E dopo de jentrade uficiâl de lenghe mari intal Europass, ancje l’Invalsi le ricognòs
La cognossince ancje de lenghe furlane tant che arme moderne in plui par cjatâ lavôr e par pontâ ae assunzion: e je une oportunitât che cumò si pues vê compilant il curriculum vitae european gjestît de Direzion Istruzion e Culture de Union europeane midiant Europass. Chest sisteme, nassût intal 2012, al à uniformade la compilazion dai curricula par cui che al cîr lavôr o che al vûl promovi lis sôs competencis scolastichis e professionâls dentri de Union Europeane. Cumò, midiant de colaborazion che si è creade tra ARLeF (Agjenzie Regjonâl pe Lenghe Furlane) e Union Europeane, si podarà sielzi ancje il furlan fra lis lenghis cognossudis. Di fat, cumò tal sît di Europass – disfueant la liste che si vierç tal barcon “lenghe mari”, che e cjape dentri 29 lenghis – si pues selezionâ ancje il furlan.
«Chi in Friûl – al declare William Cisilino, diretôr de ARLeF – la cognossince de lenghe furlane sul puest di vore e pues fâ la diference, massime par meti a comut il client e par agjevolâ la comunicazion. Al vâl pal privât, pensant in particolâr al cumierç e ai esercizis publics, ma ancje pal public, come tal câs dai servizis ospedalîrs. Cun di plui, diviers studis de Universitât dal Friûl a àn dimostrât che l’ûs dal furlan in ciertis ativitâts comerciâls al cres il faturât des aziendis».
La azion de ARLeF si met intal progjet plui ampli dal Portfolio European des Lenghis (PEL), disvilupât dal Program di politiche linguistiche de Union europeane par sostignî il disvilup de autonomie dal student, dal plurilinguisim e de cussience e competence interculturâls, in plui che par permeti ai utents di regjistrâ lis lôr competencis linguistichis e la lôr esperience di aprendiment e di ûs des lenghis, su la fonde dal Cuadri European Comun di Riferiment pes lenghis.
E dopo de sô jentrade uficiâl intal Europass, la lenghe furlane e rive ancje intai cuistionaris des prossimis provis Invalsi (Istitût nazionâl pe valutazion dal sisteme educatîf di istruzion e di formazion). Al è chest il risultât de colaborazion, partide cualchi mês indaûr, fra la ARLeF e l’Ent che al valute i aspiets cualitatîfs dal sisteme scolastic talian. Di fat, intune des schermadis proponudis dal Invalsi intes prossimis rilevazions – che, daûr des classis di frecuence, a saran fatis ancje in Friûl-Vignesie Julie dai 2 di Març ai 23 di Mai dal 2020 – ae domande “A cjase, cuale lenghe fevelistu pe plui part dal timp?”, si podarà rispuindi ancje “Furlan”, sielzintlu dentri di une liste di une ventine di lenghis metudis par ordin alfabetic, colocât tra il francês e il grêc.
«Nissun locutôr furlanofon al à plui di cjatâsi in imbaraç devant dal cuesît leât al ûs de proprie lenghe – al aferme Cisilino -. La ARLeF e je impegnade ogni dì su chest, e il nestri sfuarç al è daûr a produsi i siei risultâts: prime cun Europass, cumò cul Invalsi, graciis ancje al supuart fondamentâl de diretore dal Ufici scolastic regjonâl, Patrizia Pavatti. Ma no si fermarìn chi: al covente che intai ambits principâi dulà che lis lenghis a son un element impuartant, al furlan i sedi garantide la stesse dignitât di chei altris idiomis, in plen spirt european».
«O vin contribuît in maniere rilevante cuntun tassel impuartant che al segne une presince uficiâl dal furlan intune dimension plui largje – e comente Patrizia Pavatti, dirigjente dal Ufici Scolastic Regjonâl – e che al rimarche la impuartance des lenghis minoritariis integradis intun contest plurilengâl che al caraterize la nestre regjon».
L’Invalsi al è l’Ent di ricercje cun personalitât juridiche di dirit public che al fâs verifichis periodichis e sistematichis intes scuelis dal Stât talian par verificâ competencis e abilitâts dai students, e ancje la cualitât complessive de ufierte formative des istituzions di istruzion e di chês di istruzion e formazion professionâl, ancje intal contest dal aprendiment permanent. Chest istitût al studie lis causis dal faliment e de dispersion scolastiche, cun riferiment al contest sociâl e aes tipologjiis de ufierte formative; al gjestìs il Sisteme Nazionâl di Valutazion (SNV) e al è sot de vigjilance dal Ministeri de istruzion publiche. ❚
par cure de redazion
