Fieste de Patrie, fieste di dut il Friûl

E je la ocasion par valorizâ la identitât plurâl e inclusive
nassude de coesistence di culturis diviersis su chestis tieris
Ancje chest an la Fieste de Patrie dal Friûl e je ricuardade cuntun program siôr di apontaments su dut il teritori che al faseve part, par memoreâ lis origjins e la storie di autonomie dal popul furlan, ma ancje valorizâ la identitât plurâl e inclusive nassude de coesistence di culturis diviersis su chestis tieris. Il Stât patriarcjâl al cjapave dentri, di fat, un teritori composit e policentric: e vuê tant che une volte, il Friûl dut al pues cognossisi ta cheste ricorence.
Tant che sede de Fieste de Patrie dal Friûl 2019, 942 agns dopo de nassite dal Stât patriarcjâl furlan, e je stade sielte Gurize. L’event al è programât par domenie ai 7 di Avrîl, cuant che i partecipants si cjataran in place Vittoria, aes 9.45, par assisti ae esposizion de bandiere dal Friûl. L’acompagnament musicâl al vignarà fat dal grup bandistic “Tita Michelàs” di Flumisel, diret dal mestri Giorgio Cannistrà. Dopo, la bande e acompagnarà il corteu fin te glesie di San Roc, dulà che i delegâts des trê diocesis di Gurize, di Udin e di Pordenon a celebraran la messe par furlan cun leturis e preieris ancje par sloven e par todesc. La celebrazion e sarà acompagnade de corâl parochiâl “Santa Lucia”, direte di Giada Piani.
Po dopo e sarà la cerimonie civîl, li de sale “Incontro” de parochie di Borc San Roc dongje de glesie. L’event al scomençarà cul imni dal Friûl “Incuintri al doman”, sunât dal cuintet feminin ArteVoce Ensemble; subit daûr al sarà il scambi de bandiere dal Friûl che e vignarà consegnade al sindic di Gurize di un rapresentant dal Comun di Voleson Darzin, che al veve ospitade la Fieste intal 2018. E sarà dade po dopo leture de bole dal imperadôr Indrì IV, che e rapresente l’at di fondazion de Patrie dal Friûl, e daûr al vignarà il salût des autoritâts.
La cerimonie e sarà ancje la ocasion par premiâ lis scuelis de infanzie, primariis e secondariis di prin grât che a àn vint il concors a premis “Emozions furlanis in viaç pal teritori”, promovût dal Ufici scolastic regjonâl adun cu la Agjenzie Regjonâl pe Lenghe Furlane, che al è rivât ae otave edizion. L’event si sierarà cui tedofars de Stafete pal Friûl, partide a buinore di Marian, che a rivaran in sale par consegnâ in maniere simboliche al sindic di Gurize la bole imperiâl che lis scuadris partecipantis – un centenâr di coridôrs – si son scambiadis tant che testemoni.
Cun di plui, dopomisdì a son programadis lis visitis vuidadis gratuitis ae sinagoghe e al ghet ebraic. Si cjatisi aes 15 e aes 15.45 in vie Ascoli, 1 (denant di Cjase Ascoli). Al covente, però, prenotâ dentri dai 3 di Avrîl, contatant il Sportel Regjonâl pe Lenghe Furlane – Friûl Orientâl, tel. 0481/383451, email: orient@sportelfurlan.eu
Come ogni an, lis celebrazions de Fieste dal Friûl a son inricjidis di un calendari impuartant di events promovûts dai Comuns che a àn aderît al bant promovût de ARLeF, in atuazion de Leç n. 6/2015 pe poie aes manifestazions culturâls che a acompagnin la ricorence. Il stes Comun di Gurize, che al ospite la cerimonie uficiâl, al propon un calendari fis di iniziativis fin ai 11 di Avrîl. Par cognossi il program detaiât dai events organizâts in dut il Friûl – rapresentazions teatrâls, concierts, presentazions di libris e tant altri ancjemò – si pues consultâ il sît internet de ARLeF ae direzion www.arlef.it ❚
par cure de redazion