INTERVISTE. Zilli: «Il Friûl-Vignesie Julie nol è plui il bancomat dal guvier»

Ridusût di plui o mancul un tierç il disvantaç
cu lis speciâls dal Nord. La assessore Zilli:
«E no podaran domandâ altris bêçs»
Un tai dal 13,79 par cent dal prelêf straordenari dal Stât aes financis dal Friûl-Vignesie Julie par fâ front al dissest dal belanç statâl, che al cale dal 14,5 par cent al 12,5 par cent; la riduzion di plui o mancul un tierç dal disvantaç negatîf cul stes prelêf imponût aes Regjons e Provinciis autonomis dal Nord, e di plui o mancul un cuart cun Sicilie e Sardegne. Cu la zonte di garanziis impuartantis che intal trieni prossim no saran altris prelêfs straordenaris dal Stât, e cu la viertidure di un confront pal aument dai decims de Ivz (o ben, chê che par talian e je la Iva) che a restin in Regjon, e in merit ae autonomie impositive su lis impuestis sui imobii. La assessore regjonâl al Belanç Barbara Zilli, cun fermece e realisim, e difint cussì des critichis di pocje incisivitât (esprimudis ancje di chestis colonis intun coment di Walter Tomada) l’acuardi Fedriga-Tria che al à sostituît il Serracchiani-Padoan: il probleme nol è ciert risolt, però si è metude une piere miliâr par un cambi di tindince e par un gnûf inlineament cun chês altris Regjons speciâls.
__
Assessore Zilli, prime di jentrâ intal merit dal acuardi resint cul ministri dal Belanç Tria, cuâl isal il so judizi tecnic e politic su la situazion che la zonte Fedriga e à cjatât, tal moment dal so insediament, in merit ai prelêfs straordenaris al belanç dal Friûl-Vignesie Julie par fâ front aes dificoltâts finanziariis dal Stât? Cualchi analisi e mostre ca di nô un prelêf cuasi dopli a pet de medie di chês altris Regjons a statût speciâl.
«Intune analisi che o ai comissionade ai miei uficis, al risulte che in prospetive, intal trieni 2019/2021, su la fonde di ce che al è stât previodût dal acuardi Serracchiani-Padoan, e sarès une percentuâl di prelêf straordenarie dal Stât dal 14,75 par cent, cuant che la Sicilie e varès il 6,57 par cent, la Sardegne il 7,39 par cent, la Provincie di Bolzan il 9,60 par cent e chê di Trent il 8,65 par cent, e la Val di Aoste il 8,84 par cent. Il probleme che si sin cjatâts a frontâ al è stât cemût esercitâ miôr la nestre specialitât. O sin une Regjon virtuose, che e gjestìs in maniere autonome materiis une vore impuartantis tant che la sanitât. Su chest o vin fate une analisi puntuâl. Se prime dal 1997 il rapuart tra ce che o cjapavin dal Stât e ce che o metevin cul nestri belanç al jere di 70 a 30, vuê il rapuart al è ribaltât. Par chest, si sin impegnâts une vore tal frontâ il probleme».
__
Di Monti incà, i guviers talians a àn calcolât lis Regjons, e in particolâr chês speciâls, tant che un bancomat di indulà drenâ risorsis par fâ cuintri aes dificoltâts statâls di belanç. Cul guvier zâl e vert e cul ministri Tria, ce atmosfere vêso cjatât? Aie la impression di une plui grande considerazion dal Friûl-Vignesie Julie a Rome?
«E je stade une dialetiche dure, parcè che o vin vût di fâ saltâ tancj preconcets. Forsit cualchidun prime di nô no si è impegnât avonde su chest front, dut câs a Rome e prevâl la idee che lis Regjons speciâls a rapresentin situazions di privileç. O vin batût i pugns su la taule e menaçât un ricors ae Cort costituzionâl. Cuant che o sin lâts a aprofondî la situazion cui dâts te man, la disposizion dal guvier e je cambiade, ancje parcè che e je intervignude la sentence 6 de Consulte a pro de Sardegne che e à ribatût canui finanziaris tant impuartants pe tutele des autonomiis diferenziadis».
__
Il president Fedriga al à fevelât di un “scont” di 834 milions di euros che a puartin a pôc mancul di 2 miliarts il contribût straordenari dal Friûl-Vignesie Julie al dissest finanziari dal Stât: no si podevial fâ di plui?
