Il gjestôr Paolini: «Dopo todescs e olandês, cumò al è bum dal Est e a fasin ben sperâ lis presincis dai Stâts Unîts»

Al è il bum de Europe dal Est e de Slovenie e po une frecuence interessante di comitivis organizadis che a vegnin dai Stâts Unîts. Cheste e je la tindince dal 2019, di là dal solit flus di cicloturiscj todescs e olandês. Di 6 agns Fabio Paolini e je une “vuaite” insostituibile su la ciclovie Alpe Adria, jessint deventât gjestôr de vecje stazion feroviarie di Scluse, une tape fondamentâl di ristôr e di assistence tecniche pai amants des dôs ruedis che a passin la piste ciclabile dilunc dal sedim de vecje linie feroviarie Pontebane. Di là dal pont di ristôr, servizis igjienics e oficine pes bicicletis, la vecje stazion di Scluse e met a disposizion conessions wi-fi e une librarie cun vuidis e cjartis topografichis dal Friûl-Vignesie Julie, e dal an passât ancje cjamaris par passâ la gnot, di là di jessi une vetrine ancje pai bed&breakfast e i albiercs de zone.
«Dopo il periodat dal principi de Vierte, disastrôs dal pont di viste meteorologjic, cumò o viodìn une buine incressite a pet dal an passât, sensazion confermade ancje dal andament dai incàs – al conte Paolini -. Intes zornadis buinis ca di nô si ferme plui o mancul un miâr di personis, che al rapresente sù par jù un cuint di chei che a passin di ca. E je une presince superiôr, in particolâr, di cicloturiscj che a vegnin de Europe dal Est, in plui che de Gjermanie. Chê altre dì, par esempli, o vevin grups estons, ongjarês e polacs, di là dai “solits” todescs e olandês».
Buinis notiziis, duncje, pal turisim furlan, cuintribelançadis, però, di une considerazion a nivel imprenditoriâl: «Lis vuidis che a condusin chescj grups lis cognossìn ben aromai di agns – al riferìs Paolini -. O sin “colonizâts” di impresis todescjis, austriachis e sudtirolesis che man a man a son daûr a slargjâ il lôr rai di marcjât a mieze Europe. Lôr a son une vore organizâts e autonoms, da râr a domandin supuart, biel che nô furlans no stin aprofitant di cheste oportunitât di afârs». Un probleme par dute la economie locâl, parcè che forsit aziendis cu lis lidrîs intal Friûl de Alte a saressin plui sensibilis a cirî ocasions par fâ fermâ i cicloturiscj sul teritori pitost che dome viodiju passâ, a ben che a son inmagâts di chel che a viodin ator. «O ai sintût  che dai zovins a son daûr a vierzi une agjenzie di incoming turistic a Glemone (che e organize la ativitât di acet dal turisim che al è par rivâ tun puest, ndr) – al sclarìs Paolini -, sperìn che di chescj segns di disveâsi indi vegnin altris».
Ancje parcè che no mancjin i problemis vierts. «Il nestri pont di fuarce al è dal sigûr la bielece dal ambient ator e la pussibilitât di amirâlu passant i puints e lis galariis de vecje ferovie – al sclarìs Paolini -. Nus al disin ducj i cicloturiscj: intal percors di Salisburc a Grau chel de Valcjanâl e dal Cjanâl dal Fier al è chel plui biel, e di tant. A son ancje, però, dai ponts critics, a tacâ de mancjance dal trat di Mueç a stazion Cjargne e de pericolositât des stradis che a vegnin dopradis par rivâ ae prime fermade feroviarie che e permet di tornâ a cjapâ il tren Micotra e tornâ a cjase. Cheste strente e sta limitant massime il turisim pendolâr dai furlans e dai carinzians».
A stan par partî ancje lis tradizionâls seradis culturâls li de vecje stazion di Scluse, chest an ispiradis ai 140 agns de realizazion de vecje ferovie Pontebane. ❚
Roberto Pensa