Scunis vueidis, ce spietìno par fâ alc?
✽✽ O sin tal ultin bocon dal an e cjalant a chel che al vignarà, ce vino di sperâ pe nestre tiere? Par cualis bataiis valie la pene di stiçâ la cussience dai furlans? La Patrie dal Friûl e à provât a dâ cualchi rispueste su chest numar. Ma cui puartaraial indevant chês bataiis? Sal domandìn dopo vê let lis ultimis statistichis demografichis, che a piturin une situazion nere: pôc plui di un frut par femine in Friûl-Vignesie Julie. E la tindince – di agnorums – e je a lâ simpri in piês.
✽✽ Nol è stât program eletorâl che nol vedi previodût incentîfs ae natalitât. La Zonte Serracchiani, cul mandât in scjadince, e veve ancje fat bon un “bonus bebè” di 1200 euros. Di çampe a drete al è stât dut un sflorî di propuestis par contrastâ il fenomen des scunis vueidis. Ce fin àno fat? Cumò il governadôr leghist Fedriga al à fat savê che, su propueste dal Friûl-Vignesie Julie, dentri dal program Gect-Euregio cence confins, al è stât imbastît un grup di lavôr cun Venit e Carinzie par frontâ la cuistion. O lassìn ai esperts la definizion di politichis par fâi cuintri al câl des nassitis, ma, ocjo: volìno dâ une prospetive (sociâl, culturâl, economiche…) aes nestris comunitâts? Alore nol è plui timp di pierdi. ❚
Erika Adami
