Patrie dal Friûl, Vilegnove, ai 08 di Avrîl dal 2008
A Sô Ecelence Bons. Pieri Brollo Arcivescul di UDIN
e p.c.
A Sô Ecelence Bons. Dino De Antoni, Arcivescul di GURIZE
A Sô Ecelence Bons. Ovidio Poletto, Vescul di CONCUARDIE-PORDENON
Al une vore Riverît Bons. Duilio Corgnali, Diretôr de Comission dal Messâl roman par furlan, TARCINT
Bonsignôr une vore riverît,
il svicinâsi dal aniversari di pre Antoni nus à dade la ocasion di cjatâsi come amîs e come grup di Glesie Furlane e nus à regalade la oportunitât di rifleti sul moment che o stin passant.
I disìn cun dute scletece che o sin une vore preocupâts a motîf dal Messâl roman par furlan che nus somee cuasi sparît intune grande fumate, archiviât intun vecjo scafâl bandonât, invuluçât intune cjarte plene di polvar cun sore scrit: Hoc Missale nec nominetur, di chest Messâl no si à di nomenâ nancje il non.
O vin la impression che a Rome nol esisti il timp, e che, dant timp al timp, dut al puedi sfantâsi intun brut nuie.
Lui al sa, Bonsignôr, trop che chest Messâl al è costât in lavôr e sudôr e in ce an che al è partît par Rome cu lis Sôs credenziâls e chês dai Vescui di Gurize e di Concuardie-Pordenon; al cognòs i incuintris che o vin fat cun Lui personalmentri ancjemò cuant che al jere vîf pre Antoni; al à in man la letare mandade al gard. Camillo Ruini President de Conference Episcopâl Taliane, letare che pal moment nô no vin nissune rispueste in man.
La int tai incuintris che o din dongje, e che Lui regolarmentri al ricêf l’avîs e l’invît, e continue a domandânus ce fin che al à fat il Messâl. Il prossim incuintri al sarà a Vençon domenie ai 27 di chest mês inte memorie di pre Antoni e inte ocasion al è ormai necessari informâ i partecipants su lis ultimis vicendis dal Messâl e sore dut se il Messâl al è stât metût al ordin dal dì pe prossime Assemblee de CEI.
Un fat al è clâr: o sin stracs di spietâ e di nudrî sperancis che pal moment si trasformin puntualmentri in delusions; o vin dibisugne de bande dai Sorestants de glesie di un segnâl concret, sigûr intal timp e positîf: a motîf dal Vanzeli, dai pronunciaments dal Magjisteri, dai dirits sacrosants des minorancis, de predilezion di Crist pai piçui e pai tibiâts.
Al è ridicul che in ocasion des Olimpiadis ducj nô si preocupìn dai juscj dirits dal Tibet cuant che in contemporanee o lassìn che a vegnin pescjâts i nestris dirits. La autonomie spirtuâl, culturâl e politiche che il Dalai Lama e la Europe a domandin par chê minorance, chê stesse autonomie e vâl ancje pal nestri Friûl. Ni di plui ni di mancul.
Bonsignôr, o vin fiducie che une Sô rispueste concrete e vegni a slizerî il nestri cûr e a dâ spirt a la nestre int.
O cjapìn la ocasion di cheste letare ancje par domandâ di gnûf che la Diocesi e nomeni finalmentri la Comission tant imprometude pe traduzion in furlan dai libris liturgjics.
Di fat, dome midiant di cheste disposizion si podarà continuâ intai Sacraments il lavôr començât cul Messâl.
Ancje in chest câs, a nestri parê, al è za stât pierdût masse timp.
Par nô, la colaborazion cu lis istituzions des Diocesi sore dut intal câs de liturgjie e je di primarie impuartance e se Lôr lu ritegnin util, come che o vin fat fin cumò, o sin disposcj a dâ une man in cheste opare tant valide e necessarie ancje pe culture e pe dignitât dal popul furlan.
O restìn in spiete di un So scrit.
Cun cordialitât a non dai amîs di Glesie Furlane
_____________________________________________________
La storie infinide al Messâl
E jere la vierte dal 2006 cuant che i vescui dal Friûl a mandavin a Rome il Messâl roman par furlan. Une vore lungje di agns che e veve chê di jessi aprovade de Conference Episcopâl Taliane, la assemblee dai vescui che e à il compit di dâ il bonstâ su lis traduzions dai tescj sacris prime di passâ a la provazion definitive da bande de Congregazion pal cult dal Vatican.
Ma a distance di 2 agns e dopo che pre Antoni nus à lassâts tal 2007, dut al è fer.
La motivazion di chest ritart e sta dute intun fat che di par se al rapresente une ofese pe nestre int e pe nestre glesie: il test latin di riferiment al è la Tertia Editio Typica, che par talian no à ancjemò no vude la aprovazion. E alore, ancje se la lenghe furlane e à za pronte la sô version, cheste no pues vignî fûr prime che la traduzion in lenghe taliane no sedi aprovade.
E cussì il lavôr de Comission presiedude di bons. Duili Cuargnâl (costât agns di lavôr e impegn) al reste fer intun cassetin cence che i vescui furlans a disin nuie, ancje se a podaressin bati i pugns a Rome o cuntun lôr at dâ la aprovazion par che il test al podedi deventâ uficiâl tes diocesis di Udin, Gurize e Cuncuardie-Pordenon.
Christian Romanini
