INCHIESTE: IL FRIÛL CHE AL VIGNARÀ. Lis bataiis di scombati tal 2019

Ce sperìno pe nestre tiere?
Dîs cantins che e vâl la pene di lotâ l’an gnûf
La fuarce de imagjinazion di Tullio Avoledo nus sburte viers di un avignî teribil, ma al è clâr che ducj si spietìn cetant di miôr pe nestre tiere e “pai nestris fogolârs”. Ce sperìno di otignî? Ce vino di sperâ? Par ce bataiis valie la pene di stiçâ la cussience dai furlans? O vin provât a sintetizâ in dîs ponts lis robis che si varès di domandâ al gnûf an, cence pretindi di volê rispuindi aes spietis di ducj, ma cirint di componi un cuadri il plui pussibil complet di cemût che al varès di jessi “l’an che al vignarà” par miorâ, almancul in alc, la vite di ducj.
1. PLUI AUTONOMIE
Il Friûl al varès bisugne di plui autonomie. «Ma no le aie za»? Sigûr! Pecjât che nol à i bêçs par autoguviernâsi pardabon e intai agns al à pierdût ancje la braùre di “fâ di bessôl” in tancj cantins dulà che si jere simpri taiât une capacitât di azion incisive, de inovazion economiche e industriâl fintremai ae Protezion Civîl. Vuê il paradòs al è che il Venit al sburte par vê la nestre autonomie, e noaltris invezit o fasìn di mancul di doprâle. Alore scomencìn a rivendicâ indaûr i bêçs che i guviers di çampe e di drete nus àn gjavât! Al è un nestri dirit e o vin di scombati par vêju! Ocjo! Cence chei miliarts di euros, il disvilup dal nestri teritori al è a risi e i nestris zovins si candidin a tornâ “libars di scugnî lâ”.
2. IL RILANÇ DE ECONOMIE
Nol covente jessi strolics par capî che la nestre situazion economiche, come chê de Italie interie, e varès bisugne di une biele iniezion di fiducie, par creâ lis cundizions che a permetin aes nestris impresis di slargjâ lis lôr rêts di vendite, ma ancje chês di colaborazion. Une indagjin de Universitât di Vignesie e à sclarît che lis nestris aziendis a son al prin puest in Italie pe propension a metisi in rêt. Soredut i zovins a àn capide la lezion che “la union e da fuarce a ducj” sul marcjât talian, ma ancjemò di plui tal forest. Cheste e je la strade juste.
3. LA COMPETENCE SU LA SCUELE
La scuele furlane e je in crisi nere, cence metât dai dirigjents scolastics e cun doi diretôrs dal Ufici Scolastic Regjonâl dimetûts intun an e mieç. Ce fâ? La uniche soluzion a chest disastri e je chê di cjapâ in man in maniere direte la competence su la istruzion. E no cu la regjonalizazion dal Usr (che al vûl dî dome paiâ i dipendents e pôc di plui), ma cjapantsi lis risorsis e la competence pal guvier di dut il sisteme. La assessore Rosolen e dîs che al coste? Se si à pôre di cjapâsi une responsabilitât al è miôr stâ a cjase: pal Friûl di doman al covente vê coraç e fâ sieltis radicâls. Se no, la nestre scuele di ecelence e deventarà (come za la nestre sanitât) no come chê dal Trentin, ma come chê de Calabrie. Cun dut il rispiet pe Calabrie…
4. ATENZION PAL AMBIENT
La distruzion che la Cjargne e à patît pe aluvion ae fin di Otubar e je dome la ultime des feridis che la nestre tiere e à scugnût frontâ. A coventin intervents urgjents e massîfs pe prevenzion dal pericul idrogjeologjic. A son slacs une vore pençs che a spietin dome di tirâ sot cjasis e int, flums che purtrop a spietin dome di saltâ fûr; ma si visìn di chescj pericui dome cuant che al è masse tart.
