Stant che no podìn fâ il ben in dut il mont, se o scombatìn pal ben, pal rispiet, pe dignitât, pe cressite sociâl, culturâl, spirituâl tal ambit de nestre realtât, o zovìn al ben dal mont. Se o scombatìn pe difese de minorance furlane e des minorancis locâls, o sin protagoniscj pe difese des minorancis tal mont.
A jessi masse mondiâi si riscje di jemplâsi la bocje e di mancjâ di concretece, di butâ fum tai vôi. Al dîs un proverbi arap: “Se tu tegnis net fûr di cjase tô, dut il mont al è net”. Peraulis santis!
pre Roman Michelot
Bisugne acetâ, duncje, un amôr e une volontât planetarie, ma concretementri bisugne operâ sul teritori, parcè che a son i limits struturâi. Jo o pues lâ a judâ i Nasa e parcè no vadio a judâ chei dal Burundi e parcè no vadio a judâ chei dal Nepal? Parcè che al è tant ce fâ, ma no rivi. Invezit i miei mi scuen di judâju, parcè che a fasin part, al è cuasi un dovê di stât. Li e je la diference, par esempli, tra Balducci e Milani. A part che a jerin doi grancj personaçs, doi profetis propit di calibri, a son robe super e… duncje di amirâ.
Milani al sint fin al spasim la concretece. Al diseve: «Jo o soi plevan di cuarantecuatri fruts, di cuarantecuatri animis e o ai di operâ culì». E cuant che une mestre i à dite che al vadi a fâ dutrine a chei fruts dal paîs dongje: «Al diavolo quei bambini lì», dissal. Se Diu al voleve che ur fasès dutrine jo, ju faseve nassi cent metris plui in ca e se no che ur fasi l’agnul custodi, jo o soi nassût chi, jo o ai di nudrî il gno popul.
Invezit facilmentri Balducci, che al jere simpri ator a predicjâ, al veve une altre vision. Al è impuartant ancje chel. Però jo o dîs tra i doi, ducj i doi grancj, jo o ai miôr Milani, come sensibilitât. Al vûl chel e chel, e vûl une dialetiche. Però al è plui naturâl lavorâ sul teritori e o disarès ancje plui onest lavorâ sul teritori là che o soi nassût, là che o ai di cressi, là che Diu mi à metût. Si pues pensâ e judâ il mont, cence cori ator pal mont operant pal teritori.
Vuê indi è zovins di buine volontât che a son fanatics pe flore, pe faune, ma no metin a cjase lôr nancje un strop di lidric, no tain nancje la jerbe fûr di cjase. Alore o dîs: «Voaltris che o sês tant verts scomençait a tignî un ninin di jerbe fûr di cjase; co o sês pal ordin e cuintri dut chest incuinament, scomençait à netâ la cragne fûr di cjase là che o rivais e là che o podês».
Scomencìn là che Diu nus à metûts e slargjìnsi plui che o podìn. Magari podê rivâ fin ae fin dal mont, però chi o ai di rivâ, culì che o soi, e o vîf . ❚
(7, al va indevant)
pre Antoni Beline