«In complès, si recuperarà une part significative dal disvantaç negatîf cun chês altris Regjons speciâls. Pal 2019, plui o mancul il 2 par cent sul 14,75 par cent totâl previodût dal acuardi precedent Serracchiani-Padoan. Pal president Fedriga, pe sô zonte e pai miei uficis chest al è stât l’impegn principâl dal moment che si sin insediâts. E o sin une vore sodisfats pal risultât otignût de nestre comunitât regjonâl. Di là dal scont di 834 milions, dai invistiments garantîts dal Stât in Friûl-Vignesie Julie par 400 milions te sanitât, pes stradis, pes scuelis e tant altri, al è l’inviament impuartant de taule pal ricognossiment dai 9 decims su la Ivz e la introduzion de potestât impositive sui tribûts imobiliârs locâi. Al sarà un esercizi di autonomie tributarie che al mancjave. Si podaran sielzi a nivel locâl alicuotis, cundizions, esenzions de impueste».
__
Intal gnûf pat Fedriga-Tria al è dentri ancje il stop a eventuâi gnûfs prelêfs straordenaris intal trieni 2019-2021. Cuale ise la valence di cheste clausule?
«Inte leç di belanç, il Stât si jere risiervât il dirit di decidi in maniere unilaterâl gnûfs prelêfs in câs di dibisugnis gravis de finance publiche. Intai acuardis fats cun altris Regjons speciâls, si è rivâts al compromès dal “10+10”. Il Stât al pues imponi un altri 10 par cent di prelêfs e al pues fâlu une altre volte par un adizionâl 10 par cent par rispuindi a necessitâts che a derivin di esigjencis di politiche europeane, però rivant a un acuardi cu la Regjon. Intal acuardi Fedriga-Tria, invezit, il Stât al podarà fâ intervents straordenaris se – e dome se – la nestre percentuâl di prelêf e sarà inte medie di prelêf di chês altris Regjons speciâls. Insume, il Stât al varà di lâ prime a tucâ te puarte di cui che al à dât fin cumò di mancul, e dome dopo al podarà indreçâsi a nô. E je une grande concuiste di ecuitât e di autonomie. Duncje, o sin tant fiduciôs che intal trieni prossim no saran prelêfs straordenaris, parcè che dut câs a vuê la disparitât a nestri disavantaç e je cussì grande che e rint chest fat improbabil».
__
Leìnt la liste des normis di atuazion ai statûts speciâi regjonâi aprovadis inte legjislature parlamentâr passade, e maravee la esiguitât e la pocje incidence di chês che a tocjin il Friûl-Vignesie Julie. Secont jê, cuale ise la cause? Pocje eficacitât de Comission paritetiche di prime (rinovade di pôc)? Sumission ecessive dai partîts locâi aes segretariis romanis? O sono ancje fatôrs “sistemics”? Par esempli, il fat che lis diviersis realtâts teritoriâls che a componin la regjon (Triest e un Friûl cence une strategjie globâl par vie che al è dividût di egoisims teritoriâi) impedissino di presentâ a Rome domandis claris e univochis?
«Po stâi, ancje se o pensi che la nature composite de nestre regjon e sedi une cjarte di zuiâ in positîf intai nestris rapuarts cun Rome. Intal dibatiment politic nazionâl si domandisi par cuâl motîf che lis autonomiis speciâls a àn di sorevivi. Ca di nô la presince des minorancis linguistichis e à di jessi un pont di fuarce, in plui de posizion di confin. O vin di fâ capî al guvier lis potenzialitâts di caratar economic e culturâl che a vegnin di un teritori cussì composit. O vin di fâ capî che no sin perifarie dal Venit, ma alc di tant di plui che nus rint braurôs. La Paritetiche, in chest contest, e à di jessi une casse di risonance di chestis potenzialitâts, e un colegament reâl cul teritori. Cui gnûfs components de Paritetiche, o vin la ambizion di creâ un rapuart tant plui strent cui assessôrs par fâ in mût che i indreçaments che a son stâts licenziâts dal Consei regjonâl a deventin concuistis concretis. Al sarà un supuart politic de bande de zonte regjonâl par agjevolâ il rapuart tra la Paritetiche e i ministeris par acelerâ i trasferiments di competencis dal Stât ae Regjon».
