Il monitori dal Vaiont
✽✽ “Se par te chest puest al à un significât, se lis stradis e lis monts ti apartegnin, no tu âs di vê pôre di restâ”. A son gjavadis dal libri “Resto qui” di Marco Balzano chestis peraulis che a ’nt costituissin la essence. “Resto qui” al fevele di un borc: Curon Venosta, paîs dal Sudtirôl che tal 1950 al fo somerzût di un lât artificiâl che si creà dopo de costruzion di une dighe. L’autôr lu à cognossût une dì di Istât dal 2014, intant che al jere in feriis, e al à decidût di contânt la storie traviers lis vicendis di Trina, vitime de violence fassiste che i impedìs di fâ il so mistîr di mestre. Cuant che il regjim al volarès cancelâ fin la identitât di un popul, no je altre strade che doprâ lis peraulis par contâ. Al è chel che e fâs Trina, indreçantsi ae fie sparide intal nuie.
✽✽ Chê di “Resto qui” e je la storie di une resistence, a une dighe prin di dut, ma ancje ae storie che cui siei imperatîfs e domande aes personis semplicis presits tant alts. Par esempli, di rinunziâ ae proprie lenghe e ae proprie culture, come che al è sucedût ancje chi di nô. Di rassegnâsi ae pierdite de cjase e dai afiets. Di “cambiâ”. Resisti al pues volê dî scjampâ, scuindisi. Ma al pues significâ ancje restâ. Ancorâts ae proprie tiere cun indurance. Parcè che, juste apont, se la tô tiere e à par te un significât, no tu âs pôre di restâ e di difindile. Ancje di chel che cualchidun al clamarès progrès, tant che al è sucedût a Curon, chel progrès che ta chei agns al domandave energjie. Trops paisaçs naturâi indi àno fat lis spesis, cuant che si à tratât di costruî centrâls idroeletrichis e bacins artificiâi? In cualchi câs ancje paîs intîrs, che a son stâts somerzûts. Al sucedè a Curon, ma ancje ae borgade La Maina, a Sauris, cuant che e fo costruide la dighe e cun jê al nassè il lât artificiâl, e compagn al borc di Movada cu la dighe sul puint Racli e il lât di Redone, in Val Tramontine. E simpri in non dal progrès, passant pes arogancis dai potents e pe impotence dai citadins, si fasè sù – li che no si veve di fâ – la dighe dal Vaiont. Al jere ai 9 di Otubar di 55 agns indaûr cuant che une frane si stacà de Mont Toc colant sul lât artificiâl disot. La onde che si fasè e stramontà la dighe lant jù pe aghe e puartant vie vitis – 1917 i muarts – e paîs intîrs. Al pâr che ae cerimonie inmaneade ogni an tal aniversari de frane, no saran chest an politics di non. Che a sedin o mancul (ancje se une lôr assence e sarès significative), ben plui impuartant al è mantignî il ricuart e la memorie di chê tragjedie, la veretât di int sacrificade e copade in non dal “progrès de Nazion” (a diserin cussì ai puars contadins che a doverin cedi cjase e terens a presits ridicui) e di une idee di avignî malsane.
✽✽ Chê tragjedie e reste – a 55 agns di distance – paradigmatiche di une nature violentade di oms che si iludin di podêle gjestî e guviernâ come che ur pâr, sfrutant ogni risorse pussibile, cence considerâ lis consecuencis pussibilis. E di comunitâts no scoltadis e no cjapadis dentri tes decisions. Ma il teritori al è di cui che lu vîf, e propit par chest al è cui che lu vîf che al à di decidi ce fâ. Scoltâ lis comunitâts locâls par cualchidun – ancje in dì di vuê – nol è altri che un berdei fastidiôs a pet de necessitât presumude di fâ oparis buinis di produsi ricjecis. Ma a ce presit e par cui? Pal plui par pôcs e che no son dal teritori. Ancje in Friûl, par esempli cul business des centralinis idroeletrichis: cetancj implants e continuis richiestis di derivazion, massime in mont. Tante part dai profits (a front di cuotis di concession di ridi) no restin in Friûl, ma a finissin tes sachetis di societâts privadis “forestis” che no ur poche ni di rispiet dal deflùs minim vitâl dai flums e des aghis interessadis des centralinis, ni dal impat su la biodiversitât, sul ecosisteme (e o fevelìn di fonts di energjie rinovabile). Ve alore la impuartance di contâ ce che al sucêt, di restâ par difindi ce che al è nestri e che al sarà dai nestris fîs e che al fâs part de nestre identitât, di pretindi che i nestris sorestants a fasin prin di dut il ben dal teritori e des comunitâts che achì a vivin. Il Vaiont nus al insegne, simpri che al sedi cualchidun che al vûl imparâ. ❚
di Erika Adami
