Di contadins a imprenditôrs, ma tocje fâ simpri di bessôi

La agriculture e il so leam cuntun teritori che al va tignût a ments,
a somein sparîts de agjende politiche de Regjon
Une volte i furlans a jerin ducj contadins. E cumò? Cemût staie la nestre agriculture inte ete dulà che i contadins a son disparîts e a son deventâts “imprenditôrs agricui”? Il lavôr tai cjamps al è stât preminent fintremai ae metât dal ‘900, ancje se la nestre e jere dome agriculture di sussistence e autoconsum. Dome tal Votcent, imprenditôrs iluminâts tant che Freschi e Chiozza a àn pensât a fâ resonâ i contadins furlans in maniere diferente, ma al è coventât une vore di timp par meti in vore inovazions tant che gnovis rotazions agraris, plui atenzion ai vignâi, jutoris ae culture dai cavalîrs, miorament dal patrimoni zootecnic e ûs dai fertilizants chimics. Fintremai lis bonifichis a son stadis studiadis une vore a dilunc, ma i Consorzis di bonifiche a son nassûts dome tra lis dôs vueris, in ete fassiste.
Dut câs, fintremai ai agns ‘50 la struture economiche dal Friûl e veve di fonde la esperience di caratar precapitalistic: la scansion dal timp e la organizazion sociâl a jerin dutis leadis ae ativitât intai cjamps. Dome tai ultins 70 agns, in Friûl lis stagjons e il lôr cicli a àn pierdût il lôr significât, e la muse de nestre tiere e je cambiade dal dut. I mudaments plui grancj intal paisaç agrari a son stâts la sparizion dai morârs, che par secui a jerin stâts une presince dominante, e la introduzion di estensions penzis di coltivazions di soie, la riorganizazion fondiarie e l’abandon dai prâts in cuote che, soredut lis feminis, a tignivin in ordin par fâ fen. La plane furlane, prime e jere un mosaic di coltivazions diferenziadis, po e je rivade la division regolâr dai cjamps de monoculture a blave, facilitade des politichis agriculis, de mecanizazion e ancje de trasformazion gjenerâl de societât furlane, che prime e je deventade industriâl e po si è fondade sui servizis.
Baste cjalâ il numar dai lavoradôrs tal setôr. Tal 1866, chei che a lavoravin intai cjamps a jerin l’82%, tal 1951 a risultavin 163 mil (il 33%), 10 voltis plui di vuê. Tal 2011, il censiment al à di fat regjistrât 13 mil ocupâts in chest compart (il 3% de fuarce lavôr), 150 mil di mancul di 60 agns indaûr. Vuê, in realtât, o vin plui di 20 mil personis che a lavorin tai cjamps, se o zontìn ducj i puescj di vore che a derivin de ocupazion a timp determinât che, tai ultins dîs agns, dal 2008 al 2017, e je cressude dal 30%. Di fat, a son passâts di 6 mil e 500 a 8 mil e 500 chei che a risultin lavorâ stagjon par stagjon intai cjamps: int che magari e à simpri lavorât, ma magari a neri, e cumò invezit e pues jessi regolarizade. E par une sorte di paradòs, de sotocupazion di une lavoranzie a cost bas di une volte, si è passâts vuê a vê bisugne di int che no si cjate, parcè che il lavôr al strache e al tocje dispès un periodi di timp limitât: dome la imigrazion, viodude ancje la denatalitât, e rive a sodisfâ la domande di lavôr in chest ambit.
La situazion gjenerâl dal compart in Friûl si viôt ancjemò miôr cjalant lis produzions che a dan un contribût une vore penç aes esportazions: si fevelave tal 2017 di 758,8 milions di euros, in cressite dal 5% in confront cul an prin e cuntun salt positîf cul forest par 443 milions di euros, a fâ di testemoni che al è cressût l’interès viers de cualitât dai prodots agroalimentârs de regjon, ancje pe capacitât di percori une gnove strade di bande dai nestris agricultôrs.
Se inte storie furlane la blave e à simpri fat stranc di ducj chei altris prodots, cumò la regjine dai nestris cjamps e je dome al tierç puest cun 112 milions di euros di produzion. Il re al è deventât il vin, che al à i volums di valôr plui alt: 167 milions di euros. I ven daûr il lat, cun 133 milions di euros: ereditât des 533 latariis che a esistevin in Friûl inte ete fassiste. E se la zootecnie furlane no fos stade devastade de prime vuere mondiâl, salacor cheste produzion e sarès ancjemò plui alte e la Cjargne e sarès une piçule Svuizare. Dulà che agriculture e arlevament e dan un “valôr zontât” (VZ) che al è tra i plui alts de Europe.
La nestre agriculture invezit e regjistrave tal 2017 une diminuzion dal VZ dal 4,7%, un tic di plui de contrazion a nivel talian (4,4%). Il câl al è stât determinât dai prodots vegjetâi, animâi e de cjace (-5,4,%): la silviculture e cres dal 0,8% e la pescje e la agheculture dal 4,7%. Dut câs, il VZ al reste dal 2,3% a nivel assolût, cuant che la interie fasse dal Nord Est talian e da il 22,9%.
