Nol è simpri facil spiegâ a peraulis la bontât, l’afiet, la pazience, la misericordie di Diu. Jesù al dopre tantis parabulis; pape Luciani al fevelave di Diu Mari. Ancje pre Antoni, cuntun esemplut piçul piçul, cun ce che i è capitât di viodi, al dîs dutis chestis robis.
pre Roman Michelot
Une dì, cjaminant sorepinsîr, mi soi intivât a passâ dongje di une frutute cuntune biele pipine tal braç. Le braçolave, le strenzeve, le bussave, fin che si è stufade e no voleve plui lâ indenant. Alore sô mari le à alçade di pês, jê e la pipine, e le à puartade tal braç.
Al è in chel moment che o ai tacât a confusionâmi: cui puartavial la pipine? La frute o la mari?
Nô si iludìn di puartâ, e forsit o puartìn, ma o sin ancje puartâts. Par chel, mi sint di paragonâ il ream di Diu a chê frute cu la pipine. ❚
pre Antoni Beline