L’apel: «Scoltìn i teritoris dal Friûl che si sintin margjinalizâts.
Tant che la ex Provincie di Pordenon»
Al è nassût in Sudtirôl, ma al è un “furlan doc” il gnûf president de Assemblee de Comunitât linguistiche furlane. Insume, al è un che l’autonomisim e la difese des minorancis ju à intai gjens e intal cûr de passion civîl, culturâl e politiche. Ai 9 di Lui passâts (vilie dal so complean, pardabon un biel regâl!), Markus Maurmair al è stât elet par aclamazion di un centenâr di coleghis sindics dal Friûl (vicepresident al è stât nomenât il sindic di Dartigne, Alessandro Marangoni). Maurmair, 45 agns, origjinari di Bressanone/Brixen (Bz), ma aromai traplantât salt a Voleson Darzin – Comun li che al è il prin sindic dopo de fusion dal 2015, dopo che al à vuidât dome Voleson -, al è ancje president dal Pat pe Autonomie. Un curriculum di rispiet che cumò al metarà a disposizion de zovine istituzion che fin vuê e à vût a cjâf Diego Navarria.
«La atenzion che o ai cjatât intai coleghis e il lôr vôt unanim mi àn fat tant plasê pe stime intai miei confronts che mi àn dimostrât – al sclarìs Maurmair -. Cun di plui, il percors che o ai za fat dentri de Assemblee de Comunitât linguistiche furlane mi à fat capî la impuartance di cheste istituzion che e sta ancjemò nassint. O sin ancjemò intune fase di inviament, ma o soi convint che intal futûr dal Friûl e podarà vê une sô funzion impuartante ancje intal butâ jù chei mûrs che fin cumò si son manifestâts in tiermins di vecjo ricuart des Provinciis».
__
Chel che si vierç al è un mandât impuartant. Il prin al à segnât l’inviâsi de istituzion, cumò si spietisi une partence definitive e ancje une plui grande capacitât di incidi su la realtât legjislative e aministrative regjonâl. Intant al è ancjemò di completâ il cuadri des adesions, viodût che i “Comuns ribei” a àn refudât cheste istituzion che e je nassude, ancje se cuntune logjiche cetant divierse, dentri de riforme che e à introdot lis Unions teritoriâls intercomunâls…
«Saltâts fûr des secjis de vecje vicende des Uti, a son cumò dutis lis cundizions par une adesion ae Assemblee di ducj i Comuns che no vevin acetade cheste riforme. La adesion aes Uti di fat aromai no je plui obligatorie e e je anunziade une largje riforme istituzionâl. I Comuns ribei a puedin cumò jentrâ cun serenitât inte Assemblee de Comunitât linguistiche furlane. Il prin obietîf al è duncje passâ dai 119 Comuns cumò aderents ai cirche 150. Il secont obietîf al è chel di dotâ di une struture operative la Assemblee. Par fortune nus ven dât un supuart de Arlef (la Agjenzie Regjonâl pe Lenghe Furlane), ma al è un jutori minim. O crôt che sigurâ un stanziament pes esigjencis organizativis de Assemblee al sedi il minim. Cumò o vin di fâ une domande di contribût anuâl e spietâ une rispueste, pierdint cussì mês in spiete des risorsis par operâ. In alternative, la Assemblee e va dotade di personâl. La Assemblee e à tancj compits: pensâ che dut si puedi fondâ su la buine volontât dai sindics nol puarte di nissune bande. Al volarès dî relegâ il rûl de Comunitât linguistiche furlane dome a un lûc di testemoneance ideâl. Jo o refudi cheste impostazion e o pensi a di une istituzion che e à une grande schirie di competencis».
__
Il condurâ di une mancjance di risorsis, validaressie il suspiet che la Regjon e vueli tignî la Assemblee ai margjins e relegade a di un rûl di façade?
«No son dubis».
__
Cualis tematichis vuelial meti tal centri dal so mandât?
«Il riferiment e je la tutele e la valorizazion de lenghe furlane che par me e va intindude ampliantle a ducj i dirits dal popul furlan. In Friûl a son diviersis comunitâts linguistichis (slovens, gjermanofons, venetofons…), ma il popul furlan al è la comunitât prevalente in tiermins numerics, che invezit e risulte tant indaûr in tiermins di tutele. Cun dut il rispiet di chês altris minorancis, la situazion e va riecuilibrade a pro dai furlans. L’abonament Rai lu paìn ducj, lu pain ancje i furlans e a àn dirit ai servizis corispondents. La prime bataie e sarà alore chê di puartâ a cjase une convenzion cu la Rai che e ricognossi finalmentri in maniere plene la esistence e i dirits dai furlans, cuntun ampliament significatîf des oris di trasmissions radio e televisivis in lenghe furlane. La autonomie speciâl dal Friûl-Vignesie Julie e dipent de compresince di diviersis popolazions, lenghis e culturis, duncje cheste e je une cuistion fondamentâl».
