Pe Slovenie il 2008 nol è dome l’an de presidence de Union europeane (prin paîs dal vieli bloc comunist a vê cheste incarghe fintremai ai 30 di Jugn) o chel des elezions politichis che si davuelzaran cheste Sierade. Il 2008 al è ancje l’an dal 500esim aniversari de nassite di Primož Trubar, il pari de lenghe e de leterature slovene, l’autôr dal prin libri stampât par sloven tal 1550. Trubar, prime sacerdot catolic po pastôr luteran, al voltà ancje il Gnûf Testament te sô lenghe, permetint cussì ai Slovens di podê lei par lôr cont i tescj sacris.
Nassût ai 9 di Jugn dal 1508 a Rašcˇica pri Turjaku (in dì di vuê tal comun di Velike Lašcˇe, piçul vilaç a misdì di Lubiane in chê volte sot dal Imperi dai Asburcs), tal 1520 al tacà scuele a Rijeka-Flum; un an plui tart al lè a Salisburc li che al incuintrà pe prime volte lis ideis de Riforme luterane. Tal 1524 al rivà a Triest e al cognossè lis ideis di Calvin e i scrits di Erasm di Rotterdam. Jenfri il 1528 e il 1529 si cjate a Viene, di dulà che al torne a Triest par colpe de menace de invasion dai Turcs. Tal 1530 al ven fat predi e al tache a difondi lis gnovis ideis dal Luteranisim.
Tal ’35 lu cjatìn predi a Lubiane te catedrâl di Sant Nicule, di dulà che, cinc agns plui tart, al ven parât vie dal guviernadôr de Carniole simpri par colpe des sôs ideis religjosis. Tal 1547 al rive a scjampâ al arest, il 1548 al è invecit l’an dal svolt de sô vite: Trubar al ven scomunicât, i ven improibît di esercitâ funzions religjosis e i vegnin secuestrâts ducj i siei bens, soredut libris. Al scjampe in Gjermanie a Norimberghe, si convertis al protestantesim e al tache a predicjâ. Tal ’49 si maride cuntune slovene di Kranj, tal 1550 a Tübingen in Gjermanie al burìs fûr i prins libris scrits par sloven cu l’alfabet glagolitic: Abecedarium (Abecedari) e Catechismus (Catechisim). Il 1555 al viodè la publicazion dai doi volums in letaris latinis, cun di plui a jessirin altris dôs oparis, Ta evangeli svetiga Matevža (Vanzeli di Sant Mateu), Ena molitov (Une preiere). Trubar, che za di un pieç al à capît la impuartance de cjarte stampade par difondi lis ideis dal Protestantesim, no si ferme: tal 1557 al ven fûr Ta prvi dejl tiga noviga testamenta (La prime part dal Gnûf Testament). La sô ativitât si indrece no dome viers la traduzion di oparis religjosis ma ancje viers la scriture di volums, simpri di argoments religjos.
Tal 1561 Trubar al torne inte Carniole; l’an dopo al ven nomenât sovrintendent de comunitât protestante di Lubiane. Tal 1565 al ven parât vie di gnûf e al scuen trasferîsi in Gjermanie a Derendingen, dongje Tübingen; dopo doi agns, però, al torne inte Carniole di scuindon par cuistâ informazions sul Islam di bande di Turcs fats prisonîrs. Podopo, al à mût di scrivi trê libris: Ta celi katehismus (L’intîr Catechisim), Svetiga Pavla listuve (Letaris di Sant Pauli) e un libri di imnis. Tal 1582 la traduzion par sloven dal Gnûf Testament: Ta celi novi Testament (L’intîr Gnûf Testament). Ai 29 di Jugn dal 1586, a 78 agns, Trubar al mûr: al ven sepulît cun ducj i onôrs a Derendingen. Nûf agns plui tart il fi Felicijan al fâs publicâ l’ultin libri di so pari, la traduzion di une opare di Lutero, Hišne postile (Esegesi di cjase).
In dut, Trubar al à scrit uns 25 libris par sloven; par memoreâ la sô figure in Slovenie si son bielzà davueltis e si davuelzaran inmò par dute la seconde metât di chest an une schirie di manifestazions, tant che mostris, cunvignis e concierts. Di lâ a visitâ la cjase li che al nassè Trubar tal comun di Velike Lašcˇe e ancje la mostre a lui dedicade tal Museu nazionâl a Lubiane.
Cun di plui, daspò la jentrade de Slovenie te zone de valude uniche europeane tal Zenâr dal 2007, la monede di un euro e je stade dedicade a Trubar: sul daûr difat al è il so ritrat. Chest an la Bancje centrâl slovene, pai 500 agns de sô nassite, e à fat jessi une monede di doi euros cul ritrat di Trubar di profîl sul daûr. Il pastôr luteran al jere ancje su la vecje banconote di 10 talars, e poc timp indaûr al è vignût fûr un bol a lui dedicât (viôt ilustrazions te pagjine).
Par savêndi di plui su Trubar e i apontaments a lui dedicâts al è ancje un sît Internet par sloven e par ingles: www.trubar2008.si.
____________________________________________________
Trubar memoreât ancje in Friûl
Ai 11 di Mai stâts, li dal cjastiel di Rubie dongje Savogne dal Lusinç-Sovodnje ob Socˇi, al è stât screât un bust in bronç di Trubar par onorâ l’innomenât inteletuâl sloven. La iniziative, promovude dai propietaris dal fuart cu la poie des organizazions e des associazions de minorance slovene, e à volût testemoneâ la figure dal pastôr luteran, che tal cjastiel di Rubie al predicjà tal Novembar dal 1563 fevelant par sloven, talian e todesc. Tal so intervent, il professôr di lenghe e leterature slovene ae Universitât di Triest e ae Sapience di Rome Miran Košuta al à sotliniât la multiculturalitât e il plurilenghisim di Trubar e la sô volontât di cirî simpri il dialic. Presints ae scree dal bust ancje il sindic di Savogne-Sovodnje Marko Petejan, il president de Provincie di Gurize Enrico Gherghetta e la neo senadore dal Pd Tamara Blažina.
In Slovenie al cres il numar ai muarts sul puest di vore
Il probleme dai muarts sui puescj di vore al è cetant sintût no dome in Friûl ma ancje in Slovenie. L’an passât a pierdi la vite intant che a lavoravin a son stâts in 29 di lôr, il numar plui alt di dîs agns in ca. Cheste tindince a cressi (tal 2004 i muarts a jerin stâts “dome” 13) e preocupe une vore il guvier di Lubiane, che al vûl ridusi il numar dai incidents dal 25% dentri dai prossims cuatri agns. Il setôr li che a capitin plui infortunis (adiriture la metât) al è chel de edilizie, stant che lis normis di prevenzion a vegnin rispietadis pôc e nuie.