5. PLUI CONESSION, MANCUL DIPENDENCE
Sperìn che il 2019 i puarti al Friûl plui conession, plui condivision: ma no dome su Internet, ancje se bande largje e fibre a tancj furlans ur coventaressin come il pan. La vere conession che nus puartarès lontan e je fra lis personis, e la condivision che e covente e je di valôrs. Cence, ognidun al bale cun sô agne: ma lâ ognidun par so cont no nus puarte di nissune bande. Dut câs, o vin di liberâsi ancje de dipendence. Di chei altris, ma ancje di sostancis che a puartin simpri plui dispès la muart o la ruvine des esistencis di zovins e mancul zovins: alcul, droghe e zûc a son plaiis che a fasin mâl. Se fantatis come Alice a muerin par une overdose (di tancj agns nol sucedeve), al è alc che nol funzione te nestre maniere di frontâ il malstâ dai nestris fîs. La rispueste e pues dome vignî de educazion e dal afiet: ma e à di jessi une rispueste sociâl, nol baste cualchi sfuarç individuâl.
6. LA SIGURECE SUL LAVÔR
Il Friûl tal 2018 al à vût un dai piês records che si puedin regjistrâ, o ben chel dai muarts sul lavôr. Dodis: un numar plui alt di chei altris agns e in proporzion fra i plui alts di dute Italie. I nestris vons a jerin “salts, onescj e lavoradôrs”, ma a savevin cemût lavorâ cence fâsi mâl. E no vevin lis leçs che vuê a son par judâ cui che al à un puest di vore a tornâ a cjase la sere te sô famee. Vuê, però, e coventarès no dome la sigurece sul lavôr, ma ancje chê dal lavôr. La precarietât no jude a no fâsi mâl…
7. MANCUL BERDEIS PE SOLIDARIETÂT
Judâ chei altris al è simpri stât un biel segnâl di identitât dai furlans: tra alpins, donadôrs di sanc, volontaris de Protezion Civîl, membris di associazions, la part di popolazion che si dediche a fâ dal ben e je une vore penze. Dut ben alore? No, parcè che i volontaris a son simpri di mancul: a coventin zovins. E la burocrazie no ju jude; ur da ce fâ dibant in masse situazions.
8. UNE SANITÂT CHE E TORNI IN SALÛT
E jere une volte la sanitât di ecelence che e atirave di dute Italie pazients che a cirivin curis di cualitât e protocoi inovatîfs. Po alc si è rot, e prestazions e struturis a son ladis in mancul, colant de rive jù intes classifichis di performance dai sistemis sanitaris. Ancje se il probleme al è tacât prin, la riforme sanitarie de zonte Serracchiani no à judât. Ma cumò al sarès il moment di mendâ lis falopis di dîs agns, no di pierdi timp in discussions cence efiet. A coventin azions sveltis e concretis par evitâ ce che al sta za capitant: ven a stâi che il privât al sta gjavant ae sanitât tocs di utence simpri plui pençs. E i citadins a pain dôs voltis: une pe sanitât publiche che a doprin simpri di mancul, une altre par chê privade che e cres simpri di plui.
9. LA MESSE PAR FURLAN
Crodi o no crodi, nol impuarte: la bataie dai predis di Glesie Furlane par podê finalmentri dî Messe in marilenghe in maniere legâl e no clandestine e merete rispiet e une poie incondizionade. Parcè che e je la lote par un dirit che al è in plene sintonie cu la necessitât di une comunitât interie di pandi ducj i siei sintiments inte sô lenghe. Il film “Missus” di Massimo Garlatti-Costa lu spieghe benon: e cumò e sarès ore che la Cei e la Congregazion Vaticane no nus menin plui… pal Cult!
10. L’UDIN IN SERIE A
Pal 2019 la sperance dai tifôs blancs e neris e je di no spudâ balins come chest an. Vê cambiât il non dal Stadi Friûl in Dacia Arena fin cumò al à puartât dome scalogne. Dut câs, la impression che i Pozzo a sedin plui peâts aromai ai destins dal Watford che a chei dal Udin no je strambe. Chest an, a àn maraveât ducj cuntun coach cul non di pitôr: Julio Velasquez, però, nol à rivât a meti dongje la scuadre fate ad art che al varès volût. E cumò i tocjarà a Davide Nicola meti adun i tocs. Auguris: la serie B no se mertìn propit par nuie… ❚
Walter Tomada