LInt AUTONOMISTE. Une autonomiste cui talians

La decision di Alessandra Guerra di dâsi dongje al Pd nus puarte a cualchi resonament fûr de notizie in se. Prime robe: din par bon che une sielte dal gjenar e partissi di une buine fede totâl. Ven a stâi, che no cjapìn nancje par ipotesi un cualchi tornecont, une cualchi promesse fate ae Guerra dai dirigjents dal Pd su cualchi puest intun futûr prossim, se l’aiar pal Pd al ves di cambiâ a nivel di guvier. Chest mût di lâ indevant tal pinsîr, no vûl dî che une pussibilitât dal gjenar no sedi pussibil, ma no nus covente a lâ indenant.
O vin invezit di domandâsi parcè che une persone come la Alessandra che si è simpri declarade autonomiste, intal moment che e decît di tornâ a fâ politiche, e à sielzût un partît talian. Pal moment fermìnsi chi, cence fâ diference tra çampe e diestre, po dopo viodarìn parcè il Pd.
Tes sôs declarazions, l’ex leghiste e à simpri sostignût di considerâ la bataie pal Friûl la sô plui grande motivazion ideâl: pe frutine tignude sui zenoi di don Placereani, e che in famee e veve simpri mastiât furlan e autonomie, la Leghe e jere il mieç e no il fin des sperancis furlanis.
La Guerra e risultave par tancj di lôr che a son stâts o che a stan te Leghe, l’ideâl di une rinassite furlane, e il so jessi la prime femine al guvier de Regjon no je state une robe di nuie. Ma pardabon in tancj agns lis robis a son cambiadis e il partît di Bossi al à simpri plui mostrade une muse «padane», tal sens statalist, tant che fuarce dal centridiestre.
Se cualchidun al à ancjemò dubis su cheste derive, al bastarès cjalâ lis bataiis puartadis indenant dal Carroccio tai ultins timps: sigurece, imigrazion. Ancje a nivel regjonâl, dulà che su cuestions plui leadis al Friûl, la fredece dal grup dirigjent leghist regjonâl, espression di Triest e di Pordenon, e somee clare. No si scjampe aes diretivis di Milan, o cumò di Rome, dulà che a son ministris, e il federalisim al reste un alc di economic e nol smicje ae nestre autodeterminazion. Di simpri lis minorancis, tai fats e no a peraulis, no son plasudis a Bossi, fintremai se a son numerosis, storichementri datadis e de Padanie no àn mai fat un mît.
Tornìn a Alessandra. O podìn pensà che come jê a son altris che a àn simpri crodût te Leghe e che, a planc a planc, si visin che no corispuint plui ai lôr valôrs e ideâi. Prime di jê, Cecotti e tante part di chei di Convergjence. Il sindic pal moment al è tirât de bande, al fâs il professôr: fin cuant podaraial restâ cence politiche, chê biele, no chê passade intai uficis a firmâ cjartis?
La Guerra, o pensi che par un an e mieç e vedi vût une idee compagne, ma no je rivade a stâ ferme: masse usade al contat cu la int, aes riunions, ancje a fâsi viodi su gjornâi e televisions. O torni a ripeti: o speri che cheste e sedi la version juste.
Ma noaltris o vin di rispuindi a une domande divierse: parcè un, une che si declare autonomiste no aie altre sielte par fâ politiche? Parcè un partît come il Pd puedial someâ un alc di compatibil cun cheste idee? Parcè la voie di fâ politiche de Guerra no si ise mudade intun sfuarç personâl di meti dongje altris che le pensin come jê?
Forsit parcè che no le pense plui cussì o i va ben di lâ dulà e cun chei che, ancje lôr dome – e nancje tant – a peraulis, a puedin fâ fente di stâle a sintî.
Dree Valcic