Economie sdrumade. Tant che un secont taramot

La uniche consolazion e ven dal export,
ma e je bisugne di tornâ
a inviâ il marcjât interni

No lu dîs nissun, ma sul nestri Friûl tai ultins dîs agns si è discjadenât une bissebove di chês mai viodudis. No stin fevelant dal cambiament de clime, ma purtrop dal davoi de nestre economie: sigûr detade di un orizont globâl, ma che in Friûl e à vût un efiet cussì devastant che o podaressin considerâlu tant che un secont taramot, che magari no si lu viôt, ma si sint, massime tes sachetis. A jessi sdrumade no je la struture urbanistiche des nestris citâts, ma la colone fondamentâl de societât furlane: il lavôr. Intai agns dal 2004 incà, a son 15 mil lis impresis che a àn sierât barache (di 110 mil a 95 mil, cuntune flession dal 12 par cent), e ancje se dopo il jobs act cualchidun nus conte che i puescj di vore a saressin tornâts chei di prin, vuê a son soredut a tiermin e ancje a cundizions no simpri dignitosis. I ultins dâts a fevelin di une incressite dal 18 par cent dai contrats a timp indeterminât tal 2018. Al sarès un biel segnâl, cuintribelançât di 3 mil puescj di vore in mancul tai prins 3 mês dal 2019, ma nol baste a gjavâsi la sensazion che, come che al disarès William Cisilino, “o sin dal gjat”. I furlans lu capissin e no si contentin des storiis che ur vegnin contadis di sorestants interessâts a cuietâ lis aghis: di fat, il lôr judizi ju vuide a vê une spiete une vore plui basse di chei altris talians a pet dal avignî, parcè che si cjalin ator e a viodin che in pôc timp la lôr cundizion no je lade in miôr, il podê di spese al è lât in mancul, il lavôr – se al è – al è decualificât e precari, e i lôr zovins a tornin a jessi libars di scugnî lâ.
Se un al vûl vê la idee dal cataclisme economic di chest periodi – che o rifletarìn di chi indenant su lis pagjinis da La Patrie dal Friûl -, bastarès cjalâ la edilizie dulà che la crisi e à brusât 7 mil puescj di vore dal 2008 al 2016, cuant che si è rivâts al pont plui bas de storie des costruzions in Friûl in tiermins di ocupazion. Siet mil personis a son restadis par strade: 1200 impresis no son plui. Tai ultins doi agns alc al è cambiât, ma se o tignìn cont dal indot, i efiets ocupazionâi a laressin dopleâts.
Fevelant di bêçs e di stipendis, un scrutini recent al à tamesât i salaris dai furlans e al à disvelât che 1 su 5 al cjape mancul di chel che al previodarès il gnûf “redit di citadinance”. Cuissà se cheste int e cjaparà la gnove misure tant che un sburt a lavorâ o une pussibilitât di vuadagnâ puçant fadie?
Dal rest, ce lavôr ur vegnial ufiert intune regjon che tal periodi dal 2008 al 2018 e à vût la diminuzion di Pil plui alte di Italie, il 8,2 par cent? E dulà che denatalitât e cressite de etât medie de popolazion a crein une atmosfere di declin, dulà che si prodûs pal forest parcè che chenti nissun al compre e par lavorâ al covente adatâsi a servizis e turisim?
Il terziari, dal 2009 incà, al è di fat un dai pôcs setôrs che al à tignût, stant ai dâts che a vegnin proferîts de Confcommercio che e dîs cun braùre che al è in cuintritindince. «Se in chei altris setôrs il numar des impresis al è calât in medie dal 19 par cent intai ultins dîs agns, la stabilitât dal terziari e je dal sigûr un segnâl positîf», a disin i siei dirigjents. Par fâ un esempli, intal 2018 in Friûl-Vignesie Julie a son nassudis 5450 impresis e a ‘nt son muartis 5750. Il belanç al è di 300 impresis sieradis in plui di chês che a vegnin viertis: l’unic setôr dulà che invezit i conts a van in miôr al è il terziari, che al cres di 419 unitâts (3984 gnovis impresis cuintri 3565 muartis). La crisi dal compart e je finide tal 2015: al è di chel an che la riprese dal terziari no si è plui fermade. Ma il rest des ativitâts economichis al mostre une situazion une vore problematiche, e ancje se il terziari al cres, dome une su 8 des assunzions a timp indeterminât in regjon tal ultin an e je stade fate di aziendis di chest setôr. Dulà che la precarizazion, prin di dut tal turisim, e je sovrane.
