al è vignût Doro Gjat», al scherce Peterlunger. Ma la scomesse plui intrigose e je chê dal Cantîr Friûl inviât dal retôr De Toni cu la regjie di Mauro Pascolini, che al à diviersis fariis in vore su temis tant che economie, demografie, autonomie, teritori, servizis e digjitalizazion. «Al è un prin tentatîf di resonâ in mût sistematic sul Friûl dal avignî. No sai se o rivarìn a incidi su lis politichis pal teritori, ma par sigûr i temis e i sprocs doprâts a son une vore interessants. Jessi partîts cuntune riflession dal gjenar al vûl dî che o tachìn a pensâsi furlans ancje dentri de Universitât. Dulà che, dut câs, la atenzion e je simpri stade declinade al teritori».
«O sin furlans – al siere Peterlunger – ancje tal no savê valorizâ avonde ce che o fasìn. In ducj i cjamps, ma soredut a pro dal Friûl. Di esperts di agronomie, inzegnîrs, oms di sience e di letaris che a cirin di miorâ la vite inte nestre tiere a ‘nt vin une vore, ma al covente cjalâ ae azion dal Ateneu a 360 grâts par capî pardabon che la Universitât e je ogni dì ative a davuelzi la sô mission istitutive».
di Walter Tomada
