Chest an a son cuindis agns di chel che i disin Big Bang Enlargement, cuant che la Union Europeane e à dât acet a ben 10 gnûfs Stâts membris. Tra chescj e jere ancje la Slovenie che e je jentrade duncje – tant che prime republiche ex jugoslave – a fâ part de UE il prin di Mai dal 2004, intune cun Estonie, Letonie, Lituanie, Polonie, Ongjarie, Republiche Ceche, Slovachie, Cipri e Malte.
L’aniversari al è stât ricuardât a nivel european in Polonie, dulà che la Slovenie e jere rapresentade dal ministri dal Forest Miro Cerar, che al à sotlineât la impuartance de adesion ae famee europeane: i scambis comerciâi tra Stâts vecjos e gnûfs a son triplicâts, chei tra i gnûfs membris a son cressûts invezit fintremai di cinc voltis, il trafic in esportazion sloven al è dopleât, intant che i invistiments forescj a son triplicâts. Ancje il podê di acuist dai slovens al è cressût de jentrade inte UE: in chescj 15 agns, cundut de crisi economiche patide ancje de Slovenie, al è lât sù dal 30 par cent. Positîfs ancje i dâts fats savê dal Ufici nazionâl di statistiche sloven: il Pil al è cressût, in chest periodi, dal 75 par cent, il Pil pro capite dal 68 par cent (intal 2003 al rivave a 13.200 euros, l’an passât a 22.200 euros).
La Slovenie e à disfrutât ancje i finanziaments europeans che a vegnin dai fonts principâi, come chel pal disvilup rurâl, e midiant di chei a son stâts fats plui di 10 mil progjets.
La impuartance de UE e je stade rimarcade ancje dal prin ministri sloven Marjan Šarec che ae cerimonie, organizade in Slovenie, al à definît la cjase europeane comune simbul di libertât, stabilitât e progrès, rilevant, però, ancje lis sôs debilecis li che si varà di intervignî in futûr. ❚
Tjaša Gruden