“Vôs de Basse”, buinis gnovis pe produzion leterarie par furlan
E je stade pardabon une serade di gale chê che si è tignude a San Zorç di Noiâr ai 31 di Zenâr, cuant che la jurie dal concors leterari in lenghe furlane “Vôs de Basse” e à pandût i nons dai vincidôrs di cheste prime edizion, inmaneade dal sportel associât pe lenghe furlane dai Comuns di Cjarlins, Gonârs, Muçane, Porpêt, Prissinins e San Zorç di Noiâr, cul patrocini de Societât Filologjiche Furlane, de Cooperative Informazion Furlane e de sezion di San Zorç di Noiâr de Universitât de Tierce Etât “Paolo Naliato”. La idee di fonde e jere chê di stiçâ la produzion scrite in lenghe furlane, ricuardant tal stes timp cualchidune jenfri lis figuris che a àn insiorât il panorame culturâl de Basse Furlane.
Dai 49 lavôrs rivâts, la jurie (Maria Fanin, poetesse di San Zorç, Adina Ruffini, pe Filologjiche, Carli Pup e Pauli Cantarut, par Radio Onde Furlane, Vigji Dal Piçul, pe Ute di San Zorç e Emanuela Paro, pes scuelis) e à preseât la origjinalitât e la ricercje lessicâl, massime te sezion students, li che i fruts, par altri, a son stâts plui atents dai grancj tal rispietâ lis regulis dal bant. Tai componiments poetics a son saltadis fûr metaforis e imagjins di gjavâsi il cjapiel, che une lôr trasposizion par talian, a dîle dute, no rindeve justizie ai sunôrs e ae cadence furlane. Ma ancje la narative e à dât lis sôs bielis sensazions, par vie de paronance linguistiche e pe abilitât di scriture, ma soredut pe sperimentazion, ancje tai curts teatrâi. Une pecje, e va dit, e je che ancjemò masse pocje int e je buine di scrivi intun furlan coret, daûr des regulis uficiâls, aben che in plui di cualchi lavôr si à notât une atenzion e un control de grafie.
Te sezion students, il prin premi al è lât a Rossella Dosso dal liceu classic “Dante Alighieri” di Gurize, intant che la classe II A de scuele secondarie di prin grât “Italo Svevo” di Vildivar si è classificade al secont e tierç puest. La sezion poesie e je stade vinçude di Giacomina De Michieli, secont premi a Egle Taverna e tierç a Checo Tam. Gianluca Franco al à fat man basse dal prin premi te sezion narative, intant che Raffaele Serafini e Alessandro Di Pauli i son vignûts daûr al secont e tierç puest. Dongje des publicazions omaç e dai atestâts di partecipazion, i vincidôrs à an ricevût tant che premi un bon di spindi ae librarie Friuli di Udin.
di Serena Fogolini