A New York il tipic plat furlan si mangje par strade. E un libri di Adriano Del Fabro a ‘nt conte storie e curiositâts
E se une dì, spassizant pes stradis di New York, us capitàs di vê une buse tal stomi, ce podaressiso gramolâ, cence disniçâ chel salam platât te valîs che di bogns furlans si sês puartâts daûr? La soluzion e je semplice: un frico fat come Diu comande, in plene regule cui criteris de tradizion nostrane, biel e pront di comprâ di cualchi barachin di strade. No, nol è l’inizi di une conte di fantasie (par altri la trame di un spetacul teatrâl di chescj dîs, “Gildo” de compagnie amatoriâl di Travês), ma la conferme di un progjet imprenditoriâl di sucès, chel de aziende Savio di Bueriis di Magnan, che dopo diviersis bataiis par regjistrâ il non dal prodot (che ancje i cinês a àn provât a robânusal), e sarà presinte dai 31 di Març fin ae Sierade al grant marcjât di Smorgasburg a Brooklyn, proponint il so cjaval di bataie tant che street food, un goloset di strade, juste apont. Des taulis des cjasis e ostariis furlanis aes placis scuadradis dal “Grant Miluç”, il frico, a croste indorade o a cûr tenar e che al file, al concuiste ducj: no par nuie, tal 2013 al è stât doprât dal cogo davianês Luca Manfè tant che caric di briscule par vinci la finâl de edizion americane di Masterchef.
Ma cemût ise nassude cheste specialitât nostrane e, soredut, cuale ise la maniere plui juste par preparâle? A chestis domandis e a tantis altris curiositâts al cîr di rispuindi il librut “E alore, frico”, scrit di Adriano Del Fabro e publicât di Editoriale Programma tal Zenâr di chest an (presit di cuviertine 8 euros). In chest manuâl piçul, ma comut (un centenâr di pagjinis), l’autôr al ricjape in man lis teoriis su la storie dal frico, metint in discussion la version che, a metât dal Cuatricent, lu viôt jessî des pignatis dal cogo Martin di Como par sei servît tant che dolç, cun zucar e canele, ae cort dal Patriarcje di Acuilee. Plui probabile, invezit, la divignince cjargnele, come che a ripuartin i studis sui plats tipics dal arc alpin orientâl e lis vuidis turistichis di metât Nûfcent, ancje se no mancjin lis testemoneancis dal pordenonês. L’autôr al tamese ancje lis presincis de peraule (dispès scrite e rimade cul acent tronc, su la “o” finâl) te produzion leterarie, ripuartant lis diviersis interpretazions etimologjichis (la plui part dai linguiscj le fâs derivâ dal latin “frigere”, ven a stâi “fridi”, intant che Sandri Carrozzo al propon une divignince dal francês, intindint alc fat a tocuts e po dopo cuet). Fevelant des materiis primis (formadi Latarie o Montasio, taiat a tocuts, gratât o in forme di strissule), nol podeve mancjâ un cjapitul dedicât aes latariis sociâls turnariis, che la prime in Italie e jere nassude a For di Avoltri tal 1880 e che tal 1960 in Friûl a ‘nd jere plui di 650, intant che cumò no rivin a une desene.
Prime di rivâ ae ultime part, dedicade aes ricetis, Del Fabro al ripuarte cualchi particolaritât, come lis sagris dedicadis a cheste specialitât, il primât dal frico plui grant, chel di 61 metris e 40 centimetris che tal Otubar dal 2016 al cuvierzè cui siei 480 chilos dut il puint dal Diaul di Cividât, e fintremai il zûc di taule omonim inventât dai triestins par divertîsi a concuistâ il Friûl-Vignesie Julie (dividût in teritoris furlans e triestins, tiere neutrâl bisiache e zonis indipendentis di Gurize e Pordenon) a sun di sfidis su lis tradizions culturâls regjonâls.
di Serena Fogolini
