Invezit di fâ fagocitâ i piçui ospedâi dai grancj,
si à di puartâ lis professionalitâts di ponte sul teritori
E je vuere tra teritoris dopo la decision de zonte regjonâl dal Friûl-Vignesie Julie di tornâ a vierzi il pont nassite dal ospedâl di Tisane (“sospindût” intal 2016 par carence di personâl specialistic) e di sierâ intal stes timp chel dal ospedâl di Palme. Al centri de polemiche soredut i dâts sui parts: intal nosocomi de Fuartece intal 2018 a son stâts fats 780 parts, cuntune incressite dal 6%; a Tisane, invezit, dal 2012 no si rivave al nivel dai 500 parts anuâi. Di là des polemichis politichis (a Palme e je une zonte comunâl di centriçampe, a Tisane une plui dongje dal centridiestre e il teme al jere stât za al centri de campagne eletorâl di Fedriga), chest pont di viste numeric al è stât adotât ancje de Societât taliane di pediatrie, sezion regjonâl dal Friûl-Vignesie Julie, par criticâ la sielte de zonte regjonâl e par difindi Palme. Ae fin, al è di chest “numar magjic” che si discut, parcè che altris gjenars di analisis curadis che a dimostrin, par esempli, che a costin mancul i grancj ponts nassite pitost che i piçui no esistin, calcolant che ducj i doi i reparts di ostetricie a vevin beneficiât in agns resints di invistiments struturâi impuartants. E nancje no esist nissune analisi suntune insigurece concrete di Tisane o Palme, basade suntune casistiche reâl.
Al reste dome il nivel teoric dai 500 parts l’an, sielt de Oms (Organizazion mondiâl de sanitât) tant che il discrimin tra ponts nassite “sigûrs” e “in potence pericolôs”. Sot di chel nivel, si dîs, i operadôrs sanitaris a disponin di un nivel di esperience e di casistiche che no ur permet di frontâ eventuâls complicazions. Pe veretât, il nivel discriminant al sarès chel di 1000 parts ad an, ma intune realtât tant che la Italie chest al volarès dî sierâ la grande part dai ponts nassite. E chest za le dîs lungje su la “ruspidece” di chest indicadôr, che al ven adatât in maniere elastiche daûr des sieltis politichis. Ospedâi di mont tant che Cavalese o Plêf di Cjadovri, ca dongje, a àn vût deroghis ministeriâls pûr rivant cun grande fadie a dome 100 parts ad an.
A cjalâ ben, dopo, al è dome un indicadôr burocratic: ben pôc al conte cetancj fruts che a nassin intun an intun ospedâl, pitost al bisugnarès segnâ un limit minim pal operadôr sanitari singul che al jentre in sale part: par esempli, vê assistût a almancul 100 parts l’an par dimostrâ di vê esperience suficiente. Resonâ su lis struturis singulis al vûl dî vê une vision statiche, tecnocratiche e incentradore de sanitât e rindisi al acentrament inevitabil des funzions plui impuartantis in pardabon pôcs centris ospedalîrs. Il teme de esperience e dal ampliament de casistiche di operativitât dai miedis e dai sanitaris al pues jessi decidût in maniere oportune cuntune turnazion di personâl tra nosocomis grancj e piçui. Chest al tocje la ostetricie, ma ancje tantis altris specialitâts medichis. E je simpri plui fuarte la preference dai miedis par lavorâ in grancj ospedâi, dulà che si fâs plui cun facilitât “curriculum” e li che a son plui oportunitâts di cariere e cressite professionâl. Cussì, i piçui ospedâi a restin simpri plui disfurnîts des professionalitâts plui ricercjadis. Un probleme che altris sistemis sanitaris (tant che par esempli chel de Emilie-Romagne) a stan za frontant, doprant lis pleis de legjislazion, tant che par esempli la pussibilitât previodude dal contrat coletîf dai miedis di ufrî incentîfs ai professioniscj disponûts a movisi par un periodi dai grancj ai piçui ospedâi par trasferî li la lôr competence e professionalitât.
Parcè no fâ un resonament dal gjenar, atraìnt professionalitâts buinis par rilançâ ducj i doi i ponts nassite di Palme e Tisane, par no butâ par aiar milions e milions di invistiments fats intai agns passâts, magari atraìnt parts di fûr regjon (cemût che dal sigûr si podarès fâ di une spuinde a di chê altre dal Tiliment)?
E je dopo une cuistion ancjemò plui impuartante che e va a pro dal mantigniment di ducj i ponts nassite. I dâts demografics riferîts al Friûl (o fevelìn intal articul parsore) a son une vore preocupants, metint a pericul no dome il futûr disvilup economic, ma ancje la sorevivence stesse dal popul furlan. Cemût si puedial pensâ di rilançâ la natalitât, no invistint su lis professionalitâts che a àn di acompagnâ il percors de nassite? Si sta pôc a dî che nol covente l’ospedâl sot cjase, ma la esperience e insegne che al cressi de distance e dai coscj, in tancj a rinunziin a analisis e percors diagnostics di prevenzion. Lu amet il stes Istitût Superiôr di Sanitât (Iss), che si augure il rilanç dai consultoris sul teritori par dâ supuart aes feminis in spiete. Supuart no dome medic, ma ancje psicologjic, motivazionâl, economic. Cence chest impegn, al dîs l’Istitût, a cressin fûr di misure lis prestazions medichis no apropriadis, parcè che inte solitudin e inte disinformazion la rispueste ai pinsîrs lis futuris mamis lis cirin in ecografiis ridondantis e inutilis, tal ûs no apropriât dal pront socors, tai esams diagnostics di soreplui e intal ricors al cesari. Dome la presince di ponts nassite difondûts sul teritori e pues furnî lis professionalitâts necessariis par sigurâ in ogni paîs dal Friûl che ogni femine e rivi al part cun dutis lis cautelis che a coventin, puartant intai centris grancj dome i câs che a presentin pussibilis complicazions. ❚
Roberto Pensa
