Ce vuelial dî colâ dentri di un cuadri, esplorâ lis penombris di un afresc, fâ vivi une statue, sintî ce che nus conte une ancone, une miniature, une stampe? Cheste rubriche e puarte ae scuvierte des oparis di art che e je siore la Patrie, ma lis conte dal didentri, cu la vôs dai lôr protagoniscj, intun zûc gnûf e intrigant.
Il rumôr al fo chel di un linzûl bagnât che al cole su la piere. Un repeton cence scjas, tant che un voluç di sbrendui plomp intal patùs dal savalon. La tante int vignude di ogni vile par viodile, fintremai di Julium dai Cjargnei, o di Emone, o di Concuardie, par cualchi moment no rivà nancje a suspirâ un “oh”. Come se i voi a vessin viodude une robe che no ur pareve pussibile. Dal moment che une ninfe dal aiar no varès mai podût colâ tant che un mortâl. E Bassilla e jere dal sigûr plui svelte di un spirt cuant che e svolave cjaminant suntun fîl tirât tant alt che la sô figure minude cuasi e scomparive intal lusôr dal dì che le involuçave. E la gnot, se e faseve zuiâ tal scûr lis lenghis di fûc di dôs torcis di pin, alore e someave che e ves vudis lis alis ferbintis di Ares, che le tignivin sospindude sui trois de gnot. Dute Aquilee dal sigûr le amave: int consolâr e pitocs, latins che a vignivin des provinciis e aquilegensens sparniçâts vie pes campagnis. Oms e feminis.
E jere picinine, Bassilla, tant che la int dal Orient, ma fate ben: neris i cjavei, tignûts libars a colâ su lis spalis, verts i voi tant che une gjate salvadie, cuntune forme slungjade, come che par solit ju àn lis feminis di Persepolis o di chês bandis lontanis. Un vêl lizêr, trasparent e di sede, i cjareçave il cuarp pandint a pene lis curvis dal sen, lis gjambis di misure lungje, i flancs ben formâts che e pareve une statue di marmul jessude de buteghe di un artesan.
Si jere esibide in ogni grande citât, sedi là che e sofle Boree o jenfri lis muris cjareçadis di Zefirus: Vindobona, Sirmium, Athene. Pardut. Cun grandissime laude, parcè che e jere pardabon la plui brave. E no dome tant che acrobate, che anzit e saveve cjantâ intune maniere cussì dolce che ancje Apolon si sarès inamorât di je. E intal teatri e saveve ancje recitâ. Che dutis lis grandis feminis inventadis dai grêcs a àn vude la sorte di cjapâ cuarp midiant di Bassilla: tal podê vaî tant che Antigone, tal copâsi tant che Gjocaste, tal berlâ cu la vôs di Medee. I benpensants, tant paians che cristians, no i perdonavin la vite dal circ. A disevin che dome lis feminis pierdudis a puedin jessi cussì sfaçadis e cence vergogne di vivi une vite trastolone, in compagnie di oms di teatri, intate di ogni lenghe e di male gjarnazie, che no veve timôr ni dal diu di Mosè ni di ducj chei altris. Ma Bassilla no veve pôre dai oms e dal lôr pinsîr. Libare, e svolave ad alt, parsore dal cjâf e de maravee dai abitants di cheste tiere.
Ae fin, e jere rivade in Aquilee. E si jere inamorade dal spirt di chest lûc: une citât sospindude jenfri la marine e la campagne. Grande, vivarose, rumorose e elegante. Ogni lenghe dal Imperi si fevelave intal forum, cu lis sôs colonis di piere rosade, che cuant che il soreli al murive si inflamavin di ros. E veve imparade ogni fevele, Bassilla, ancje chê strane locâl, chel “sermo rusticus”che i disevin, cussì curiôs, e vivarôs e biel, che al pareve un businâ di fûc, doprât dai predicjadôrs cristians par fâsi capî de int de grande campagne che si pierdeve su la distance fin ae clausure des monts. E chi, in Aquilee, e veve ancje cjatât il so amôr: il grêc Eraclide, poete e cjantôr. No plui tant zovin, no propit un figurin, ma simpri pront a cjapâ la vite de bande juste, magari cu la ridade plui che cu la muse suturne. E al fo propite Eraclide a cori par prin, sburtant vie la int che si jere intropade sul cuarp di Bassilla, cence vite, colât propit intal centri dal teatri. E la sene e fo la rapresentazion teatrâl plui intense che Aquilee e ves mai viodude. Lui, inzenoglât par tiere, che le imbraçave, cjareçant i siei cjavei: «Tantis voltis, Bassilla, tu âs recitât di jessi muarte. Ma mai come vuê, ninine, tu sês tant crodibile». Ridi su la muart, al diseve un filosofi grêc, al è il segnâl plui grant di libertât.
di Agnul Floramo
