Al covente un plan straordenari e penç di invistiments bon di inviâ cambiaments significatîfs sui plans dal lavôr, ambientâl e politic-istituzionâl
Il libri “Una grande spinta” di Sandro Fabbro, Elisabetta Paviotti e Domenico Tranquilli al met a fûc l’impat distrutîf di dîs agns di crisi intal teritori furlan e al cîr di mostrâ une vie pussibile di jessude. In Friûl in dì di vuê al è mancul benstâ, mancul lavôr, mancul zoventût e, duncje, mancul sperance intal avignî, rispiet a dîs agns indaûr. La propueste dal libri – publicât di Forum, par “Cantiere Friuli”, il laboratori di ideis e progjets pal Friûl nassût dentri de Universitât dal Friûl – e je une grande sburtade sociâl, economiche e politiche, e di impegn fuart ancje morâl, «par superâ une fase negative che, se e les indevant, e metarès in pericul seri la sorevivence stesse di dute la comunitât furlane», al sclarìs Sandro Fabbro, professôr di Urbanistiche e Planificazion teritoriâl ae Universitât dal Friûl.
__
Teritoris “in contrazion” – tant che il Friûl vuê -, no son une raritât. A son centenârs intal mont (ancje in Cine) e a son stimâts dai analiscj tant che chê altre muse, chê “che e piert”, di trente agns di globalizazion fuarte. Professôr Fabbro, sono il “presit” che si à di paiâ ae “competitivitât”?
«Tancj le pensin cussì, ma bisugne reagjî parcè che, cemût che al dîs D. Harvey, gjeograf e politolic innomenât di Cambridge, “fâ sù e tornâ a fâ sù di gnûf i propris contescj di vite al è un dai dirits umans principâi, ancje se al è tra chei plui lassâts in bande”. Lis politichis “anti-contrazion” a son duncje justis e necessariis. Cuant che a son (soredut in Europe, intai Stâts Unîts, in Australie) a pontin a une “rigjenerazion socioeconomiche e teritoriâl” dal bas. Dut câs, a domandin politichis fuartis e straordenariis, di scjale urbane e regjonâl».
__
Cuale ise la situazion in Friûl?
«Dopo dîs agns di crisi, dute la aree regjonâl e à pierdût, in tiermins di produzion di redit (Valôr Zontât), plui de medie taliane (-8,5% cuintri il -5,7%), ma dome la provincie di Udin e à pierdût trê voltis tant la medie taliane (-16% cuintri il -5,7%), li che invezit la provincie di Triest e je cressude dal 2,3% a testemoneance dal moment bon che e je daûr a vivi la aree triestine in graciis dal puart internazionâl e dal turisim. La crisi, duncje, no cjape dute la regjon e no pues jessi nancje spiegade tant che une presumude competitivitât scjarse dal sisteme des fabrichis furlanis, ma, pitost, tant che crisi dal marcjât e de domande interne (mancul redit, mancul consums, mancul invistiments slargjâts) intes provinciis furlanis de regjon e, in particolâr, in chê di Udin».
__
Ma cemût isal sucedût? E parcè no ise stade une reazion politiche e economiche adeguade?
«Come prime robe, al è facil che al sedi par vie che la societât furlane no à mandât i segnâi juscj. La Universitât, par esempli, che i tocje il compit di anticipâ i problemis, e à scomençât a fâlu dome di pôc cul program “Cantiere Friuli”. Lis vôs, duncje, ancje cuant che a son stadis, no àn produsût un rivoc avonde fuart. Un Friûl cence vôs, dividût, cence istituzions che lu rapresentassin, nol à savût capî la situazion, duncje, cui struments che al veve a sô disposizion, e nol à rivât a reagjî in maniere direte o a pretindi di altris une reazion adate. La Regjon, di bande sô, e varès podût reagjî cun plans di invistiment anticiclics, ma, ancje par vie dai pats finanziaris fats cul Stât (pal risanament dal belanç talian), e à impuarît il so belanç e ridusude la sô capacitât di invistiment. Cun di plui, simpri la Regjon, cence vê un teritori omogjeni par chel che al inten lis struturis e la economie, e somee vê vuardât plui ai siei ponts di fuarce (vuê concentrâts pal plui inte aree di Triest) che a chei di debilece (difondûts dispès intal rest dal teritori regjonâl)».
__
Devant di cheste situazion, la rispueste che il libri al propon e je chê di ativâ daurman “une grande sburtade”, intal teritori furlan e pal teritori furlan.