__
L’asset istituzionâl talian al podarès cambiâ muse in curt cu la aplicazion, ancje se cun cuasi 20 agns di ritart, des autonomiis diferenziadis aes Regjons ordenariis, previodût dal articul 116, tierç come, de Costituzion, introdusût de riforme dal 2001. Par Venit, Lombardie e Emilie-Romagne a son za pronts stampons di intesis che a previodin trasferiments di competencis, personâl e risorsis de bande dal Stât. Di fat, però, dutis lis regjons dal Nord e la maiorance di chês dal Centri a àn za tucât te puarte dal guvier par otignî ancjetant. Cemût calcolie cheste evoluzion: un pericul o une oportunitât pal Friûl-Vignesie Julie? Podaressino patî intal prossim futûr une plui grande competizion teritoriâl cul Venit, par esempli sui incentîfs aes impresis?
«No soi zelose des domandis di plui autonomie di bande di altris teritoris, parcè che no gjavin nuie ae nestre Regjon. Dulà che al è un esercizi virtuôs de aministrazion, dut il Paîs al cjate zovament. Si jemplisi dispès la bocje di autonomie, ma no simpri si rive a fânt capî il valôr. Se o lin a concretizâ ce che la nestre specialitât nus permet intai rapuarts cun Rome, no soi propit preocupade. Lu dimostre l’acuardi Fedriga-Tria: il jessi escludûts di prelêfs straordenaris futûrs di bande dal Stât, la concession di spazis di autonomie impositive che a puedin deventâ fatôrs clâf intal atrat des impresis a son fats concrets che a dimostrin che la specialitât e da une marcje in plui. Zontìnji dopo il rûl di Friulia, une finanziarie che ducj nus invidiin in Italie pe sô capacitât di atrai gnûfs invistiments e pe poie ae piçule e medie imprese. O soi convinte che no varìn dificoltât cul vicin Venit, che cun chel o podarìn invezit fâ masse critiche par rilançâ il Nordest».
__
In chestis intesis cu lis Regjons ordenariis si torne a fevelâ de introduzion dai coscj standard par cuantificâ i trasferiments dal Stât aes Regjons pes funzions delegadis: sino pronts a frontâ un sisteme simil che al premie lis Regjons plui eficientis, no dome a peraulis, ma intai fats e intai numars?
«O sin ben cussients che e je inmò strade di fâ par aplicâ un sisteme come chel dai coscj standard, e che al è un disvantaç a pet des Regjons plui disvilupadis tant che Venit e Lombardie. Chest al è palês, par esempli, intal cjamp de sanitât, dulà che il percors di riforme si è fermât massime pes rigjiditâts internis dal sisteme. O vin creade la aziende zero propit par fâ une centrâl uniche di control dai coscj, par dâ ai citadins no dome prestazions ecelentis, ma ancje sostignibilis dal pont di viste economic. No sin plui in timps là che il cost de machine publiche al pues jessi alt».
__
Il rinovament de Comission Paritetiche al à fat saltâ fûr tantis ipotesis di domandis di competencis di puartâ a Rome. Tant che assessôr al Belanç, cuale viodie plui percoribile in tiermins di plui autonomie, compagnade, però, di garanziis di sostignibilitât finanziarie? Chê plui indicade, la istruzion, cemût le valutie?
«E je une ipotesi une vore sugjestive, ma ancjetant impegnative a nivel di risorsis e di organizazion. Mi domandi duncje in maniere prudente se il Friûl-Vignesie Julie al rivarà a di un risultât in chest intindiment. E je une sfide grande, un cjaval di bataie pe zonte Fedriga, ma di misurâ cun cautele e cun ponderazion. Il fat che altris Regjons, ancje ordenariis, a reclamin cheste competence primarie, nol podarà che judânus. Intal imediât, però, o pensi massime aes Bielis arts, ae pussibilitât che la valorizazion di chest patrimoni straordenari e vegni gjestide in maniere direte in regjon. O soi convinte che o podaressin vê une valorizazion plui al pas cui timps di chest patrimoni che se di no al va a pericul di restâ un pontut intal patrimoni artistic talian. A nivel di ricjadudis economichis, ma ancje culturâls e di istruzion, al deventarès un element di grant impuls ae cressite. O sarès contente di podêlu fâ in cheste legjislature». ❚
Roberto Pensa