Vivi i efiets dal clime che al cambie par agjîi prime che al sedi masse tart

Premi european ae gjornaliste Elisa Cozzarini
e a Legambiente dal F-VJ
Al torne in Friûl e al va a Legambiente dal F-VJ e ae gjornaliste Elisa Cozzarini il premi pe divulgazion meteorologjiche de European Meteorological Society (EMS), la associazion che e ten dentri lis diviersis societâts meteorologjichis europeanis. Si trate di un premi prestigjôs – la dizion corete e je EMS Outreach & Communication Award – che tes edizions passadis al è lât tes mans des coraçadis de meteorologjie come la Royal Meteorological Society, vincidore pal an passât, il Zentralanstalt für Meteorologie und Geodynamik austriac – il prin servizi meteorologjic moderni – vincidôr tal 2016, o il Met Office, il servizi meteorologjic britanic (2014).
In chest parterre i furlans a àn la braùre di jessi stâts ricognossûts dôs voltis, lis unichis che il premi al è rivât dentri dai confins talians: tal 2009 cuant che Marco Virgilio al è stât premiât pal so program di comunicazion meteorologjiche Meteoweekend su Telefriuli, e chest an cul progjet Comunicare il cambiamento climatico di Legambiente dal F-VJ e Cozzarini. Realtâts une vore plui piçulis, ma che a son rivadis a cjatâ – come che e domande la EMS ai siei premiâts – gnovis manieris di comunicâ la meteorologjie e la climatologjie al public plui larc.
In chest câs si è tratât di une batarie di ativitâts diferentis, davueltis dal Avrîl dal 2017 al Març dal 2018 ator pe regjon e indreçadis a un public svariât par etât e tipologjie: cunvignis sul sparagn energjetic – cun sugjeriments pratics su cemût ridusi la olme energjetiche e produsi mancul CO2, la anidride carboniche – e sul rapuart tra cambiament climatic e migrazions, taulis tarondis su la economie sostignibile e solidarie, escursions (sul glaçâr de mont Cjanine, te lagune di Grau, te campagne furlane) par tocjâ cun man i efiets locâi dal riscjaldament globâl e l’impat des speciis alienis su la biodiversitât; in plui presentazions di libris, un concors cu lis scuelis, intervistis video cun “testemonis de clime” (i videos si viodin sul cjanâl YouTube di Legambiente dal F-VJ). Lis ativitâts, organizadis in colaborazion cuntune rêt di associazions e finanziadis de Regjon Friûl-Vignesie Julie, a son stadis coordenadis di Cozzarini, che tai agns si è ocupade plui voltis di temis ambientâls, par ultin, cul so libri Radici liquide (nuovadimensione 2018), dal impat dal mini-idroeletric sui flums alpins.
Il progjet, e conte Cozzarini, al è nassût de constatazion che un probleme grâf come il cambiament climatic, che al interesse tancj ambits de nestre vite, ambientâi, ma ancje socioeconomics, al jere – soredut in chei agns pre-Greta Thunberg – cuasi dal dut ignorât dai media e de opinion publiche. «O vin pensât a strategjiis di comunicazion che nus permetessin di tirâ dentri la popolazion, di fâi vivi diretementri i efiets dai cambiaments climatics. O sin lâts cul glaciolic Renato Colucci a pene sot di ce che al reste dal glaçâr de Mont Cjanine, a viodi il confront tra chel che al jere il glaçâr 50, 100 agns indaûr e chel che al è cumò. Ancje i videos a àn chest obietîf. A àn sì finalitât informative, ma indi è cualchidun, par esempli un sui pescjadôrs di Grau, che al conte la storie di chei che i efiets dal cambiament climatic ju viodin te vite di ogni dì. O vin fat tancj events, une ventine, cjapât dentri tante int, ma plui che i numars al è impuartant sotlineâ il tentatîf di comunicâ in maniere diferente: ce vuelial dî un grât di temperadure in plui, in pratiche?».
