I tocje al tiessût sociâl, economic e culturâl des ex Provinciis di Gurize, Pordenon e Udin, prime ancjemò che ae politiche, di promovi progjetualitâts strate-gjichis che a tignedin adun il Friûl e che, su lis gjambis de int, lu puartedin a un avignî di disvilup e no di margjinalitât. Elio De Anna, za assessôr regjonâl ae Culture e tant che president de Provincie di Pordenon, “inventôr” adun cul so avuâl di grât di Udin, Marzio Strassoldo, dal progjet di Assemblee des Provinciis Furlanis, nol plate la sô iritazion tai confronts dal clime di cjampanilisim e di suspiet che in dì di vuê al somee dividi i teritoris di ca e di là dal Tiliment. Un clime che al riscje di jessi un grant regâl a Triest e un dam sedi par Udin che par Pordenon. Pal ex president provinciâl no si pues sghindâ une riforme istituzionâl. «Il teritori di Pordenon al è stât chel plui “spadât” de vicende des Uti – al sclarìs De Anna -, e il verp sielzût al è volût e significatîf. Cualchidun al varès di cjapâsi la responsabilitât storiche e politiche dal disastri che al è sucedût e par vê sfantât un patrimoni uman e di professionalitât che al jere dât dai dipendents de ex Provincie di Pordenon. In dì di vuê, chest ultin al sarà il probleme plui grues par tornâ a meti impins un ent intermedi di aree largje tra Regjon e Comuns».
__
Duncje no ise nissune alternative se no chê di tornâ indaûr al passât?
«Mi soi domandât a lunc cui e cemût che al podarès meti adun i teritoris di ca e di là dal Tiliment e no ai cjatade rispueste. Fintremai la Universitât no i salte fûr, figurìnsi la Cjamare di Cumierç o lis Fieris. Metìn dongje la complicazion che la citât di Pordenon no je mai stade ricognossude tant che pont di riferiment dal teritori dulintor, che invezit al à cjatât inte Provincie di Pordenon une cjase condividude in sens storic».
__
Ma intal ambit de riforme che la Zonte Fedriga e varà di adotâ, nol saressial il câs di dâi un ricognossiment istituzionâl al Friûl unît, intindût tant che ex Provinciis di Gurize, Pordenon e Udin? No lu domandin dome la storie e la culture, ma ancje la atualitât economiche e sociâl. Lis statistichis a piturin cun clarece lis dificoltâts di chest teritori a proietâsi intal avignî e a frontâ la crisi di vuê….
«La rispueste e je une vore semplice. E covente une progjetualitât comune che e cjamini su lis gjambis de int. No mi plâs dismovi il passât, ma cun Marzi Strassolt, president de Provincie di Udin, e Elio De Anna, president di chê di Pordenon, o vevin ideât la Assemblee des Provinciis furlanis. O vevin inviât in Regjon nuie mancul che 5 progjetualitâts gnovis e condividudis, a tacâ de viabilitât, ma ancje su altris temis, domandant une deleghe aministrative par metilis in pîts in timps svelts e par gjestîlis cemût che al domandave il teritori. Cul conservâ la identitât dal teritori, che al è fondamentâl, si pues realizâ la idee di rivâ a une colaborazion che e unissi il Friûl su lis robis di fâ e no viôt parcè che la Regjon e varès di dî di no. Ancje parcè che se a tornin lis Provinciis come ents di aree largje pe gjestion dai servizis associâts di ducj i Comuns, chestis no puedin vê une conotazion e une nature politiche fuartis, che a slontanaressin par fuarce cualchi aministrazion tal colaborâ. Duncje, se o fevelìn di capacitât di elaborazion strategjiche di progjets pal teritori, bisugne creâ alc di diferent e di gnûf».
__
Lis premessis par un dialic però no son cussì incoragjantis. Intai ultins mês o vin viodût a nassi polemichis di vecjo stîl cjampanilistic tra Udin e Pordenon e ancje schemis di aleancis teritoriâls tra Pordenon e Triest par taiâ fûr Udin….
«L’atrat dal cjampanilisim al nas des pôris de int che si spieglin inte politiche. Di chi al nas il suspiet di sentâsi ducj ator di une taule par resonâ, fedêi al sproc “nissune gnove, buine gnove”. Ma il mont al va indenant e cui che nol cambie nol è fedêl a une identitât, al è dome fer intant che chei altris a corin. Al è clâr che si à di cori cualchi risi par sentâsi e confrontâsi. Par chest motîf, pe Zonte Fedriga no si pues dome fâ un remake che al puarti al amarcord e no si pues acetâ la pôre di pensâ in grant, parcè che lis economiis di scjale a permetin di fâ oparis fondamentâls a vantaç di ducj e di fâlu cence straçâ risorsis e teritori. Su chest cantin il teritori furlan, cul pensâ e progjetâ in maniere unitarie, al pues dâ un grant contribût al avignî dal Friûl-Vignesie Julie».
__
Chest al è impuartant ancje tai confronts dal ativisim triestin….
«Il rûl dal puart di Triest al è destinât a cressi e a slargjâsi cu lis sôs esigjencis sul teritori. I tocje a chest ultin di dî ce che si spiete in cambi, no dîs in tiermins di compensazion, ma tant che pussibilitât di disvilup. Se invezit ducj i centris di elaborazion strategjiche a saran influençâts dal cjâf lûc regjonâl, alore il Friûl al deventarà simpri plui passîf. Ma la colpe no sarà di Triest, ma dai furlans stes, paralizâts de pôre di tocjâ ecuilibris vecjos e consumâts e dal lôr caratar barufant». ❚
Roberto Pensa