La provincie plui colpide de murie di impresis e je dut câs, propit cemût che o volìn dimostrâ, chê di Udin: e i dâts lu disin a clâr. In dîs agns, il diferenziâl di 194 impresis in mancul al è il plui alt de regjon: Gurize e ven daûr cun 100, Pordenon al ten ancjemò bot cun 53. La uniche provincie dulà che il numar des impresis al aumente e je Triest, cun 47 unitâts in plui.
Ce che al unìs lis dôs dimensions e je la contrazion dai rigjâfs che di dutis lis bandis de regjon a van in piês. Stabile e je la dibisugne finanziarie, la necessitât di lâ des bancjis par vê bêçs in prestit. A son dome 7 su 10 lis aziendis che a rivin adore a scuedi alc, ma par chês altris 3 il credit al reste un sium. Cun di plui, lis istrutoriis e i servizis bancjariis a costin di plui, a vegnin domandadis plui garanziis, la burocrazie e je plui penze e e slungje i timps. Si son scurtâts invezit, e cheste e je une buine gnove, i timps di paiament: ma se i bêçs che si tirin dai clients a son di mancul, parcè che no si vent plui come une volte, la consolazion no je cuissà ce. Sul credit nol è di dismenteâ ce che al è sucedût tai ultins 10 agns cui câs de Popolâr di Vicence e di Veneto Banca; e par no fâsi mancjâ nuie, chenti ancje la CoopCa e à lassât une vore di int cence un carantan, e il setôr de cooperazion nol à vût par sigûr benefici di cheste vicende.
Pal rest, lis lûs a vegnin simpri indevant insiemi cu lis contradizions. La abdicazion de Regjon su setôrs tant che il len e la energjie no à permetût di fâ cressi la ocupazion e di disvilupâ (a part esemplis ancjemò limitâts) filieris che a rivassin a vê un efiet positîf su dute la economie. L’agroalimentâr al ten dûr, cun câs di ecelence tant che il persut di San Denêl e di Sauris, ma a son ancje areis dulà che la dinamiche e je plui clopadice, come chê dal lat.
La uniche consolazion e ven dal export, che al è deventât une carateristiche di dute la economie taliane ancje se cumò i nivei di esportazion a son calâts une vore di cuant che la Italie e espuartave plui dai britanics e, soredut, de Russie. Vuê nol è plui cussì, ma la Italie e reste un colòs de produzion che tai agns al à viodût a colâ a tocs il marcjât interni e duncje e risierve al cumierç cul forest une cuote simpri plui penze des sôs transazions. Si fevele di 450 miliarts di euros: di chescj 15,6 a vegnin dal Friûl-Vignesie Julie. Ancje tal 2018 lis esportazions a son cressudis dal 5,9 par cent, e al è za il cuint an che il volum des venditis di là dal confin al cres. Udin al cres dal 10,3 in fuarce di siderurgjie, machinaris e mobii, Triest dal 9,1 massime pe cantieristiche. Nol cres invezit l’export agroalimentâr e al è un parcè: baste cjalâ lis rotis di chest cumierç par capilu. Di fat, al cres il volum dai scambis cu la Union europeane (9,6 par cent in plui) e la Americhe (11,4) e soredut cu la Cine (27,3). Flession invezit pe Gran Bretagne par efiet de Brexit (-1,1 par cent) e gruesse diminuzion dal trafic cu la Russie (22,8 par cent in mancul) par colpe dal embarc. Stant che la mangjative e il vin furlan a vevin di tradizion une vore di estimadôrs in chest paîs, si capìs parcè che il setôr al clope.
Ce saressial il Friûl se al ves di produsi dome pal marcjât interni? No son lontans i timps che inte zone industriâl di Riui di Osôf si produseve pal 95 par cent pe Italie e il cumierç cul forest nol jere cuissà ce. Al jere il 1970, e chel distret che al ocupave 600 dipendents dopo dal taramot al fo un dai motôrs de rinassite. «Prime lis fabrichis, po lis cjasis», si disè: 40 agns dopo, la polaritât si è invertide e vuê si stime che la aree, che e à slargjade di 4 voltis la sô fuarce lavôr rivant a 2400 dipendents, e risiervi al forest il 70 par cent de sô fuarce produtive. Al è dome un esempli di trop che la economie furlane si è votade ae internazionalizazion, e tai ultins 10 agns l’export nol è mai lât sot dai 10 miliarts di euros (tal 2009). Dai 11,4 miliarts dal 2013 fintremai a vuê, la incressite e je lade indevant cence mai fermâsi. Covente mantignî cheste tindince che nus viôt al top intal panorame talian: ma e je ancjemò di plui bisugne di tornâ a inviâ il marcjât interni. No sarès par nuie une brute idee, parcè che al è avonde clâr che no si podarà vivi par simpri dome di esportazions. ❚
Walter Tomada