Un bant che al met a disposizion fonts par finanziâ il recupar di bens storics e artistics, e di lûcs pe agregazion dai zovins. Al è il “bant restaur”, presentât tes setemanis passadis de Fondazione Friuli inte cjase “A. Zanussi” di Pordenon, presintis la assessore regjonâl Tiziana Gibelli, la Sorintendente ae archeologjie, bielis arts e paisaç de Regjon Simonetta Bonomi, e il diretôr regjonâl Intesa San Paolo Venit, Friûl-Vignesie Julie e Trentin-Sudtirôl Carlo Moretti, cul president de Fondazion Giuseppe Morandini.
Il bant al met a disposizion 600 mil euros: chest an, si consolide la linie di intervent che e je stade inviade te edizion passade, che e zonte ae valorizazion e al recupar dai bens storics e artistics, includûts ancje i imobii, la ristruturazion edilizie e il slargjament dai edificis di doprâ tant che centris di agregazion sociâl e culturâl par dâ rispuestis concretis aes dibisugnis de coletivitât, e in particolâr aes fassis plui meritevulis di protezion. In ducj i doi i câs, si trate di bens impuartants pes comunitâts, dulà che a son veicui di coesion sociâl e identitarie.
Par cui che al è interessât, la domande di contribût e à di jessi fate dentri dai 17 di Avrîl: si pues fâlu compilant il modul che si cjate tal sît www.fondazionefriuli.it .
I beneficiaris dal contribût a varan di inviâ i lavôrs di restaur dentri di un an de notifiche de assegnazion, e finîju dentri di 18 mês di cuant che a son tacâts.
Te edizion passade dal bant a son stâts finanziâts 60 progjets: 12 di chescj indreçâts al recupar di centris pe agregazion e 48 finalizâts a restaurâ statuis, afrescs e aparâts decoratîfs, imobii tutelâts, ma ancje codiçs antîcs, mapis, struments musicâi e une pelicule cinematografiche.
Il bant al è il risultât di une sinergjie strente jenfri la Fondazione Friuli e lis istituzions publichis e privadis, in stât di stimolâ lis istancis dal teritori, di esaminâlis e selezionâlis, di sostignîlis e di stâur daûr te realizazion finâl. ❚
Piero Cargnelutti