Ancje la dinamiche dal numar des aziendis e je pardabon interessante di esaminâ: la diminuzion dal numar des impresis in agriculture e je costante di plui di 50 agns: il numar des aziendis al jere di passe 91 mil tal 1961 e cumò a son ridotis a 22 mil 316, mancul di un cuart. A cressin dut câs tai ultins agns lis superficiis coltivadis, ma se o lin a cjalâ la situazion taliane lis nestris aziendis agriculis a son plui piçulis di chês di chês altris regjons dal Centri Nord. Dome in Ligurie lis superficiis des aziendis a son plui piçulis des nestris. O vin l’1,8% di dute la tiere coltivade in Italie, e lis nestris aziendis a son l’1,4% dal compart talian.
La metât dai cjamps furlans e reste coltivade a blave e altris cereâi, ma a cressin esperiencis inovativis come chê de coltivazion dal mei, che une volte si doprave dome par dâi mangjative ai uciei o ai poleçs, e invezit cumò al è une vore domandât pe alimentazion cence glutin che ur covente ai celiacs o a chei che a vuelin fâ cualchi diete particolâr. Dome il 9% des superficiis agriculis al è fat des vîts, e il 14% al è dedicât aes plantis par fâ vueli (la soie, prime di dutis).
Ce fâ par miorâ lis “performance” dal compart? Stant il fat che lis nestris a son aziendis piçulis, salacor dome zontant lis fuarcis e fasint plui “masse critiche”, i lôr risultâts produtîfs – che za a son bogns – a podaressin jessi ancjemò miôr. Cun di plui, si varès di gjavâ aes aziendis il pês di une burocrazie che lis scjafoie. I produtôrs di miluçs a contin l’esempli dai Plans di disvilup rurâl che a devin jutoris ancje avonde bogns, ma che dut câs a levin rindicontâts cuntun lavôr di ufici devastant plui di un nûl di pudiesis asiatichis su lis plantis dai lôr pomârs. E alore, parcè no sburtâ simpri di plui i produtôrs a metisi dongje e a consorziâsi, e parcè no gjavâur la torture di documents e modui inutii di jemplâ par lassâju libars di impegnâsi a miorâ la produtivitât des lôr coltivazions?
Ancje parcè che la agriculture di vuê e je cetant plui inteligjente di chê di une volte. Cumò e je deventade “green” (parcè, prin ce jerie? Maron?…). Si è passâts dal sostentament ae sostignibilitât. Si lu viôt dal sucès dal “bio”, de tutele fuarte che si cîr di meti sui presidis alimentârs di cualitât (Doc, Dop, Igp), de mode dai marcjâts dal contadin a “chilometri zero”, de resistence ae omologazion che la int e i produtôrs a mostrin cuant che si volarès introdusi i Ogm. Al è come se o vivessin une nostalgjie par un mont contadin che o sintìn di vê bandonât masse svelts.
La produzion dut câs e cres, e gnûfs setôrs si son disvilupâts, dai agriturisims aes fatoriis didatichis, dal florivivaisim ae culture dal ulîf, de valiculture ae mitiliculture. L’esempli dai agriturisims al è une vore significatîf. Tal 2017 lis aziendis agrituristichis in regjon a jerin 656 e a jerin cressudis dal 2% in confront cul an prin: 345 a jerin chês autorizadis a ospitâ int, 467 ae ristorazion e 19 ae degustazion.
Dut câs, al è un setôr che intal timp al à vût prin un bum, po une selezion dai operadôrs e cumò al somee rivât a autoguviernâsi e a presentâ une ufierte che e larès simpri di plui promovude e sostignude, ancje in clâf di percors enogastronomics e cicloturistics. La promozion turistiche de Regjon dut câs e somee indreçade a dut altri. La agriculture, e il so leam cuntun teritori che al va tignût a ments, a somein sparîts de agjende politiche di cheste Regjon. La invasion des pudiesis e dai produtôrs di Prosec no cjatin ostacui: ai imprenditôrs agricui di vuê ur tocje, come ai contadins di un secul indaûr, “fâ di bessôi” e cirî di sburtâ simpri di plui viers produzions di cualitât par un marcjât che no simpri lis ricognòs. Se noaltris o lin a comprâ miluçs dal Kazakistan o de Gnove Zelande tai centris comerciâi invezit di cjoli chei che a vegnin produsûts su la puarte di cjase nestre, al è dibant lamentâsi che la situazion di chest setôr e pues deventâ simpri plui grivie. Ogni volte che si compre alc che al ven de tiere, la nestre responsabilitât viers de nestre tiere e je precise: e se “la int e je ce che e mangje”, al sarà ben miôr “mangjâ ce che si è”, ven a stâi furlan, e cirî di judâ plui che si pues i prodots di chenti. Che a laressin indicâts cun clarece ai consumadôrs e promovûts cuntune serie operazion di marketing teritoriâl no dome inaltrò, ma ancje achì di noaltris, par podê jessi bogns di sielzi mangjative che e sedi a pro dal ambient e ancje de nestre salût. ❚
Walter Tomada