Daûr dal Istat, o stin piês che ae fin de Grande Vuere
«La crisi atuâl de natalitât e je paragonabile dome ai agns de prime vuere mondiâl e ae epidemie di influence spagnole dal 1918-1920»: chestis peraulis dal president dal Istat, Gian Carlo Blangiardo, pronunziadis di pôc ae presentazion dal Rapuart statistic dal 2018, a son riferidis a dute la Italie, ma a àn un significât ancjemò plui fuart se riferidis al Friûl. Intai ultins 5 agns (dal 2014 al 2018), di fat, la Regjon Friûl-Vignesie Julie e à pierdût ben 14 mil residents (15.500 no calcolant la jentrade in regjon dai residents di Sapade), 1.633 dome intal ultin an (il 2018). I dâts a son regjonâi, ma al contrari di ce che si pense (Triest al ven segnât dispès tant che la citât plui anziane e in câl demografic in Italie), il probleme al colpìs plui fuart la provincie di Udin, cun ben 1.905 residents in mancul (-0,36%). Cuntune medie regjonâl dal -3,6%, il sbassâsi des nassitis al è invezit plui marcât in provincie di Gurize cuntun -6,1% (894 nassûts cuintri i 952 dal 2017), intant che a Triest e a Pordenon il câl si ferme al -3%. Su chescj risultâts plui positîfs, e incît dal sigûr la presince plui fuarte, a Triest e tal so teritori e intal Friûl ocidentâl, di feminis imigradis che la lôr vocazion a fâ fîs, pûr jessint ancje cheste in câl fuart intai ultins agns, e reste plui acentuade (2,11 fîs par femine) di chê des talianis.
Cualis lis causis di cheste contrazion fuarte des nassitis? Par plui o mancul trê cuarts, a sclarissin i demografs, al è un dât struturâl. Lis baby-boomers furlanis, o sedi lis feminis nassudis intal periodi prolific dal bum economic (de metât dai agns Sessante ae metât dai agns ‘70) a son daûr a lâ fûr de etât riprodutive (che in maniere convenzionâl e finìs pai statistics a 48 agns). Chest al vûl dî che il numar di feminis in potence maris al è une vore ridot, duncje ognidune e varès di fâ plui fîs ancje dome par mantignî la situazion des nassitis invariade. Pal restant cuart, invezit, impuartante e je la crisi economiche tacade intal 2008 (e no ancjemò recuperade nancje a nivel di Pil), che e frene invezit i progjets familiârs des zovinis furlanis: dome il 5% des feminis talianis e dîs di no volê fîs, ma cuasi la metât di chestis (il 45%) no ‘nd à.
Al è dopo un altri fenomen impuartant che al impate su la struture de popolazion: la emigrazion che e torne a jessi progjet di vite di tancj zovins furlans (oms e feminis). Dal principi de crisi economiche dal 2008 chest dât al è scuasi dopleât. Une situazion impuartante no dome pai numars assolûts (intal 2018 a son stâts cuasi 2.800 i trasferiments tal forest regjistrâts des anagrafis dal Friûl-Vignesie Julie, 1.485 oms e 1.310 feminis), ma ancje parcè che e tocje in grande part zovins cuntun nivel di istruzion tant alte. Un depauperament demografic che intal 2018 al à colpît di plui la provincie di Udin (1.054 lis partencis), cun daûr Triest (728), Pordenon (715) e Gurize (298).
Une situazion grave, parcè che des analisis proponudis dal Istat al ven fûr il rûl clâf che la demografie e à tant che fatôr propulsîf di un disvilup sostignibil e la dibisugne di individuâ par ognidun dai grops critics di vuê (denatalitât, invecjament e migrazions) lis jevis dulà agjî par creâ gnovis oportunitâts pal futûr. In particolâr, il ralentament dal declin demografic al passe pe rimozion dai ostacui che si metin di mieç ae realizazion dai progjets di vite dai zovins. Propit cemût che si fâs in France e in Gjermanie. Nestris cusins di di là des Alps a dan a dutis lis mamis (che a sedin lavoradoris o no) un “Prime à la naissance” (premi ae nassite) di 927 euros, e po dopo un assegn mensîl che al va di 170 a 238 euros (daûr il redit familiâr) fin al compiment dai 20 agns. Lis mamis todescjis invezit a puedin contâ sul “Kindergeld”, un assegn mensîl variabil (192 euros par ognidun dai prins doi fîs, 198 pal tierç e 223 par ogni fi sucessîf) fin a 18 agns, ma di podê mantignî fin a 25 agns se i fîs no lavorin. ❚
servizis di Roberto Pensa
