Stop ai furbits dai sportei pal furlan

Vonde fonts de leç 482 ai Comuns:
la situazion, però, le pain chei virtuôs

Intal lôr periodi di splendôr massim a jerin rivâts al numar consistent di une setantine. Cumò, pai sportei comunâi pe lenghe furlane e je rivade ae fin une cure dimagrante drastiche, che e veve intai agns za ridusût il numar a di une cuindisine. La Regjon e à decidût di fat di sierâ ai Comuns lis spinis dai finanziaments de leç di tutele des lenghis minoritariis (i fonts de 482/99 a son calâts intal timp di 1,5 milions l’an a 350 mil). Fonts cumò concentrâts sui sportei regjonâi pe lenghe furlane gjestîts de Agjenzie Regjonâl pe Lenghe Furlane che, in graciis di cheste decision, in plui de sede centrâl di Udin, a àn viodût la viertidure dai 4 di Fevrâr passâts di 4 sedis periferichis a servizi di ancjetancj ambits gjeografics: a Tumieç, tal municipi, tant che riferiment par dut il Friûl de Alte; a Muçane, li de biblioteche civiche, pe Basse furlane e pal Agri Aquileiês; a Gurize, tal municipi, pal Friûl Orientâl; e a San Vît dal Tiliment, li de biblioteche comunâl, pal Friûl Ocidentâl. Il sportel centrâl al à, invezit, sede a Udin, e al è competent ancje pal Friûl Centrâl, par Udin e pal so hinterland.
Il motîf di cheste strente? La plui part dai Comuns e à doprât in maniere improprie i finanziaments de leç 482. A son stadis assumudis personis che a varessin vût di lavorâ a pro de lenghe e de culture furlane e invezit a son finidis a dâ rinfuarç a altris servizis comunâi, fasint – intal miôr dai câs – di bibliotecaris zontâts e – intal piês – di sporteliscj dal ufici protocol. Cuntun dopli risultât negatîf: indebilî la politiche linguistiche e slontanâ operadôrs pardabon motivâts a lavorâ pal furlan. Un brut esempli che, si à propit di sotlineâ, al à rivuardât intai agns un grant numar di Comuns, ma no ducj. Sul teritori a son esemplis di ecelence di sportei comunâi o intercomunâi pe lenghe furlane che cumò a vegnin penalizâts par colpe des “pomis patochis”, ma che, al è propit di sperâ, passât un periodi di selezion naturâl (dome i Comuns pardabon motivâts a son daûr a finanziâ cun fonts propris la continuitât dai sportei), a puedin cjatâ di gnûf un supuart economic, se no plui dal Stât cu la leç 482/99, almancul de Regjon. E par chest, intal articul in bas, o vin volût presentâ cualchi esperience positive, sperant che e puedi vê la poie juste.
Ancje parcè che i sportei de ARLeF a àn obietîfs precîs e ambits gjeografics tant amplis che si va a pericul di pierdi il lavôr capilâr fat cul tiessût culturâl locâl dai sportei comunâi. I servizis ufierts di ogni sportel ARLeF a tocjin in particolâr la consulence linguistiche e la traduzion scrite dal talian al furlan di tescj, cu la finalitât di garantî l’ûs tai ents stes de lenghe furlane; la consulence su la toponomastiche in lenghe furlane pai ents che a vedin dibisugne di aplicâ la cartelonistiche stradâl e la insegnistiche in gjenar, e par garantî il rispiet plen dai toponims uficiâi fissâts dal D.P.Regj. n. 16 dai 13/02/2014; la informazion e l’orientament al public.
Il sportel centrâl, cun di plui, al ufrìs tra i tancj servizis ancje il supuart intes ativitâts di politiche linguistiche e di promozion de lenghe furlane de bande de Regjon e dai ents locâi. Al garantìs ancje la assistence inte ativitât di verifiche e di valutazion dal stât di aplicazion dal insegnament e dal ûs de lenghe furlane intes istituzions scolastichis. Al davuelç infin il servizi di interpretazion simultanie in lenghe taliane dai intervents fats par furlan dilunc des sentadis dal Consei regjonâl. ❚
Roberto Pensa