Dai agns Setante a vuê,
la lenghe e continue a atrai i autôrs
Resonant su la storie de musiche furlane, in particolâr sul presint e sul futûr di cheste art, sedi dal pont di viste dai autôrs, sedi daûr lis composizions fatis in lenghe furlane, duncje in forme almancul vocâl, o miôr vocâl e strumentâl, sedi ancje par musichis cun chestis carateristichis e realizadis di bande di artiscj forescj, la cuistion si fâs no pôc articolade, di no facil interpretazion, ma a ogni mût une vore interessante.
La sene musicâl furlane di vuê no je dal sigûr chê di îr, dipent trop indaûr che si vûl lâ inte storie. Ma cence lâ masse lontan, il teme che achì nus interesse prin di dut al è chel des gnovis formis de musiche furlane che, plui o mancul a tacâ de fin dai agns Setante, e à cjapât une dimension divierse rispiet a ce che al jere prime. Tra i scrits plui interessants su chest teme atuâl, al va nomenât cence fale il saç di Roberto Dapit e Marco Stolfo, jessût pal Gjornâl Furlan des Siencis de anade 2012-‘13 e dal titul “Visions di scoltâ. Ideis di furlan e di Friûl te produzion musicâl contemporanie”, che si pues ancje cjatâ in rêt e che o consei di lei.
E je une analisi in struc, ma ben pontade, a rivuart des senis musicâls in Friûl dai agns Setante fin plui o mancul ae prime decade dal Doi mil, interessadis a pandi prin di ogni robe la lenghe e la culture furlane tai cambiaments dai guscj, des modis, des formis musicâls e des intenzions di autôrs e interpretis. Se al esist un model di cjançon verticâl de musiche furlane, secont lis peraulis cjapadis di Stefano Montello dal Mitili FLK, band tra lis protagonistis de gnove musiche furlane tai agns Novante, par un tiermin, “verticâl”, che si riferìs in gjenar e in struc ae “vecje vuardie”, a partî dai Setante la prospetive si è fate cetant plui «contemporanie, contaminade e in stât di doprâ la lenghe par ducj i argoments e in prospetive cun cualsisedi lengaç musicâl», come che al ripuarte il saç.
E sarès lungje e dure chê di fâ i nons di ducj i soliscj, grops e progjets, e cence volê jessi esaustîf, si nomene: il Canzonîr di Dael, Giorgio Ferigo e i Povolâr Ensemble, La Sedon Salvadie, Lino Straulino, i Mitili FLK, Furclap, ‘Zuf de Žur, Arbe Garbe, Bakan, Luigi Maieron, il tercet Stefano Andreutti, Guido Carrara e Giulio Venier, Loris Vescovo e tancj altris.
Une grande e fondamentâl operazion in chest sens e je stade chê de radio libare dai furlans, ven a stâi Radio Onde Furlane, che tal 1984 e à metût adun il Premi Friûl, une vetrine e insiemi un laboratori de gnove musiche furlane, lât indevant fin al 2013. La idee e jere chê, come che a scrivin Dapit e Stolfo, di «promovi la lenghe furlane e la creativitât in lenghe furlane in diviers cjamps, de grafiche ai radiodramis, de fotografie ae musiche, che in cheste suaze (la musiche, ndr) e devente il setôr che al ven batût cun plui costance e cun plui sodisfazion, ancje daûr dal numar, de varietât e de cualitât des propuestis». Cumò, al so puest e cun prospetivis diviersis, ma no masse, al è il festival di nivel european Suns, nassût in Friûl tal 2009, che al promôf cetantis lenghis minoritariis.
Resonâ cumò su la sene musicâl furlane dai ultins cinc agns, ae lûs di ce che al è stât tal rai almancul dai ultins cuarante agns, nus met inte cundizion di discuvierzi, se no altri in prime analisi, che la lenghe furlane no à pierdût il so atrat tai confronts di autôrs di peraulis e musichis, e come che al è simpri stât, si usin di solit o dispès, lis formis musicâls che a son plui in voghe tal moment, come veicul di espression artistiche, almancul di bande dai artiscj gnûfs e zovins che si presentin.
Dongje dai gjenars storics, come il folk, blues, il jazz e altris, di cualchi timp a sburtin e si sintin par furlan il rap, la dub, la trap. Al è comprensibil, e dispès si misclice il furlan cun altris lenghis dentri de stesse cjançon, come che al jere dal sigûr za stât fat e si fasarà ancjemò, par rindisi multilengâi, e forsit ancje cu la intenzion malscuindude di doprâ il furlan come une des manieris par vignî fûr intun marcjât simpri plui strent e dificil. L’impuartant al è continuâ a scrivi, cjantâ, creâ, pensâ par furlan intune dimension globâl. ❚
Alessio Screm