__
Ancje parcè che si cjatìn intal ventenâl de leç 482/99, che finalmentri e cun intart grâf e voleve dâ gjambis al principi costituzionâl de tutele des minorancis culturâls e linguistichis. E il belanç di dôs decadis nol è dal sigûr brilant. Cualchi concuiste, tant che l’insegnament de lenghe furlane intes scuelis, e je metude a pericul in maniere costante.
«Cheste e je la seconde grande bataie: la atuazion reâl dal insegnament de lenghe furlane. La precarietât des nominis dai insegnants, cu la “gjostre” des nominis sul tacâ dal an che e puarte tant personâl di difûr regjon, e va a pericul di puartâ a un insegnament dal furlan dome di façade. A son ator insegnants ecezionâi, cuntune passion infinide pal furlan, ma a son ancje situazions là che la marilenghe e je doprade dome tant che clâf par otignî finanziaments internis suplementârs, ma dopo si esaurìs intal imparâ cualchi frase a memorie. E nol è chest che al covente par difindi une lenghe».
__
La Assemblee de Comunitât linguistiche furlane e je nassude, intal intindiment di chei che le àn proponude, ancje cul pinsîr che cheste e podès deventâ une dì il vêr “Parlament” dai furlans, un organisim istituzionâl rapresentatîf dal Friûl che nol è mai stât e che cumò nol esist plui nancje inte sô version une vore parziâl des Provinciis. Isal un obietîf realistic?
«Tal rispiet massim de volontât dal legjislatôr regjonâl, o pensìn di podê puartâ un contribût propositîf a cheste fase anunziade di riforme des autonomiis locâls. Jessint dai 5 agns de Zonte Serracchiani, caraterizâts di sieltis caladis dal alt, al sarès ben che la Regjon e valorizàs il rûl dal nestri Parlamentut, che dut câs za cumò al esprim il pinsîr de plui part dai sindics dal Friûl-Vignesie Julie. Duncje, za vuê al podarès jessi un lûc impuartant di confront su lis riformis istituzionâls. Dopo, intal timp e podarès madressi une sielte che su cualchi materie e valorize il rûl de Assemblee sui temis identitaris. E sarès une svolte storiche pal Friûl. Bisugne capî se, dentri de sô riforme, la Zonte regjonâl e vûl introdusi altris organisims eletîfs che a rapresentin il Friûl o une part di chel».
__
La Assemblee de Comunitât linguistiche furlane no à di vê a ce fâ dome cun lenghe e culture. Sono altris temis che a tocjin dut il Friûl che di chei si puedi ocupâ?
«Dal sigûr al è il teme dai coleçs eletorâi che o riproponarìn. A une popolazion omogjenie tant che i furlans il sisteme eletorâl al à di dâur la pussibilitât di elei rapresentants de minorance intes istituzions democratichis. In altris teritoris, tant che il Trentin-Sudtirôl, in non de tutele des minorancis il dissen dai coleçs eletorâi e i sistemis eletorâi a favorissin la elezion di rapresentants di chel teritori. Ca di nô chest nol è: par rivâ a elei un rapresentant de minorance furlane un moviment politic cumò al varès di cjapâ il 20% a nivel regjonâl, une cuote tant plui alte di chê che e covente a elei un dai 13 deputâts».
__
E su altris temis impuartants là che il Friûl al à bisugne di une strategjie unitarie, tant che il rilanç dal setôr des manifaturis o il teme des infrastruturis?
«Par esprimisi su chescj temis e coventarès une sielte istituzionâl divierse. Si fevele di competencis aministrativis che no crôt che e puedi ocupâsi in chest moment la Assemblee de Comunitât linguistiche furlane. Se dopo, in futûr, in dialic cu la aministrazion regjonâl, si volaran ampliâ lis nestris competencis, noaltris o sin pronts, ancje tignint cont di chê che e pues jessi la evoluzion de Citât metropolitane di Triest».
__
Il fat che lui al sedi un sindic “di di là da la aghe”, puedial judâ a dismolâ chês tensions teritoriâls che dispès a menacin la unitât dai furlans inte difese dai lôr interès?
«Propit parcè che o ven di un teritori che si sint metût sot atac dal pont di viste des concuistis storichis, al è dificil sostignî che nol sedi in at un atac ai dams dal Friûl Ocidentâl. Che e sedi la incorporazion des Cjamaris di Cumierç, che a sedin lis provis fatis a so timp di eliminâ la Prefeture, chescj events a nudrissin propit chel sintiment. Il Friûl Ocidentâl al domande atenzion, ancje parcè che une part consistente de ex provincie di Pordenon e à fondis venitis fuartis. Chest al è un dai grancj temis istituzionâi che a tocjin la tignude de Regjon Friûl-Vignesie Julie e si ‘nt fevelarà une vore. Par gno cont, o crôt che e sedi pussibile une riforme istituzionâl che, pûr tignint cont di une rapresentance unitarie dal Friûl, e puedi valorizâ il rûl di diviersis areis largjis che a àn carateristichis particolârs e omogjeniis, ancje dissegnantlis in mût diviers des vecjis Provinciis». ❚
Roberto Pensa
