INTERVISTE
La zovine clarinetiste di Buie, Sara Papinutti, di 24 agns, e fâs part de “Orchestra Giovanile Alpina”.
Ce vuelial dî par te jessi dentri in cheste orchestre?
«E je une grande ocasion par cressi di un pont di viste artistic in maniere professionâl. O pues confrontâmi cun int di nivel che si impegne par superâ i confins dal panorame musicâl locâl, viers une dimension internazionâl. Mi ven dade ancje la pussibilitât di slargjâ il gno repertori, di favorî la creativitât e il confront cui coleghis, di condividi l’interès pe tutele e pe promozion de bielece midiant de art dai suns».
Cemût si puedial fâ rivâ la musiche classiche ai zovins?
«La Orchestre zovine alpine e je un esempli. Propit parcè che e je formade di zovins volenterôs e entusiascj, e pues ben judâ a invertî la tindince di vuê che e ponte ae superficialitât, par invidâ invezit a une partecipazion cussiente e sensibile viers il “ben scoltâ”».
Ce si aial di fâ pal gnûf public de classiche?
«Par vê un public atîf e pardabon interessât ae classiche, si à di tirâlu sù fin di piçul. Zûcs, laboratoris, progjets, fats di int competente che e sa trasmeti l’amôr pe musiche, cence imposizions. Di chi, dut si svilupe in maniere naturâl, e ancje lis orchestris zovinis come chê alpine, a son une impuartante consecuence di un savê fâ che al cjale al doman».
(a.s.)