AUSTRIE. Classis diferenziadis pai scuelârs forescj

Cul gnûf an scolastic, i canais e lis fameis austriachis si son cjatâts di front di cualchi novitât. Tacant di chês che o podìn clamâ “classis diferenziadis” pe lenghe todescje, cence contâ lis normis plui penzis par fâur cuintri a chei che a van “in marine”. O fevelìn in dute la Austrie di plui o mancul 700 classis di todesc pai scuelârs che no rivin a stâ daûr come cu va aes lezions par vie di problemis cu la lenghe, e che par chest a son stâts judicâts tant che arlêfs “particolârs”. In chestis classis si insegne il todesc par 15-20 oris, daûr di un program specific, biel che in materiis tant che il dissen, la musiche, la gjinastiche i fruts a vegnin metûts intes classis normâls pe lôr etât. L’unic limit al è che chestis classis “diferenziadis” a vegnin formadis dome scomençant di un minim di 8 scuelârs par ogni sede. A àn l’oblic di frecuentâlis dome i scuelârs iscrits al prin cicli di studis che a son a pene rivâts in Austrie e che si scuen metiju dentri intal sisteme scolastic austriac. Ae fin di ogni semestri si varan di valutâ i progrès e, cuant che a saran rivâts al nivel just di cognossince de lenghe, i canais a podaran jessi inserîts intes classis regolârs. In chestis classis, dut câs, a varan di stâ daûr a 6 oris di supuart linguistic in plui dal normâl orari di lezion. L’inseriment intune classe diferenziade al vignarà fat su la fonde di un test di jentrade, che al somee che nol sedi inmò pront e, duncje, par chest an la decision le cjaparà il diretôr de scuele. Tant che il test di jentrade, al somee che no sedin ancjemò pronts nancje i programs ministeriâi e i tescj di valutazion par chest insegnament diferenziât, e che si scugnarà di fat lâ indevant cun plui libertât.
Cul an scolastic, i regolaments pes assencis injustificadis a deventin plui grivis. Scomençant di chest an, il scuelâr che intant dal periodi scolastic dal oblic (9 agns) al rivarà a 4 dîs di assence injustificade, ancje no seguitîfs, al sarà mandât devant de autoritât aministrative distretuâl e al varà di paiâ 110 euros di multe. La procedure par dâ lis punizions e sarà plui semplice e duncje, intal câs di piçulis baronadis, il preside e i insegnants a podaran dâ subit cjastîs tant che il reclam.
Chestis no son dal sigûr lis unichis novitâts inte scuele austriache.
E je daûr a jentrâ in vore une gnove schirie di normis su la autonomie scolastiche, fate buine intal 2017, e cun di plui gnovis regulis sul numar dai arlêfs par classe, pe nomine dai docents, parie cun gnûfs criteris pes iscrizions ae scuele primarie.
Al è za partît il progjet de “Neue Mittelschule”, ven a stâi la “gnove scuele medie”, che e varès di rivâ a standardizâ la preparazion e a superâ il sisteme di distribuzion dai arlêfs in base al merit, sisteme che tancj a definissin classist. Fin in dì di vuê, chest si fâs za a 9 agns di etât (la nestre cuarte elementâr), cuant che al ven definît il percors scolastic seguitîf (o la scuele professionâl o il gjinasi, uniche pussibilitât pe universitât) e chest al marcarà la vite e la cariere. ❚
Barbara Cinausero