«Sì, une grande sburtade che si fonde, prin di dut, suntun plan straordenari e penç di invistiments, bon di inviâ cambiaments significatîfs sul plan dal lavôr, ma ancje su chel ambientâl e politic-istituzionâl. Prime di dut, però, bisugne volê reagjî! E chest al è il sens morâl de “grande sburtade”».
__
Ce fâ?
«Bisugne domandâi ae Regjon di tornâ a fâ politichis regjonâls di grant respîr. In cheste prospetive a son trê lis strategjiis principâls e i struments relatîfs, che za la Zonte regjonâl di cumò e podarès scomençâ a indreçâ: un plan straordenari di invistiments anticiclics, tacant de ricualificazion energjetiche dai edificis vecjos. Plui di metât dai edificis, par no fevelâ des infrastruturis, a àn plui di 50 agns: a son duncje sorpassâts dal pont di viste energjetic (cjalts di Istât e che a consumin energjie di Invier), struturâl (vulnerabii al pericul sismic) e ambientâl. Lis perifariis des citâts a àn pierdût cualitât abitative; i centris minôrs a pierdin abitants; i centris turistics a àn pierdût atrat; i spazis publics, pensâts desenis di agns indaûr, no son in grât di frontâ i pericui peâts ai cambiaments climatics. Un grant program par “rigjenerâ il teritori” al pues dâ lavôr par gjenerazions e anticipâ chei cambiaments economics e ambientâi che a van sot dal non di “tierce rivoluzion industriâl”! Chest, però, al impliche une vision, une planificazion e invistiments publics par inviâ un marcjât gnûf. L’ordin di grandece complessîf dal intervent proponût al varès di jessi di almancul 5 miliarts di euros e un cuart di cheste cifre di jeve finanziarie regjonâl (almancul 200 milions di euros ad an par almancul sîs o siet agns) e il rest di sparagns des fameis e ancje de jeve dai bonus fiscâi statâi».
__
La seconde strategjie?
«Intal stes timp bisugne meti in vore une filiere produtive gnove, che e sedi buine di produsi bens privâts e publics gnûfs, creant miârs di gnûfs puescj di vore. La filiere des “costruzions, ambient e teritori” e je chê plui gruesse, e à il moltiplicadôr economic plui alt (parcè che ramificade in desenis e desenis di setôrs industriâi e terziaris), i efiets ocupazionâi plui grancj, la capacitât – une volte ristruturade e tornade a indreçâ viers des ricualificazions -, di produsi bens gnûfs cuntun rilêf sociâl (rigjenerazion slargjade in cundizions di sigurece e atrat di dut il teritori) e ambientâl (sparagn di teren e riduzion consistente des emissions di CO2) une vore alts».
__
Cualchidun al disarà che a son invistiments masse tradizionâi rispiet, par esempli, ae ricercje tecnologjiche e ae rivoluzion digjitâl 4.0…
«Nol è cussì. Cheste filiere, di fat, e cree e no distrûç puescj di vore (ancje se e cjape dentri components digjitâi impuartants e comparts une vore avanzâts tant che la implantistiche energjetiche; la domotiche; l'”internet des robis” par coneti e gjestî insiemi ducj i ponts dal gnûf sisteme insediatîf a bas consum energjetic e a alt contignût di “rinovabii”), ma, e garantìs soredut lavôr, cualitât e sigurece sul teritori, ancje par dutis chês altris ativitâts economichis».
__
Cuale ise la ultime strategjie di meti in vore?
«La riorganizazion istituzionâl dal teritori e je fondamentâl pe “rigjenerazion teritoriâl” proponude culì. Ae Regjon i tocje di rapresentâ e guviernâ, intun contest talian e internazionâl simpri plui malsigûr, la sintesi complicade tra “mâr e tiere”, tra aree triestine e rest de regjon, o sedi lis ex provinciis di Gurize, Pordenon e Udin. Il libri al ricognòs e al valorize cheste situazion duâl de Regjon, ma al rileve ancje che, intant che in dì di vuê la aree triestine e je interessade di oportunitâts impuartantis, il rest de regjon al è, in plui che in crisi, ancje cence progjet e cence direzion. E se la Regjon e à di guviernâ la sintesi tra “mâr e tiere”, il pericul, vuê, al è che e sedi la realtât furlane, cence progjet e direzion, a restâ indaûr. E covente duncje une ricostruzion istituzionâl dal teritori regjonâl che al tignedi cont di chest dualisim e che di consecuence al siguredi, a ognidune des realtâts regjonâls principâls, i struments istituzionâi juscj par indreçâ – in maniere integrade e complementâr e intune regjon unide – il lôr avignî. Se i teritoris furlans a crodin e a vuelin une strategjie di rigjenerazion teritoriâl, a chescj ur van sigurâts i struments istituzionâi par guviernâ in maniere eficace chescj procès di lunc periodi».