Une altre reson che il progjet al è stât premiât, e zonte Cozzarini, al è che al à savût cjapâ dentri figuris professionâls diferentis e sienziâts une vore prestigjôs, ancje in gracie de vicinance dai istitûts di ricercje de aree triestine. Tra chescj il climatolic Filippo Giorgi dal Centri Internazionâl di Fisiche teoriche di Triest che, tant che part dal comitât esecutîf dal Intergovernmental Panel on Climate Change (IPCC), tal 2007 al à vinçût il Premi Nobel pe Pâs dividintlu cul politic Al Gore. «O vin vût la partecipazion di nons impuartants, int che e sa di ce che e cjacare, e nô come Legambiente o vin cirût di fâ di puint, rindi i dâts e lis peraulis dai sienziâts une vore concrets e pratics, vâl a dî dâ la idee che e je une strade di seguî».
Un dai moments plui emozionants par Cozzarini e je stade la cunvigne finâl a Grau, soredut pe grande partecipazion dai fruts des scuelis rivâts a assisti ae premiazion dal concors. «O vin zirât a lôr la domande che si jerin fats sul imprin, cuâl isal il mût miôr di comunicâ il cambiament climatic? La maniere che a àn rispuindût… si son inventâts lis modalitâts plui incredibilis. Tra i premiâts al è stât un grup di frutis des scuelis secondariis di prin grât che a àn regjistrât une lôr cjançon sul cambiament climatic, e il prin premi al è lât a un biel video di animazion fat di fruts di Claut. Lis rispuestis a son rivadis dispès plui dai paîs piçui che no dai centris plui grancj, forsit parcè che il cambiament de clime al è sintût di plui in mont. Une altre dimostrazion che al è impuartant rivâ a vivi i efiets par podê
dopo agjî. E je la suste che ti sburte a agjî».
Chê altre domande che il grup di lavôr si jere fat sul imprin dal progjet e jere cemût mai che al è cussì dificil convinci i guviers a une azion cuintri dai cambiaments climatics. «Parcè che e compuarte un cambiament une vore grant e i politics a son usâts a resonâ su scjalis temporâls une vore curtis. Ma su scjalis temporâls curtis une azion fate pe lote cuintri dai cambiaments climatics e pe riduzion de emission di CO2 no à un efiet concret e visibil. Ma al è ancje vêr (al è il gno pinsîr, no dal progjet) che in Italie o scontìn ancje un probleme culturâl, parcè che, se ciertis misuris no pain subit in tiermins di riduzion des emissions, a podaressin paiâ a nivel di miorament de cualitât de vite. Jo o soi stade a Copenhagen a ricevi il premi, e a Copenhagen a son stadis fatis politichis claris e decisis par gjavâ lis machinis dal centri storic. Li la cualitât de vite e je une vore alte. Dacuardi che o vin di rinunziâ a alc, ma nol è dit che lis rinunziis a diminuissin la nestre cualitât di vite».
De conclusion dal progjet te Vierte dal 2018 a son sucedûts Greta Thunberg e il Skolstrejk för klimatet, e tal zîr di un an il moviment di Greta, Fridays for Future, al à cjapât pît dapardut e ancje in Friûl. Tal stes timp la opinion publiche si è dividude une vore sul teme dal cambiament climatic e su la figure di Greta, dispès ogjet di critichis e ridicul sui gjornâi conservadôrs e sui social media. «O pensi che al sedi util dut ce che al pues creâ atenzion su chest argoment, che par me al è pardabon chel che al decidarà il futûr no dome de Tiere, ma de nestre societât. Al è il mont che o sin usâts a viodi che al vignarà netât vie. Cemût mai Greta tirie la agressivitât di tante int? Parcè che a son fuarcis une vore conservadoris che no vuelin il cambiament, parcè che la lote al cambiament climatic e tocje pardabon tancj setôrs de societât e economie. Dopo ce che al sburte i haters sui social no sai. O zonti: dispès i gjornâi a ripuartin la interviste di un sienziât che al fevele di cambiament climatic e dongje un altri che al dîs che no je vere, che e je dute une bale. Ma meti tal stes plan la opinion dal 99% dai sienziâts cul 1% e je dâ une informazion scorete».
La conclusion ae fin dal progjet? «Forsit che al sarès impuartant lâ indevant a fâ ativitâts cussì, parcè che devant di un probleme enorme come il cambiament climatic bisugne no sintîsi di bessôi, ma pensâ di podê agjî in maniere coletive, ducj insiemi». ❚
Stefania Garlatti-Costa