I lavôrs a varan di rivâ dentri dai 30 di Dicembar
Viodût il sucès dai agns passâts (plui di sessante lavôrs rivâts tal 2018), i Comuns di Cjarlins, Gonârs, Muçane, Porpêt, Prissinins e San Zorç di Noiâr, midiant dal lôr sportel associât pe lenghe furlane, a bandissin di gnûf il concors leterari “Vôs de Basse”, cul patrocini de Societât Filologjiche Furlane e de Cooperative Informazione Friulana/ Radio Onde Furlane.
La idee di fonde e je chê di stiçâ la produzion scrite in lenghe furlane, ricuardant tal stes timp lis figuris che a àn insiorât il panorame culturâl de Basse Furlane, tant che pre Zaneto, Tita Marzuttini, Gina Marpillero, Luciano Morandini, Alviero Negro e Pierluigi Visintin.
Il concors al è dividût in trê sezions, dôs pai grancj (oparis di narative e poesie) e une dedicade ai students des scuelis secondariis di prin e secont grât. La partecipazion e je sore nuie e e je vierte a ducj chei che a àn voie di provâ a scrivi in lenghe furlane, che a sedin a stâ in Italie o pûr tal forest. I lavôrs a varan di rivâ, in buste sierade e marcade di un sproc e de scrite “Concors Vôs de Basse”, al ufici protocol dal Comun di San Zorç di Noiâr dentri des 5 e mieze daspò misdì di lunis ai 30 di Dicembar dal 2019. Une zurie di esperts e stazarà lis oparis e e nomenarà i vincidôrs di ogni sezion, che a ricevaran tant che premi un bon di spindi par comprâ libris.
Il bant dal concors e la schede di adesion si cjatiju in dutis lis bibliotechis dai Comuns organizadôrs e sui lôr sîts istituzionâi. Par informazions si pues clamâ il numar 0431/620281 o scrivi a sportel.furlan@bassefurlane.eu ❚
par cure de redazion