Daspò di cuasi 60 agns di svoi (ativitât interote par un pâr di mês dome tal moment de indipendence slovene) si siere la storie cruziade de compagnie aerie di bandiere slovene Adria Airways (non cjapât sù intal 1986, e jere nassude intal 1961 cul non Adria Aviopromet), stant che ai 30 di Setembar e je stade presentade la istance di faliment e che duncje i è za stade gjavade la licence di svol.
Ae stesse maniere di Alitalia, ancje Adria, fin al 2016 di proprietât dal Stât sloven, e à vivût diviers periodis di crisi, soredut intai ultins 15 agns. Dopo variis ricapitalizazions – cuatri dome tra il 2007 e il 2011 -, la Slovenie e à decidût che la uniche strade e fos la privatizazion. Daspò dal tentatîf di vendite falît intal 2012, Adria Airways e je stade vendude intal 2016 al fonts todesc 4K Invest par dome cent mil euro. Al at de vendite il gnûf proprietari al à cressût il capitâl de compagnie di un milion di euros, intant che la Slovenie a ‘nd à zontâts altris 3,1. Dopo un prin an sierât in positîf cu la gnove gjestion – dome però in graciis de vendite dal bol -, lis dificoltâts si son corudis daûr une dopo chê altre, ancje par vie di decisions comerciâls che si son palesadis faladis. Par comedâ il belanç no son bastadis ni la vendite de flote aerie (doprant duncje avions in leasing) ni la concession a nauli a altris compagniis dai avions cun ecuipaç. La situazion e je sclopade inte ultime setemane di Setembar cuant che par vie dai debits e dai problemis di licuiditât a Adria a son stâts gjavâts tancj avions. La 4K Invest, che e à cirût un compagn strategjic cence cjatâlu, e sperave intun intervent di bande dal guvier sloven. La Slovenie, aben che interessade par motîfs strategjics a mantignî i colegaments aeris cul rest dal mont, e je stade daûr dal câs cun atenzion za de Vierte, ma no podeve dut câs concedi un aiût di Stât (daûr dal regolament de Union Europeane si pues concedilu dome une volte ogni 10 agns). Cun di plui il guvier, tignût cont de situazion finanziarie (si fevele in maniere uficiose di un debit di 90 milions di euros) al à decidût intai dîs passâts di no invistî o jentrâ in zûc in maniere direte par salvâ la compagnie, discontentant ancje lis spietis dai 558 dipendents.
L’esecutîf al è daûr a valutâ se istituî une compagnie statâl aerie gnove o se lassâ che i colegaments aeris tra la Slovenie e il rest dal mont a vignedin gjestîts di altris compagniis esistentis, magari finanziant chês ritignudis plui impuartantis. ❚
Tjaša Gruden
