Ma a restin tancj chei che a vuelin fâ di dut par no pierdi chel che ur reste de lôr identitât furlane
«S. Michêl? No crôt che o rivarìn mai a puartâlu in Friûl. E forsit in dì di vuê, cui nestris fantats che a fevelin simpri mancul la marilenghe e no si sintin furlans cuasi par nuie, nol sarès nancje just sfuarçâ lis robis in chê direzion»: peraule di Pasqualino Codognotto, sindic che agns indaûr al è stât avonde pussibilist rispiet ae bataie par fâ tornâ la localitât ae fôs dal Tiliment al Friûl, ma che cumò al somee rindisi ae situazion che e je vignude a definîsi tal timp. «O vin fat doi referendums: un informâl e un legâl, e no vin mai rivât a tocjâ la cuote dal quorum. Il timp al passe e la int si sint simpri mancul furlane, il Venit al devente salacor simpri plui autonom e alore ce vino di fâ? Tornâ a sbati il cjâf cuintri dal mûr tropis voltis? Miôr cirî di tignî dûr sui leams cul Friûl, prin di dut chei culturâi».
Nol è timp, al somee, di cori daûr di Sapade: «Si à capît che daûr de riunificazion di Sapade al Friûl a son stâts interès economics precîs, che ca jù no son. Baste viodi il câs di Cint, che nol à rivât adore a otignî il stes risultât ancje se i siei abitants a àn votât prin di Sapade».
Ancje a S. Michêl dut câs i interès economics a son une vore fuarts, ma il sindic nol crôt che il passaç cul Friûl al judarès la politiche turistiche dal Comun (che, si à di visâsi, al à 12 mil abitants di Invier e 150 mil di Istât, cuant che Bibion si jemple di turiscj). «O soi zaromai coordenadôr dai sindics de “Cueste dal Venit”, che e met dongje lis localitâts dal Alt Adriatic. E o ai di dî che il Venit nus da un jutori concret, e o vin ancje un bon rapuart cun Grau e Lignan par une promozion unificade dal turisim. L’impuartant al è lavorâ insiemi, la Regjon di apartignince no conte».
Cuissà ce che a pensin chei che za tal 2005 a vevin votât a pro dal trasferiment di S. Michêl al Friûl e chei dal Comitât che fintremai al 2014 a àn continuât a cjapâ sù firmis par rivâ a fâ un altri referendum. Il sindic al à lis ideis claris: «Dîs agns indaûr, il 70-80 par cent al à votât pal Friûl, ma chei che a son lâts a votâ no son mai stâts la maiorance. In chescj agns al è cambiât il mont: i zovins a cjalin bande la Europe, no bande il Friûl. E noaltris o tignìn dûr su la lenghe, ma i nestris fîs no le considerin plui ducj une ricjece».
Une reson par molâ? Par nuie. Di fat chenti e je stade metude in pîts une Comission, clamade “Consulta per la friulanità”, che e cure une vore di progjets par tignî salt il rapuart dai abitants cul Friûl e cu la sô lenghe. A curâ chestis ativitâts e je la zovine e dinamiche assessore ae Culture Elena De Bortoli, che salacor e je plui otimiste a pet dal so sindic: «No si è distudade la voie di Friûl, ma a son cambiadis almancul dôs robis: di une bande la lote dai venits pe autonomie e par dâ gnovis prospetivis al autoguvier, di chê altre bande o vin podût viodi lis dificoltâts che Sapade e sta cjatant intal so rivâ in Friûl: scovacis che no vegnin cjapadis sù, stradis che no vegnin netadis come prin. Plui di cualchidun si domande se passâ cul Friûl al sedi stât un afâr. E ancje la sielte dai nestris citadins, dongje dai motîfs dal cûr, e à di cjalâ ancje lis oportunitâts economichis e i servizis che si à di dâ ae coletivitât».
La Consulte e inmanee un grum di progjets e di ativitâts. Prin di dut su la “Antica Terra de la Tisana”, che e met dongje S. Michêl ai Comuns furlans di Tisane e di Lignan. Chest an, la cunvigne che e nas di cheste iniziative e fevelarà dal risi idric sul Tiliment, probleme che al rivuarde dutis chestis localitâts. Ma la gnove plui biele e je la partecipazion ae Fieste de Patrie dal Friûl, che dal an passât e rive ancje chenti cuntun event che si doplee a S. Michêl e a Tisane, e che si clame “Un puint di peraulis”. L’an passât grandis ridadis cun Catine e Felici ma Furlans, chest an spetacul e riflession cun Corona e Maieron a Tisane, cun Maurizio Mattiuzza e i Luna e un Quarto a S. Michêl: il puint al reste in pîts, e al somee simpri plui salt. Ancje parcè che par furlan si davuelç ancje un ricognossiment impuartant di poesie e di anedotiche, il Premi Nelso Tracanelli, rivât ae edizion numar 17 cun passe 60 iscrits di nivel une vore bon. E S. Michêl al à ancje il so sportelist di furlan che al lavore une vore cu lis scuelis fasint laboratoris didatics che a van a tamesâ tancj aspiets de tradizion furlane, des flabis aes ricetis par prontâ alc di bon di meti sot dai dincj. Parcè che la marilenghe, par imparâle, si scuen cognossile di piçui: e a S. Michêl a restin tancj chei che a vuelin fâ di dut par no pierdi chel che ur reste de lôr identitât furlane.
di Walter Tomada
