L’EDITORIÂL – La cjase dai contents…

O soi nassût a Modot, un borgut tal comun di Murùs, tune cjase di contadins. Une cjase che no veve nissun «comfort», o comoditâts dal dì di vuê. Il «bagno» al jere une podine che si meteve te stale, che l’ambient al jere plui cliput. La «toilette» e jere fate di cuatri breis dongje de cort dal ledan. La «cjase», chê che cumò a clamin «cusine», uniche stanzie de vite cuotidiane, e jere furnide di spolert, taule, seglâr cui cjaldîrs pe aghe, vetrine par meti vie chei pôcs creps e padielis dal mangjâ e, tal sot scjale, un fregul di camarin par tignî il companadi. Lis cjamaris adalt e parsore il cjast, tal sotet. Un biel curtîl cun stale, toglât, cjôt e gjalinâr… dut ce che al coventave pe agricolture di une volte. Un biel puarton par jentrâ tal curtîl cuntun arc di piere cuntune date su la clâf di volte: 1752.
Cumò o pensi: cheste cjase le fasevin sù intant che il pape Benedet XIV cu la bole «Injuncta nobis» al scancelave de storie, de gjeografie, de vite de glesie e, se al ves podût, ancje de memorie il Patriarcjât di Aquilee! Sigûr che chei muradôrs che a fasevin sù la cjase o chei sotants che a lavoravin la tiere no si jerin nacuarzûts di cheste prepotence papâl, di cheste vergogne e scandul de storie. Lôr a continuarin a lavorâ, a puartâ i racolts al cont, a fadiâ di un scûr a chel altri, a preâ e a porconâ, a vivi e a murî come simpri.
No dome parcè che o soi nassût li dentri e o ai vivude la mê infanzie, ma pûr pe sô struture, e jere une cjase che mi plaseve. Ancje se no veve comoditâts. E cui lis vevial!? Ancje se no jere di nestre proprietât, che o jerin in afit. E cui jerial proprietari!?
I nestris paîs fats di tancj borcs cun cjasis une taco la altre, tune lungje filaine. Architeture «spontanie», semplice e essenziâl, però in armonie cul ambient. Biei puartons a arc che a puartavin in cjasis vecjis, ma cjamadis di calôr uman, di vite, di vitis, di solidarietât, di socialitât, di sapience, di preiere, di rassegnazion, di fadie, di puaretât dignitose, di sotanance, di umiliazions e disgraciis.
E, stant che si jere ducj sotans, mezadris o afituâi, la piês disgracie e umiliazion che e podeve capitâ e jere co il paron, il siôr, il cont al mandave il sfrat, al obleave a lâ fûr di cjase, a fâ Sant Martin, parcè che il fat al sucedeve simpri in Novembar, a fin stagjon. Obleâts a cjapâ sù chei cuatri strafaniçs e grabatui che la famee e disponeve e partî cu la sperance di cjatâ altri lûc dulà continuâ la fadie. No si jere tant lontans dai «servidôrs de çope» di ete medievâl. Mi impensi, cuant che o jeri frut, dai «gjigjos» che a rivavin ca dal tevisan, dai paîs de Livence e de Plâf cu lis vacjis e un cjar cjamât di pocjis robis a jemplâ lis cjasis lassadis vueidis.
Par chel i furlans a àn vût il «mâl dal clap». No volevin riscjâ di cjatâsi parâts vie di cjase. Un ben primari: cumbinâ un sflic di tiere di proprietât e fâsi sù, magari un tic a la volte, une cjase che nissun podès plui parâti fûr.
Cumò si viodin tantis cjasis, tantis «vilis» o vilutis une plui biele di chê altre, cul zardinut e cul prât inglês tal puest dal curtîl: nol mancje nuie.
O, salacor, al mancje il plui. E mancje la int. O viôt, tai nestris paîs cetantis cjasis sieradis, cetancj che a vivin dibessôi o cu la badant…, in spiete che il timp si sieri ancje chê cjase. Cjasis grandis cun ducj i confuarts, tiradis a puntin e dentri un, doi, nissun, o cul cartel par di fûr «Vendesi, tel 0432…».
Sino lâts al ecès opost? Valevie la pene che i vecjos a fasessin tancj sacrificis par viodi cumò la cjase vueide? No lu sai. Ciert che i viei a vevin reson: la cjase dai contents e je ancjemò di fâ sù!
Roman Michelot