Il president de Slovenie Borut Pahor al à organizade une cunvigne su la politiche demografiche li che a son stâts invidâts esperts, rapresentants dal guvier e dai partîts parlamentârs par discuti di une des sfidis principâls che ancje la Slovenie si cjate a frontâ, ven a stâi l’invecjament de popolazion.
Di fat, stant aes proiezions dal Istitût pes analisis macroeconomichis e pal disvilup, la popolazion plui vecje di 65 agns e rapresentarà intal 2030 un cuart dai abitants slovens, intant che za a metât di chest secul chei sore dai 65 agns a podaressin jessi un tierç de popolazion. Secont l’Istitût, intai decenis prossims la riduzion de popolazion ative (o ben, chê fra i 20 e i 64 agns), cence cambiaments inte normative sul marcjât dal lavôr e su lis pensions, e deventarà un fatôr limitant pe cressite e pal disvilup de economie.
La ministre dal lavôr Ksenija Klampfer e à ricuardât che il guvier si è za metût in vore definint cualchi pont di partence (si propon di alçâ in maniere progressive la etât pensionabile, in assence di 40 agns di contribûts, di 65 a 67 agns, e tal stes timp di cressi la percentuâl di calcul de pension al 63%). La ministre e à zontât che inte Union europeane, dome in Grecie a son – inte fasse di etât tra i 60 e 64 agns – mancul personis ativis tal lavôr che in Slovenie.
Tal stes timp, secont Klampfer si à di viodi de formazion continue dai lavoradôrs par che a puedin jessi competitîfs e apetibii pal marcjât dal lavôr.
A acelerâ l’invecjament de popolazion, cussì come che al sucêt in Italie e in altris bandis dal mont, e je però ancje la flession de natalitât, che e je stade – insiemi cu la gjestion de imigrazion – un dai temis centrâi de cunvigne.
Ogni an a varessin di nassi almancul 10 mil fruts in plui, al è stât dit. Par cualchidun, al câl des nassitis e à contribuît la instabilitât dal lavôr, intant che Anja Kopacˇ, ex ministre dal lavôr e cumò segretarie di stât intal gabinet dal prin ministri Šarec, e à sotlineât ancje la impuartance des stessis oportunitâts tra oms e feminis e de juste division dai compits in famee, citant par esempli i Paîs scandinâfs che a svantin un tas di natalitât plui alt.
De cunvigne e je vignude fûr la dibisugne di intervents di politiche demografiche, ma soredut, tant che rimarcât dai esperts, di analisis adeguadis di indulà partî. ❚
Tjaša Gruden