A Cividât gnove tape di “Rush”,
il progjet european sul disvilup dal plurilinguisim
in classe cul ûs des lenghis minoritariis
Une oportunitât preziose di confront des pratichis educativis des lenghis minôrs e des diviersis modalitâts di tutele dal plurilinguisim. Si è sierât a Cividât il Meeting transnazionâl dai arlêfs e dai docents di Italie, Spagne e Cravuazie, i trê Stâts includûts in “Rush – Re and Up Skilling Horizons”, progjet trienâl de Union Europeane centrât sul valôr culturâl dal plurilinguisim e su la impuartance des lenghis minoritariis te istruzion. In particolâr, obietîf primari di “Rush” al è chel di aprofondî e di disvilupâ lis competencis di meti in vore di bande dal insegnant plurilengâl cul ûs di lenghis comunitariis, includudis chês minoritariis. Coordenadôrs dal progjet a son il Convit nazionâl “Paolo Diacono” di Cividât, il Comun di Cividât e la Agjenzie Regjonâl pe Lenghe Furlane, che a lôr si son zontâts l’Ent regjon Galizie (Spagne), dôs scuelis de Regjon Galizie, la Cravuazie (Union des minorancis) e la scuele di Rovigno. Un totâl di vot partners tra ents istituzionâi e scuelis primariis e secondariis di prin grât.
Dilunc des cinc zornadis di lavôr (dai 15 ai 19 di Otubar) si è creât un grup unît che al à lavorât su trê sessions paralelis, in relazion ai profîi professionâi e ai rûi di ognidun tal progjet. Il grup di regjie, formât dai responsabii di ducj i vot sogjets partner, al à organizât il Meeting transnazionâl di Cividât par programâ la evoluzion des dôs oparis dal inzen, che a saran fatis intai trê agns di disvilup dal progjet: une Linie vuide pal docent plurilengâl voltade in 6 lenghis (furlan, cravuat, galizian, inglês, talian e spagnûl), e un Centri risorsis european dulà che si darà acet a ducj i materiâi pal insegnament plurilengâl che a vignaran produsûts dai docents.
I insegnants des trê regjons coinvoltis (furlane, galiziane e istriane) a àn partecipât ae formazion transnazionâl dal learning teaching training activity, prime cu la presince di esperts che ur àn furnît i stimui par rifleti, e dopo cu la progjetazion comune dal fonts integradôr che al definìs la macroaree dulà che si fasaran i modui formatîfs origjinâi interdissiplinârs daûr des competencis clâf europeanis, doprant lis lenghis furlane, taliane, galiziane, spagnole, cravuate, istro-venite e inglese.
Infin, i arlêfs des trê regjons europeanis di 9 e 12 agns a àn formât lis primis classis transnazionâls inte scuele primarie (classe 4a e 4b) e inte scuele secondarie di prin grât (classe 2a e 2b), cun frecuence integrade plurilengâl par une setemane. A son stâts ospitâts tes fameis e a àn lavorât in classe doprant lis lenghis dal progjet. A son stâts fats aprofondiments culturâi e linguistics cu la scuvierte dai teritoris e ativitâts di orientament culturâl. Ae fin de setemane, e je stade fate la ativitât di job shadowing intes classis, cun risultâts e rispuestis une vore positîfs. Il prossim apontament al sarà in Galizie, a Santiago de Compostela, dai 6 ai 9 di Mai dal 2019.
«”Rush” al è un progjet inovatîf, che pe prime volte in Europe al sperimente l’inseriment des lenghis minoritariis intal insegnament plurilinguistic e che si insiore midiant di scambis continuis e di contribûts di trê diviers Paîs – al marche il diretôr de ARLeF, William Cisilino -. E je une oportunitât straordenarie par rinfuarçâ lis modalitâts modernis di aprendiment des lenghis – e tra chestis il furlan – intes scuelis dal nestri teritori». ❚
Redazion