__
Cuâi?
«L’inviament di un cicli economic gnûf e la costruzion di plui coesion teritoriâl in Friûl a reclamin une ricomposizion istituzionâl che no si pues plui rimandâ intal timp. Daûr dal Statût regjonâl in vore si pues fâ la Comunitât dal Friûl in complementaritât cu la “citât metropolitane” di Triest, adotant la denominazion di “Aree metropolitane-Comunitât dal Friûl”. Cheste prospetive e pues stâ sù dome se al è un grant trasferiment di funzions de Regjon ai teritoris, orientât ai principis dal federalisim, de sussidiarietât e de justece. Lis funzions a àn di jessi assegnadis a nivel di Comuns, se dal câs Provinciis (o altris ents teritoriâi) e ae “Aree metropolitane-Comunitât dal Friûl”, cussì la Comunitât dal Friûl no sarès un altri nivel aministratîf inutil, ma un valôr zontât a pet des competencis che a son o che a saran dadis ai Comuns e aes comunitâts teritoriâls esistentis o previodudis. Se la Comunitât dal Friûl e sarà un ent che, cence gjavâ podês a di chei altris ents locâi, al rivarà a federâ, cence egoisims e egjemonisims, i diviers teritoris dal Friûl par indreçâ lis lôr politichis e intervents in materiis decisivis di rilevance struturâl (che nissun altri ent al fâs), alore o crodìn che si podarà otignî il consens necessari e superâ ancje cualchidune des resistencis atavichis e plenis di prejudizis che a vegnin des zonis che ur è plui dificil di ricognossisi in cheste prospetive».
__
E la Universitât dal Friûl, in dut chest dissen, ce rûl puedie e aie di vê?
«No si pues che augurâ che la Universitât dal Friûl, universitât teritoriâl par ecelence, si meti di proposit ae vuide sientifiche e culturâl di chescj procès. E che “Cantiere Friuli” al sedi il so strument principâl».
__
Cemût si cumbinie cheste vuestre vision di disvilup dal Friûl cu la urgjence di une transizion viers de sostignibilitât, che e passe traviers di une vision di avignî diferente di chê de economie consumiste di cumò e traviers di elaborazion di modei gnûfs di disvilup, necessaris par provâ a rispuindi ae emergjence climatiche in at?
«Viodie, nô o fevelìn di un cicli gnûf di disvilup teritoriâl che si fonde, in primis, su la ricualificazion energjetiche di dut il sisteme abitatîf parcè che, intal riscjaldâ lis cjasis, i edificis a contribuissin aes emissions di CO2, pal 60%, cuintri il 10% dal trafic veicolâr e il 30% di ativitâts industriâls. Al è su la edilizie des ricualificazions energjetichis a tapêt che si à di pontâ, duncje, se si vûl rivâ a une riduzion drastiche dai consums dai combustibii fossii e des emissions relativis in atmosfere e al disvilup des rinovabilis leadis soredut al fotovoltaic. Rispiet ai traspuarts privâts e ae industrie, cun di plui, al è plui facil di intervignî a nivel locâl su la edilizie, parcè che lis competencis aministrativis e finanziariis a son in capite de Regjon in maniere plui direte. Cun di plui, suntun program simil, si incrose l’interès capilâr dai privâts a viodi rivalutâts i propris imobii. Po dopo, al è dibant dî che, se ae energjetiche o metìn dongje ancje la domotiche (e “l’internet des robis”) o nin viers di un ecosisteme teritoriâl integrât cun impat ambientâl cetant bas (se no ancje nul) e se dopo o promovìn plans urbanistics par tornâ a adatâ spazis publics e ricreâ, ancje midiant di demolizions, gnûfs spazis urbans vierts in mût di ridusi i impats dal calôr estîf o dai pericui di inagament, si metin pardabon lis fondis pe ristruturazion no dome di dut il sisteme abitatîf, ma ancje di chel dai traspuarts e di chel produtîf di dut il Friûl. Chest al è il nestri “green new deal” e a son agns che i lavorìn parsore!». ❚
Erika Adami
