In ogni episodi al ven frontât un probleme diferent: sessisim, bulisim e razisim
A àn tacade la lôr aventure tal 2010 cuntune serie dedicade ai stereotips dal mont furlan e di chê volte, pai ideadôrs di “FELICI ma Furlans”, ven a stâi Alessandro Di Pauli e Tommaso Pecile, al è stât dut un cressi de popolaritât des lôr creaturis te rêt, in gracie des visualizazions e condivisions continuis dai lôr videos (cun pontis che a van parsore des 100 mil visualizazions, une pagjine facebook che e plâs a plui di 25 mil personis e un canâl youtube che al à cuasi 5 mil iscrits). In Friûl, al è impussibil no cjatâ cui che nol vedi mai sintût a fevelâ de serie televisive nassude pal web e ambientade intune piçule aziende, la Daurman s.r.l., indulà che si cjatin a lavorâ personaçs che a son il ritrat perfet de parodie dal homus furlanus, dal paron ruspiôs al fi che nol à voie di fâ nuie, dal magazenîr neri laureât, ae segretarie vedrane e plaiote, dal operari Toppazzini, sfolmenât cence creance, a Gianni, tornât dal forest par stâi daûr al pari cun maniis suicidis.
Pai plui dûrs di orelis, invezit, e baste nomenâ la seconde creazion di Di Pauli e Pecile, “TACONS”, une sorte di cors fûr dal vade su espressions tipichis de lenghe furlane, indulà che il protagonist principâl al jere il mestri (des lezions, ma soredut di vite) Luciano Lunazzi (te seconde stagjon insiemi cun Catine, “la terone cui cjavei a suste”). I temis frontâts ta chescj progjets a son chei classics dal imagjinari de nestre tradizion, tant che il lavôr, la felicitât, il rapuart cul bevi, intune parodie rude e crude che e sfile il paradossâl e l’assurt, ma cuntun efiet sigurât di comicitât imediade e spontanie. Daûr di cheste superficialitât aparente, dut câs, i sta un lavôr di fin che al salte fûr te cualitât dal risultât, cuntune scriture ben pensade, une capacitât atoriâl tignude dongje e potenziade de man ferme de regjie, e une cure des ripresis e dal montaç a nivel professionâl. No par nuie la serie di “FELICI ma Furlans” e à vinçût il premi dal public al Roma Web Fest tal 2014 e l’an dopo il Best Ensemble Award dal Bilbao Web Fest (Spagne).
Cumò, daspò di chestis dôs trasmissions di sucès, la cubie Di Pauli-Pecile e torne a cuziâ la panze dal public cuntune propueste gnove che però e cîr di slargjâ lis viodudis e di slontanâsi dai lûcs comuns su la realtât furlane, par frontâ argoments delicâts de contemporaneitât e che a tocjin di dongje dut il sisteme mondiâl. Il mecanisim, dut câs, al zire simpri ator di une comicitât che e smire a cjoli vie cierts ategjaments di sieradure e a rindiju cuasi grotescs, cul risultât di meti in ridicul la protagoniste stesse, la dotoresse Facchin, condutore di un talk show li che, juste apont, si tegnin i siei dibatiments demenziâi e scalembris cuintri des plaiis dal Friûl di vuê: sessisim, bulisim e razisim.
Cheste gnove serie, simpri in lenghe furlane cun sottitui par talian, e je il risultât di un lavôr tacât trê agns indaûr e e je stade realizade cul contribût de ARLeF – Agjenzie Regjonâl pe Lenghe Furlane. Nissune ocasion miôr de Fieste de Patrie par screâle, duncje e, di fat, “Facchin center” al è stât presentât ai 4 di Avrîl al Cine Visionari di Udin, ai 6 e ai 7 di Avrîl al Città Fiera e ai 11 di Avrîl a Voleson Darzin.
Noaltris o vin cjapade la ocasion di chestis anteprimis par dâi un cuc (e lassâsi lâ a cuatri ridadis, che nol fâs mai mâl) e par une fevelade cui autôrs, Di Pauli e Pecile, di mût di capî miôr cemût che al è nassût il progjet, che, al va dit, no je une monade butade li, cence cjâf ni cjaveç (cemût che al podarès pensâ cui che si ferme aes batudis gresis, cence resonâi parsore ae costruzion), ma che al salte fûr di int che e à fintremai une ricercje pal dotorât in siencis dal spetacul (Di Pauli), cun specializazions ancje tal forest in chestis dissiplinis.
__
De Daurman s.r.l, cul stereotip dal furlan, al Facchin Theater, li che si resone sui problemis dal mont: parcè vêso cjapade cheste gnove strade?
«”FELICI ma Furlans” e “TACONS” a son formats che aromai a fasin part dal passât, nô o vevin gust di cirî alc di plui contemporani, li che si fevelàs di ce che al sucêt ore presint, di mût di fâ satire su temis che no son chei classics, tant che il frico, l’om salt, onest e lavoradôr o il bevi, in sumis, chei cliché de furlanetât masanâts milante voltis. Par chest, o vin sielzût il format dal talk show american, indulà che in ogni episodi al ven frontât un probleme diferent: sessisim, bulisim e razisim. In efiets, a pensâi parsore, di par se al è za ridicul il fat che tal 2019 si ledi ancjemò indenant a fevelâ di chescj aspiets: e je une robe di no crodi dome pensâ che a esistedin i raziscj, e invezit…»
__
Trê temis diferents par ognidune des trê pontadis (mostradis te version integrâl tes anteprimis). Indulà si podarano cjatâ chescj episodis? Ju metarêso sul vuestri canâl youtube?
«A dî la veretât, cumò o sin daûr a regolâ i ultins detais, po dopo o stamparìn i dvd di dâ fûr vie pes presentazions o midiant de distribuzion tes buteghis, come che o vevin fat cun chei altris progjets. Su internet, invezit, o vin pensât di no meti i episodis par intîr, ma di dividiju par senis singulis, di fâ saltâ fûr cuntun apontament mensîl, di mût di lâ indenant sù par jù par un an. No sin cussì sigûrs che ducj i spetatôrs a sedin madûrs par viodi la pontade interie. No volaressin che a crodedin che il fat di frontâ cun lizerece cierts temis al voledi dî che le pensìn in cheste maniere».
__
Ma al è clâr che chest personaç che si sês inventâts, la dotoresse Facchin, e je une esagjerazion, te sô maniere di pensâ delirante, tal so fevelâ cence vê competencis e tal so intervignî cence mai fermâsi a scoltâ…
«Il fat al è chest: in “FELICI ma Furlans”, o vin dât al public ce che al veve gust di sintîsi dî. In “FACCHIN center”, invezit, o tirìn fûr cuistions scomudis, che no ducj a àn voie di frontâ. Chest prodot al è come un vin di meti tal decanter, al à di cjapâ aiar, come che al à di cjapâ aiar il cjâf dal furlan medi. Il nestri intindiment al è chel dal efiet comic, e je vere, ma vie pal discors a saltin fûr ancje grops che bisugne rifletii parsore. A son tocs indulà che i nestris personaçs, che a varessin di jessi une caricature, a fevelin propit come che e fâs la int in dì di vuê, e il pont al è che lis personis no si rindin nancje cont di fâlu. Se ducj le cjapassin sul ridi, o saressin trancuîi, parcè che la ridade e je une forme di comprension inteligjente, ma i timps no son ancjemò cussì madûrs par vê cheste sigurece». ❚
Serena Fogolini
