Mandi nono!
Mandi Bete! Contimi une robe: ma ce saressie dute cheste storie dal redit di citadinance, che o sint tant a fevelâ? Cumò bastial jessi talians par vê une paie?
Nol è propit cussì facil, nono: a son tantis regulis di rispietâ par vêlu.
O speri che tes regulis e sedi ancje chê di “no jessi triestins”: ju viôt bielzà li, a lâ al mâr e a no fâ nuie dut il dì e a cjapâ i bêçs de “citadinance”.
Nol sarès costituzionâl tignî fûr cualchidun dome parcè che al è triestin, nono! Par cjapâ il redit di citadinance a cjalin cemût che tu âs l’Isee.
Cemût ise ce?
L’Isee.
Eh, cemût ise ce?
No “ise”, nono: Isee. Al è un numar che al covente par viodi trops bêçs che tu âs.
No bastaressial domandâ in bancje?
No, nono: l’Isee al cjape dentri dutis lis proprietâts, lis jentradis, i bêçs metûts tal cont corint… Di mût che prime di dâti il redit di citadinance a sedin sigûrs che tu sês cence bêçs.
Oh ben, chê e je une robe juste. Ma ise di fidâsi? Jo ju viôt bielzà, ducj chei che a domandin il redit, che dopo si distirin dut il dì tal sofà, tant il stât ju paie!
Però a àn di cirî un lavôr, se no lu pierdin, il redit!
Eh, bon, “tant lavôr no ‘nd è”, a disaran.
Al è par chel che a àn inventât i navigator!
O ben? Ju mandino vie pal mâr? Ah, cumò o ai capît! Prime a mandin a cjase i barcjons dai migrants, dopo a cjapin i nestris disocupâts e ju fasin navigâ fin in Afriche par tornâur il plasê!
No, no son navigadôrs che a van vie pal mâr: i navigator a coventin a judâti a cirî il lavôr.
Ah! O ai capît! Come chei de machine! Che tu tu i disis dulà che tu âs di lâ e lôr ti dan lis indicazions.
No, nono…
Ma forsit no rivin a capî, chei che a àn fate la leç. Cuant che un al dîs “no cjati lavôr” nol à un probleme di indicazions. Nol baste disi “volte a çampe e dopo va dret par dusinte metris: ve li che al è il lavôr!”
Ma no, nono, no son nancje navigadôrs in chel sens li.
E ce navigadôrs sono, alore?
Oms e feminis che ti judin a cjatâ il lavôr just.
E ce fasevino, prime, i navigadôrs?
Nuie, a jerin disocupâts, o crôt.
Ah, benon! No son rivâts a cjatâ un lavôr di bessôi e a varessin di judâ chei altris a cjatâlu? Robis di mats! O deventarìn un popul di sants, poetis e navigator! ❚
Bete di Spere