Viodi cui propris voi cemût che al nas il formadi e provâ fintremai a fâlu. Dut intal vert dai boscs, cenglâts de curnîs maraveose des monts furlanis. Di cheste idee a nassin lis dôs jessudis dedicadis ai fruts e organizadis de associazion Camminabimbi di Udin.
Il prin apontament al è in program domenie ai 24 di Jugn sui plans di Montâs. Li i plui piçui a podaran metisi sot a molzi lis vacjis che dal lôr lat al nas il formadi famôs. Prime però i fruts, acompagnâts di gjenitôrs, nonos o barbis, si imerzaran intal panorame dal altiplan che al gjave pardabon il flât, cjaminant tra marmotis e vacjis. La partence de malghe Montâs e je previodude pes 10.30.
Sabide ai 6 di Lui, invezit, l’apontament al è in program in malghe Cuarnan, li che si rive sù di Glemone, localitât Stalis. Aes 10.30 e scomençarà la cjaminade che e puartarà i fruts fin ae panoramiche siele dal Ors in Cuarnan, di dulà che par solit si butin i pareclevis. Rivât al bielvedê, il grup si direzarà bande la malghe. Li, Sara, che e à in gjestion la malghe, e judarà i fruts a deventâ mestris dal formadi, fasintjur scuvierzi lis fasis de trasformazion dal lat.
Informazions e iscrizions su www.camminabimbi.com o scrivint a camminabimbi@hotmail.com
Redazion