La competizion eletorâl dai prossims 29 di Avrîl pes Regjonâls si presente tant che une partide intense a poker. Cuatri, tant che il numar «magjic» dal zûc a cjartis che al domande plui strategjie, a son di fat i concorints ae cjarie di president; e pûr, lis tatichis di zûc a somein tant a chês di chei che si sfidin ator de taule verde: si mostre la sigurece di vê in man lis cjartis justis par vinci la pueste plui alte pal futûr de Regjon, ma ancje si «bluffe» tant, parcè che su temis impuartants e decisîfs tant che la riforme sanitarie, lis Uti, il rilanç de economie, di ricetis detaiadis su cemût intervignî e su cemût cjatâ lis cuviertiduris finanziariis necessariis, nol è che si ‘nt viodin tantis. A prevalin lis declarazions di principi, lis sugjestions che a emozionin, i sprocs che a scjaldin parcè che a disin ce che la int si spiete, ma dopo no si capìs tant di plui di chel che al sucedarà de dì dopo la sierade dai bossui indenant.
Epûr, si capìs che o sin a un svolt, che e je une sfide interessante e cualchi viaç ancje divertente, ma no pacjifiche, parcè che intal plat, cemût che al sucêt in cualchi malfamade cjase di zûc clandestine, si finìs par zuiâsi il futûr, dute une vite. La Regjon Friûl-Vignesie Julie, di fat, e je jessude de crisi plui malmetude dai siei vicins; dopo i 5 agns di «andament lent» di Tondo e i 5 di ativisim discjadenât, ma estrani dispès aes esigjencis concretis dal teritori e animât di ideologjisims disleâts de realtât, e je bisugne di ricompatâ lis filis des tantis componentis teritoriâls dal Friûl, des categoriis economichis, des diviersis formazions sociâls, par frontâ la sfide plui grande, chê de globalizazion che e menace la nestre culture e il nestri benstâ.
Il candidât che al à la strade plui in rive sù al è dal sigûr Sergio Bolzonello, sostignût des listis di Pd, Cittadini per Bolzonello, Slovenska Skupnost e Open – Sinistra FVG. Ancje se inte ricjatade unitât dal Centriçampe, l’ex sindic di Pordenon (che nissun nol dubite di lui in merit al ecuilibri intal guviernâ e ae capacitât aministrative) al paie la pene di vê agjît di vicepresident de zonte regjonâl intai ultins 5 agns simpri inte ombre di Debora Serracchiani. Cussì, il so cjapâ lis distancis des riformis de ultime legjislature, al fâs fature a fâ prese suntun eletorât deludût.
Cui che al navighe invezit in grant al è il candidât dai Centridiestre, Massimiliano Fedriga. La sô invistidure e je stade fadiose fûr di misure e a moments penose (di no crodi la ripropueste di Renzo Tondo…), ma ae fin il zovin cjâf grup de Leghe in jessude de Cjamare dai deputâts al somee che al sedi il candidât plui fuart che Lega, Forza Italia e Fratelli d’Italia, Autonomia responsabile (la formazion di Tondo e Colautti) e Progetto FVG (un gnûf subiet politic creât dal imprenditôr Sergio Bini, president di Euros& Promos) a podessin presentâ.
Il Movimento 5 Stelle, invezit, al cjavalgje la onde lungje dal consens cressint aes resintis Politichis e si azarde a presentâ un candidât discognossût al plui, Alessandro Fraleoni Morgera, ma cuntun curriculum professionâl di dut rispiet intal cjamp de ricercje e dal trasferiment tecnologjic, un teme clâf pal Friûl-Vignesie Julie. Di là di chest, si ponte clarementri al «riclam» di Beppe Grillo e di Luigi Di Maio.
Di no sotvalutâ Sergio Cecotti, un toc di novante de politiche regjonâl che si presente cul inovatîf Pat pe Autonomie, nassût tant che grup di aministradôrs comunâi e di inteletuâi impegnâts tal reagjî al aiar di centralisim che al rive di Rome, e che al à cjatade une confluence programatiche cui Manovali per l’autonomia di Jalmic e cun Patrie Furlane, la formazion politiche za rapresentade in consei provinciâl a Udin. Insume, cuasi une ultime clamade par cui che al pense che al sedi necessari vê un partît cul «cjâf» in Friûl. Al partìs dal «zero virgule» des Politichis, ma nol è in assolût di sotvalutâ, soredut se intes setemanis prime dal vôt a Rome al sucedarà alc che al puedi cambiâ i umôrs eletorâi.
di Roberto Pensa
