Une flabe contemporanie cuintri de maluserie dal mont di vuê

«Ta chest lavôr, che al è une ode al amôr,
si metin in discussion i stereotips
dai rûi dal om e de femine»
Nol è facil di cjatâ un rimpin salt in cheste ete di riferiments simpri plui svoladis, cun istituzions sflacjonis e principis svuedâts di contignûts. Fintremai il mont culturâl e chel artistic a fasin di spieli a di cheste flaperie, cemût che al mostre il nivelâsi des propuestis e il va e ven di nons di grups e di autôrs di atrat scjars. No cate dut, a cjalâ ben, si cjate ancjemò cualchi oasi indurante che e resist aes bugadis dal nuie, sedi tal grant desert dal mont, sedi tes splazis plui piçulis, cemût che al podarès jessi il nestri Friûl. Cussì, se si fevele di teatri par furlan, al è facil che lis vuestris orelis si drecedin subit bande Grediscje di Sedean e che il cjâf al ledi ai “fantats” (Fabiano Fantini, Claudio Moretti, Elvio Scruzzi) dal Teatro Incerto, formazion storiche che di cuasi cuarante agns e puarte in sene i siei spetacui, cuntun sucès garantît di public e di critiche. De tonie di predi al mus dal don Chisciotte, de monture di alpin al tabâr invernâl, a son pardabon tancj i vistîts che i trê atôrs si son metûts intor par cumbinâ une baronade simpri gnove e diferente, cul efiet di une comicitât spontanie e esplosive, di ridi a plene panze, cence, però, lassâ in bande la riflession su temis cetant delicâts e impegnatîfs.Ancje il spetacul che al debutarà dentri dal circuit dal Ent regjonâl teatrâl dal Friûl-Vignesie Julie (prime ai 30 di Març a Sedean, replichis ai 31 di Març a San Vît dal Tiliment e ai 13 di Avrîl a Cjamin dal Tiliment), “Fieste”, al nas di une constatazion tragjiche de esistence umane dai nestris dîs, indulà che il mont al somee colât sot dal jôf de violence e la int e à pierdude la strade o ben e à lassât di lotâ, intun clime di depression e di demoralizazion che forsit nol à precedents. Il protagonist Francesco (Fantini), di fat, al à a pene pierdût il lavôr e cheste cundizion lu à puartât a jentrâ in crisi ancje tal rapuart di cubie, che al è daûr a sfiliâsi par vie dal so orgoi. La dì dal so 60m complean, doi scognossûts un pôc scalembris (Moretti e Scruzzi) a jentrin te cjamare dal B&B li che al è a stâ di cualchi timp, cu la scuse di une fieste pal inovâl. Al tache cussì un viaç dentri des pôris e dai turbaments dal personaç, intun scandai dal om che, stiçât dai doi agnui-spirfolets, al cîr di tornâ a cjapâ in man la sô vite e la sô felicitât.
Il test al cjape la imboconade di “Il procès” di Kafka, ma massime di “Il complean” di Pinter, cun situazions paradossâls e un pôc fûr dal vade, cemût che dispès si viôt tai lavôrs dal Incerto.
«Pinter al è un dai autôrs di fonde de nestre dramaturgjie, che e va scuasit a lenzi l’assurt, ma che e lasse simpri un alc di enigmatic e tantis domandis cence rispueste. Nô lu interpretìn te nestre maniere, ma o lassìn simpri che il public si fasi ancje une idee sô», nus conferme Moretti.
__
Trop dificil isal puartâ al public messaçs ancje dramatichis midiant de comicitât?
«L’aspiet dramatic al è un teme che o vin simpri metût in sene, ta ducj i spetacui precedents. Al è clâr che la trasposizion teatrâl e puarte a une amplificazion e a une dimension grotescje. Al è come cuant che un si inçopede e al cole par tiere: il prin mot par un che al cjale al è chel di metisi a ridi, cence pensâi ae gravitât pussibile de situazion. La nestre e je une cifre recitative, une maniere di contâ storiis, che e puarte ae comicitât ancje par vie dal ritmi, de energjie e dai caratars che o lin a rapresentâ. Magari la int e pues dî che il nestri mût di recitâ al è simpri compagn, ma par nô ogni spetacul al è diferent, cun dinamichis che a cambiin dal dut e costruzions dai rûi che a mudin in maniere drastiche; duncje, ancje nô o sintìn e o vivìn in maniere divierse ogni nestri personaç».
__
Cemût ise colade la sielte des parts cheste volte?
«Fabiano al è il deprès, l’om esaurît, che al è ancje il simbul di dute une umanitât in crisi denant de matetât de societât contemporanie. Jo e Claudio, invezit, o sin i doi agnui che, midiant de nestre nature di clown (Claudio “diretôr”, paron e mostacjin; Elvio “august”, un pôc sdavasson e ingjenui), o puartìn in sene la vôs de cussience dal personaç», nus conte Scruzzi.
__
A proposit di vôs, Fabiano, tu che tu âs vût lavorât ancje difûr dal Friûl: parcè esistial ancjemò il Teatro Incerto dopo tancj agns? Cuale ise la sô fuarce?
«L’Incerto al esist ancjemò parcè che al à cjatade une sô identitât precise, in relazion ae int che i sta ator, e al à maduride une cussience dal sintî di chest popul, che al è chel furlan. O metìn in sene personaçs che il spetatôr si ricognòs tes lôr storiis, intune comunitât di riferiment che o cognossìn ben e che duncje nus da la pussibilitât di fâ teatri intune maniere dal dut particolâr, in gracie dal rapuart di confidence e di intimitât che o vin tiessût tai agns cul nestri public. Cun di plui, nô trê si cognossìn di fruts e o recitìn intune lenghe, chê furlane, che e je chê che o vin imparât par prime e che o doprìn di istint par esprimisi. Il talian al è vignût dopo e nol pues rindi te stesse naturalece e imediatece ce che o vin voie di rapresentâ».
__
E in chest câs, cuale ise la morâl dal spetacul che o sês daûr a meti in sene?
«Chest lavôr al è une ode al amôr, une flabe indulà che si metin in discussion i stereotips dai rûi dal om e de femine», al tache Elvio. «Ae fin, di fat, il protagonist si metarà di gnûf in discussion par salvâ il so rapuart. Ve ca, se o vessin voie di doprâ une cjançon di Fossati, culì o sin denant di une “ricostruzion di un amôr”. O vin volût dâ un messaç positîf pal avignî, che e esist ancjemò la sperance par un doman miôr e che l’amôr al pues vinci su la gangrene di chest mont malât».
Fabiano al zonte: «Il nestri spetacul, dut câs, nol è un lavôr su la depression, ma ben sul cambiament, sul passaç di une cundizion a di une altre, e sul stimul a cjatâ stradis gnovis. Al è une sorte di sburtade a agjî, parcè che, a vê voie di cirî, al è simpri alc di gnûf che nus spiete. Nuie al è pierdût: ancje se un al à passât i 60 agns e al è restât cence lavôr, al pues simpri riscuvierzi un sens». ❚
Serena Fogolini