La composidore cjargnele Elsa Martin e je daûr a publicâ il so ultin cd par furlan dal titul “Sfueâi”. Un lavôr che al met in musiche poesiis di grancj autôrs furlans dal Nûfcent: Pier Paolo Pasolini, Amedeo Giacomini, Novella Cantarutti, Federico Tavan, Maria Di Gleria e Pierluigi Cappello. Un lavôr a cuatri mans in compagnie dal pianist Stefano Battaglia, un dai zovins plui preseâts dal jazz e de musiche contemporanie a nivel internazionâl, autôr che al regjistre pe famose etichete Ecm. Une intese, la lôr, nassude tai laboratoris di improvisazion di diviersis masterclass e festivals in Italie e tal forest, tant di sintîsi subit e in maniere naturâl dacuardi di pensâ – e di fâ cetant ben – une antologjie dedicade ae poetiche furlane, mediant tra antighis rievocazions, gnovis sonoritâts e prospetivis musicâls.
No je la prime volte che Elsa Martin e cjante par furlan, anzit. La lenghe mari le à doprade in musiche fin di piçule, bielzà intes primis aparizions, cun diviersis vitoriis, come tal Festival dal cjant furlan tai agns Novante e, par restâ tai concors, tai ultins timps tant che coautore inte ultime edizion dal Festival da cjançon furlane tal toc di Jodi Bortoluzzi dal titul “Sunsûr”. E inmò tal so prin album dal 2012, “Verso”, cu la plui part des cjançons in lenghe furlane, par un disc che si è meretât di jentrâ in finâl aes targhis dal Premi Tenco tant che opare prime.
E cussì, dopo cetancj concierts indulà che e misclice il furlan cun altris lenghis europeanis, e un cd che si clame “Amôrs” (2016), indulà che e interprete insiemi cul pianist Matteo Andri lis poesiis furlanis di Cappello su composizion di Renato Miani, al ven il moment di une gnove esperience artistiche cun al centri la furlanetât.
“Sfueâi” – un titul ispirât di une liriche de Cantarutti che al revoche lusôrs che si pandin inte oscuritât dal cîl – al è un lavôr madûr, profont, origjinâl, produsût de famose etichete furlane Artesuono di Stefano Amerio che al crôt cetant in chest progjet. Tal 2019, a partî di Zenâr (ai 25, aes 20.45, al Teatri Gnûf Zuan di Udin), Elsa Martin e Stefano Battaglia lu presentaran in variis ocasions, cun concierts e incuintris in Friûl e ator pe Italie, cul desideri di fâsi ancje sintî tai Fogolârs Furlans dal mont.
E conte Elsa Martin che «Sfueâi al segne un gnûf cjapitul inte mê storie musicâl. Al marche une evoluzion dulà che la musiche si fâs ispirâ des poesiis, lassantsi condusi dal ritmi dentri des peraulis e dai lôr significâts. E je une maniere gnove di componi, che si slontane de forme tradizionâl di cjançon par vierzisi a formis plui grandis e articoladis. Tant spazi a àn lis improvisazions estemporaniis, il zûc cul pianisim ispirât di Stefano Battaglia, grant amant dal Friûl e viert a di une vision meta e multiculturâl, un mût di jessi che la nestre tiere e à tal sanc di simpri».
Su pe sielte dai poetis e des poesiis di cheste antologjie: «A son stâts i lôr sunôrs a clamânus, lis risonancis dai lôr mots – e conte Martin -. Cui pe sô luciditât, cui pe sô inocence, cui pe sô folie, cui pe delicatece, tant di creâ un mosaic costruît su la art di ceselâ bielis peraulis su notis cressudis de stesse semence». Di Pasolini “Cjant da lis cjampanis” e “L’aunâr”, di Giacomini “Prejere”, de Cantarutti “Canaa su la puarta” e “Sfueâi”, di Tavan “Sumiant la religion”, de Di Gleria “Anin a gris”, di Cappello poesiis par talian: “La Luna e la farfalla” e “Elementare” da “Ogni goccia balla il tango”. Un album di vê e di scoltâ. ❚
Alessio Screm
