Cheste forme di agregazion e je stade cjapade
tant che esempli virtuôs ancje di fûr regjon
Al è aiar di tampieste chel che di cualchi timp al zire parsore dai cjamps de culture in Friûl. Burlaç che al frape il tabâr di manifestazions inviadis di agnorums, slavaçon che al lave la muse ai premis internazionâi, codebuie che si mene vie la gjestion dai museus nostrans. Tant par no savê di ce bande parâsi, dongje des solitis bugadis de buere, altris corentiis si jevin di soreli a mont, cu la pretese di puartâ novitâts che pôc a àn a ce fâ cu la nestre realtât. No cate dut, a son ancjemò areis dal Friûl indulà che al sofle aiar bon, di chei che a sparnicin semence e a fasin cressi ideis e progjets pal teritori.
Tal Friûl di Mieç, par dînt une, e esist une realtât agregative jenfri Comuns che e lavore par coltâ e par tignî di cont lis ricjecis presintis te zone, dai artiscj aes peculiaritâts dal paisaç o dai paîs.
Nassût tal 1994 di une convenzion jenfri 6 aministrazions (la prime in provincie di Udin), in dì di vuê il Progjet Integrât Culture dal Friûl di Mieç (pai amîs PIC) al cjape dentri 15 Comuns (Basilian, Bertiûl, Cjamin dal Tiliment, Cjasteons di Strade, Codroip, Flaiban, Listize, Merêt di Tombe, Mortean, Muçane, Rivignan Teôr, Roncjis, Sedean, Talmassons e Vildivar), cuntun bacin di plui di 63 mil utents. A pet di une cuote di 1 euro par abitant che i Comuns a metin ogni an, il PIC al organize events e spetacui, al publiche libris, vuidis e prodots multimediâi e al contribuìs a fâ cognossi la anime di chest teritori.
25 agns di vite no son un travuart di pôc, par une realtât che la sô mission e je la condivision de culture e che si poie suntune convenzion tra Comuns. Cun di plui, se si va a fâ un zîr pai uficis de segretarie operative, si pues restâ di clap a scuvierzi che al è dome un scritori e che daûr di dut e je simpri la stesse persone, Gabriella Cecotti. O vin, duncje, cirût di capî lis resons dal sucès dal PIC adun cu la sô responsabile e cu la presidente de convenzion, la assessore ae culture de Citât di Codroip, Tiziana Cividini.
__
Cecotti, o sin denant di une real-tât che o podaressin definî storiche, in regjon. Cuâi sono stâts i elements che a àn puartât ae sô cressite?
«O crôt che la fuarce dal PIC e sedi la costance e la indurance che la convenzion e à simpri metût par rivâ ae mission che si è dade, ven a stâi valorizâ il teritori midiant di iniziativis culturâls sorecomunâls di cualitât. Po dopo, chest al è un obietîf che bisugne simpri stâi daûr, parcè che no si rive mai a otignîlu ad in plen. Dut câs, al è ce che nus à puartât a cressi tal timp, cu la jentrade di Comuns gnûfs (l’ultin al è Roncjis, jentrât tal 2017). Il slargjâsi al à incressudis ancje lis potenzialitâts, stant che ogni membri si puarte daûr une sô tipicitât, fate di lûcs, realtâts e tradizions. Al è clâr che bisugne dâsi il timp par cognossisi e par scuvierzi lis particolaritâts di ognidun, propite come che si fâs cui amîs».
__
In ducj chescj agns, aie mai notât jenfrisegns di cediment de convenzion?
«O ai tacât a lavorâ pal PIC tal 2003 e tal 2006 o ai vude in man la gjestion operative. O ai di dî che i Comuns a son stâts une vore brâfs a rispietâsi e a colaborâ cence mai pestâsi i pîts. Culì, e vâl la regule de avualance: nol è un câs che il logo de agregazion al sedi un cuadrât, figure cun ducj i lâts compagns. Nol impuarte se un Comun al è plui grant e plui siôr: par nô, a pesin ducj ae stesse maniere».
__
Cividini, cui siei passe 16 mil abitants, Codroip al podarès rangjâsi di bessôl tal proponi events di cualitât. Parcè continuâ a stâ tal PIC?
«Codroip al è un pont di riferiment pal Friûl di Mieç, sedi par dimension, sedi pe posizion. Naturâl che al vedi un program culturâl autonom, dut câs, une propueste no gjave chê altre, anzit, metudis insiemi a insiorin la ufierte pe comunitât. Cun di plui, il PIC al rive a sparniçâ plui a fonts la publicitât dai events, cuntune rispueste che tantis voltis no rivìn a vê come Comun. Al va ancje marcât il fat che lavorâ in sinergjie e in maniere slargjade al permet di mostrâ la continuitât des lidrîs storichis, culturâls e artistichis dal Friûl di Mieç. O vin di jessi braurôs di cheste forme di agregazion che e je stade cjapade tant che esempli virtuôs ancje di fûr regjon».
__
Cecotti, ce aial dât e ce aial cjapât sù il PIC tal teritori dal Friûl di Mieç?
«O speri che al vedi dât stiçadis e oportunitâts, dongje de pussibilitât di une cressite che no je dome culturâl, stant che la culture no viaze mai di bessole. E la racuelte, ancje se no si pues misurâ in maniere concrete, e je stade cetant bondante: il PIC al à ricevude la sô linfe vitâl e al esist dome in gracie dal teritori».
__
Vêso notât cualchi mudament tal nivel culturâl e te maniere di svicinâsi di bande dal public in chescj agns?
Cecotti: «Sì, il public al è cressût insiemi cun nô. Al è simpri plui atent, curiôs, forsit ancje esigjent. Dutis carateristichis che nus fasin pontâ inmò plui adalt, cu la sperance di rivâi. Par prionte, tancj professioniscj nus fasin i compliments pai utents che o vin e a àn gust di tornâ a lavorâ cun nô. Dut chest nus sburte a lâ indenant, cirint di slargjâ lis colaborazions, che a coventin simpri par cressi e par imparâ alc di gnûf».
Cividini: «Aromai il public nol è dome chel dai apassionâts. E je int che e à gole di scuvierzi viodudis di un teritori inmò incontaminât, une plane cuiete e ospitâl, cun ritmis ancjemò sostignibii: une tiere che, a diference di ce che al scriveve Maldini te Cjase a Nord-Est, nus à mostrât di vê une anagrafe e une storie».
__
Cividini, si puedial dî che la ufierte culturâl di un ent e dipent in buine part dai siei aministradôrs e dai orientaments de zonte?
«Jo o crôt che la culture di cualitât no vedi colôrs. O soi convinte che la formazion personâl di ognidun di nô e sedi impuartante, cuant che si impegnisi te politiche, dut câs, bisugne simpri scoltâ e cjalâ ce che a fasin chei altris, condividint lis ideis».
__
Cecotti, resonìn su la ufierte culturâl in regjon. I ultins agns àno puartât un insiorament o ben un impuariment rispiet al passât (ancje par vie di decisions politichis, come lis polemichis sul premi Terzani o su Udin&Jazz)?
«I agns no son mai compagns. Si dan la volte fasis diferentis che, tal imprin, a son ancje dificilis di capî o di cjapâ par buinis. Ma o soi sigure che dut al coventi a dâ un sburt e che al vedi dentri un potenziâl che magari a prin colp no si viodeve». ❚
Serena Fogolini
