Ancje chest an si è rinovât l’apontament cu la fotografie te glesie di Sant Francesc a Udin dulà che, tacant dai 13 di Otubar e fintremai ai 25 di Novembar, si pues visitâ la mostre Fotografia in Friuli 1950-1980. Famiglia & società, une rassegne di imagjins fotografichis curade di Alvise Rampini e inmaneade dal Istitût regjonâl di promozion e animazion culturâl (Irpac). Il progjet al è stât inviât in gracie de colaborazion cu la Regjon, cui Civics Museus di Udin, cu la poie de Fondazione Friuli e cul patrocini de Universitât dal Friûl.
Recuperâ imagjins dal passât al è stât un lavôr lunc, tacât dal Irpac tal 2008 cu la mostre Come eravamo 1880-1950. Gli archivi privati in Friuli e lât indenant fintremai al 2017 cu la mostre Album di Famiglia. Fotografia in Friuli 1850-1950, che e à clamât dongje passe 6 mil visitadôrs. Chest an, invezit, l’istitût si svicine inmò di plui al presint lant a analizâ trente agns impuartants de storie par mieç di societât, culture, famee e politiche dal nestri teritori. In gracie dai contribûts di archivis impuartants e fonts regjonâi, e cu la condivision di bande di colezioniscj e fotoamadôrs privâts, lis fotografiis esponudis inte glesie di Sant Francesc a documentin une part di storie locâl e sociâl: cu la mostre a vegnin indagâts i savoltaments economics, lis gnovis modis, i events storics e la evoluzion urbane, come la rimozion des sinis dal tram che al passave par vie Marcjât Vieri tal 1953 e i lavôrs par cuvierzi la roie di vie Graçan.
Inovazion e tradizion a somein jessi lis peraulis clâf dai trente agns frenetics che a compagnarin la citât di Udin dai prins agns de Republiche fin al 1980. Ancje se colpide de vuere, la citât dai agns Cincuante e à vivût un procès lunc di modernizazion, lant a riscatâ in curt la cundizion di ritart culturâl, economic e sociâl. Si lu viôt tai vistîts su misure de classe benestante intant des cenis alì dal Circul “Uficiâi” di vie Aquilee, moments iluminâts des ridadis di atôrs e personalitâts cinematografichis tant che Alberto Sordi, Ugo Tognazzi, Vittorio Gassman e Raimondo Vianello.
Ae “dolce vite” des classis mediis e altis de provincie udinese, testemoneade des fotografiis di Anna Maria Pittana, si zonte ancjemò un Friûl periferic leât aes sôs lidrîs dulà che a son presintis jerarchiis e tradizions familiârs, musis segnadis de fadie e dal lavôr manuâl, vistîts puars e fruiâts a fuarce di doprâju, dut tramandât dai scats di Carlo Innocenti.
Aes imagjins atemporâls e rarefatis, cuasi onirichis di Carlo Dalla Mura, si contraponin lis fotografiis dai agns Cincuante dai ospits dal ospedâl psichiatric di Sant Svualt prime de aprovazion de leç Basaglia, fatis di Francesco Krivec. Ai vistîts ae mode dai fîs des fameis sioris, dispès imortaladis in pose su lis gjostris o sore l’ultin model di Fiat o di Vespa, si zontin lis imagjins neorealistis dai fradis Borghesan di frutins cence scarpis cun sù peçots ruvinâts. Aes imagjins edonistichis de vite balneâr di Lignan (che in chei agns al deve acet a gnovis ondis di turisim e che al viodeve la nassite dal “Sbarco dei pirati”, e dîs agns dopo de gnove “Terrazza a mare”) si contraponin lis fotos di une classe operarie impleade tai stabiliments de Solari e tes industriis di Tor di Zuin.
«Cheste esposizion nus regale une gnove oportunitât di cognossince de storie dal Friûl dal 1950 ai agns Otante midiant de ogjetivitât de fotografie», al à dit Giuseppe Morandini, president de Fondazione Friuli, in ocasion de scree de mostre.
Il catalic che al è stât realizât dongje de mostre, oltri a jessi il risultât di ricercjis atentis sul plan storiografic e cuntun corpus di plui di cent fotografiis, al è ancjemò plui preseât in gracie de presince di saçs par cure di Alvise Rampini, Claudio Domini, Paolo Medeossi e Anna Maria Pittana. La mostre e je a ingrès libar e e je vierte al public dal martars al vinars des 3 aes 6 dopomisdì, e la sabide e la domenie des 11 di matine aes 7 sot sere. ❚
Piero Cargnelutti
