Mostre fotografiche su 20 gleseutis
de Basse Furlane e de Istrie
A son fers alì di centenârs di agns, a cjalâ cidins e cence bati cei. Cualchidun di lôr al puarte intor il pulvin dai secui, cualchidun si à lassât fruiâ dal timp e de trascurance, cualchidun altri, invezit, al mostre inmò cun braùre dute la sô vivarositât. O fevelìn dai frescs che si puedin cjatâ a miârs tai mûrs des nestris glesiis: un tesaur di tecnichis e di colôrs sparniçât ator par dut il Friûl, cjalât tantis voltis cun indiference, cence viodi dal nâs a la bocje, come che si fâs cu lis robis di pôc, o che si à simpri vût sot dai voi.
Par chei che a àn gust di pierdisi ta chel univiers di storiis pituradis, dut câs, nol è simpri facil di cjatâ la maniere par jentrâ a dâ un cuc, stant che tantis di chestis struturis a son cuasi simpri sieradis e rivâ a fâsi vierzi la puarte al pues deventâ pardabon une imprese. Al è propite cul intindiment di dâi la pussibilitât di cognossi cualchidune di chestis ricjecis platadis che la associazion Ad Undecimum di S. Zorç di Noiâr e à realizât la mostre fotografiche “Affreschi senza confini”, indulà che a vegnin presentadis pituris realizadis jenfri Cuatricent e Cinccent in 10 gleseutis de Basse Furlane e, cun di plui, ancje in 10 realtâts de regjon istriane, di mût di mostrâ la continuitât e lis afinitâts di stîl dentri di doi teritoris che in chei agns a dipendevin dal Patriarcjât di Aquilee.
Jenfri i ciclis di frescs no si cjatin dome riclams al Vieri e al Gnûf Testament (une vore interessantis lis rapresentazions dal Judizi Universâl di Grîs di Bicinins e a Strassolt o ben chel di Visinade), ma ancje esemplis une vore origjinâi di comistion cul element profan (fra dutis, la danze macabre di Vermo/Beram): nol è un câs che tantis di chestis pituris nus sedin rivadis in stât di conservazion cuasi perfet, dal moment che a jerin stadis taponadis cu la cjalcine, par vie dai sogjets fintremai ofensîfs pe religjon.
Il progjet al è stât metût in pîts in gracie de colaborazion jenfri Regjon Friûl-Vignesie Julie, Comun di S. Zorç di Noiâr (dentri dal progjet Aqua/Aquae finanziât de Regjon), Sorintendence ai Bens culturâls di Triest, Regjon Istriane, Cjase dai frescs di Draguc´, Museu storic e navâl de Istrie. La mostre e je stade screade ai 25 di Avost e si podarà visitâle fin ai 28 di Setembar, li dal Antiquarium di Vile Dora, tai oraris di viertidure de biblioteche (di martars a vinars des 10 a buinore a un bot e des 2 e mieze dopomisdì aes 7 di sere; lunis dome dopomisdì e sabide a buinore) o dulinvie dai apontaments dal calendari culturâl estîf. Il progjet dut câs al larà indenant cu la realizazion di un catalic multilengâl e cul aprofondiment dai studis di altris frescs (il fotograf Gianfranco Abrami, che al à colaborât ae mostre, al à un archivi di 2600 gleseutis istrianis e dalmatis metût adun in plui di 20 agns). ❚
Serena Fogolini