Ce vuelial dî jessi zovins creatîfs intune lenghe minorizade? E trop contial il teritori, la culture di apartignince, che la lenghe minorizade e je simbul, intal disvilup de lôr identitât e de lôr produzion artistiche? Cemût si leino lis lidrîs culturâls cu la bisugne di inovazion, di contaminazion? Ator di chestis domandis si disvilupe Int/Art, seriis di documentaris che a contin storiis di zovins artiscj furlans, ideâts di Dorino Minigutti e Giorgio Cantoni, realizâts di Agherose cul contribût de Agjenzie Regjonâl pe Lenghe Furlane e dal Fonts audiovisîfs Friûl-Vignesie Julie.
La tierce serie e je dedicade a cinc protagoniscj de art performative (teatri, danze contemporanie, performances, arts dal mont dal circ e dai gaugars): Aida Talliente, regjiste e atore teatrâl; Federico Scridel, atôr; Martina Tavano, balarine e coreografe; Davide Perissutti, artist des arts dal circ; Anna Gubiani, dramaturghe.
Lis pontadis a van in onde su Rai 3 la domenie aes 10.30, cun repliche il miercus aes 22.05 su Rai 3 bis (canâl 103), fin ai 28 di Avrîl, cun repliche il prin Mai. ❚
Redazion