Propite sot elezions, in Austrie al è saltât fûr un altri cantin interessant di discussion, che al riscje di deventâ une vore ferbint, ma che dut câs al cjate acuardi in cetantis parts politichis. Dut al è scomençât cu la propueste dall’ÖVP (il partît popolâr austriac di Sebastian Kurz, di tindince democristiane e conservadore) di dâ un indreçament juridic al smaltiment dai gjenars alimentârs di bande dai supermarcjâts. Tant a dî che chescj in avignî no varan plui di butâ intes scovacis i gjenars alimentârs se no son vuastâts e duncje ancjemò di podê mangjâ. Ae propueste i fasin cuintri dut câs in maniere ferbinte lis cjamaris di cumierç, che a pensaressin pluitost a un assum su base volontarie di bande dai supermarcjâts.
Al somee che in dì di vuê il setôr al buti vie 80.000 toneladis di prodots ogni an, intant che nome 12.000 a vignaressin slungjadis ae int che e à bisugne. Il guvier a pene elet al varès inalore di decidisi par une improibizion che e vali almancul pe grande distribuzion. Ducj i gjenars alimentârs frescs che a restin su lis scansiis dai supermarcjâts a varan di jessi metûts in man aes associazions di volontaris che a lavorin intal setôr sociâl cence fin di vuadagn e, in gjenar, di personis che a àn dibisugne.
Il ministri dal ambient Elisabeth Köstinger – cu la saponte dal president dal partît Sebastian Kurz – intune interviste e à vût dit che si sburtarà inmò di plui ce che bielzà si sta fasint e si cirarà di meti adun un plan di colaborazion cu lis cjamaris di cumierç, par capî cemût rivâ insom di cheste strassarie di gjenars alimentârs. Ducj i doi a contindin, cun di plui, che si varà di cjatâ a nivel european une soluzion che i fasi cuin-
tri ae pratiche dal cumierç online di distruzi dut ce che al ven tornât indaûr; propite in chest la Austrie e varès di scomençâ par prime, dant il bon esempli. Ce che al ven mandât indaûr, se nol è vuastât, al varès di jessi tornât a vendi o dât in man ai puars e, cence mancul, bisugne fâ in mût di distruzi o butâ vie il mancul pussibil.
Pai supermarcjâts bisugnarà pensâ a spindi alc par gnûfs magazens e frigorifars par meti i gjenars alimentârs che a son restâts e che no si puedin plui vendi.
Con di plui un doman no varan plui di jessi busis intes informazions: i rivendidôrs e i produtôrs a scugnaran fâ cognossi i dâts sul smaltiment dai refudums daûr di schemis di riferiment.
Daspò de improibizion di doprâ lis sportutis di plastiche, il guvier al intint di ridusi ancjemò i materiâi di doprâ e di butâ, e di judâ la produzion alimentâr regjonâl, pontant ancje a rindi clâr a ducj, midiant di etichetis, di indulà che a vegnin e cemût che a son stâts produsûts, ma cence masse burocrazie o masse sfuarçs. Dutun cui marcjadants si varès di inviâsi viers de ufierte ai consumadôrs soredut di cjar, lat fresc e derivâts nome di divignince austriache.
La prime reazion de categorie e je stade di riviel cuintri di gnovis gravecis pai marcjadants. Stant al lôr puartevôs, in Austrie al esistarès bielzà un model funzionant pe riduzion dei refudums alimentârs, che tantis impresis comerciâls si son zontadis biel a pueste e che al met adun plusôrs pussibilitâts par stratignî chescj refudums, ven a stâi la vendite a presit ridot di pan e parei de dì prime, la ufierte ridusude di gjenars che a van a mâl cuant che si svicine la ore di sierâ, o la vendite di pomis e verduris a presit ridusût tant che prodots di seconde sielte. A dut chest a van zontadis lis inovazions produtivis che a permetin di riciclâ i gjenars, doprant par esempli il pan vieri e i derivâts de farine par fâ la bire.
Stant a un rapuart dal Bundes-ministerium für Nachhaltigkeit und Tourismus (BMNT), i marcjadants che a van daûr di cheste iniziative a son simpri di plui e chest al puartarà a cetante riduzion dai refudums alimentârs: intun an 12.250 toneladis di gjenars inmò comestibii a son stâts dâts a organizazions sociâls, il dopli rispiet al an prime. Cun di plui, 10.000 toneladis che no si podevin consumâ a son stadis dopradis tant che mangjative par animâi o pe sô produzion. Propite su cheste fonde la categorie e refude che chescj principis, bielzà acetâts dai socis, a vegnin cumò metûts dentri di une suaze normative, che e larès a rionzi burocrazie e straçarie di fuarcis.
La consecuence de conferme al guvier intes ultimis elezions e sarà chê di lâ indevant a infogâ la discussion sul probleme. ❚
Barbara Cinausero
