A son stâts 24 i musiciscj che a àn cjapât part al prin concors organistic internazionâl “Fondazione Friuli” che si è tignût a Setembar tal domo di Tresesin, une iniziative inmaneade de Academie Organistiche Udinese inte suaze dal XI Festival organistic internazionâl furlan “G.B. Candotti”.
La competizion musicâl, che e je sostignude de Fondazione Friuli, e à podût contâ su la presince di Olivier Latry, un dai organiscj plui impuartants e preseâts a nivel mondiâl e titulâr de Catedrâl di Notre Dame a Paris, che al à vuidade la jurie insiemi cui mestris Tomaz Sevšek (Slovenie) e Ruggero Livieri (Italie), cun segretari Alberto Pez e coordenament di Dino Del Ponte.
Ae fin de competizion, inte categorie C, e je stade Ilaria Centorrino, 19 agns di Messine, a cjapâ il prin premi, intant che pe categorie B il ricognossiment al è lât a Raimondo Mazzon, 18 agns, di Trevîs. Par chel che al inten i plui zovins de categorie A, la jurie e à fat buine la propueste di Gianpietro Benedetti di integrâ i premis dant cuatri borsis di studi ai concorints che a àn otignût i ponts plui alts e altris trê borsis di studi ai concorints plui zovins che a àn dât buine prove di se. Il plui zovin al è stât Tommaso Del Ponte di Muçane, che al veve dome 12 agns. I premis a son stâts consegnâts ae conclusion dal conciert che Olivier Latry al à tignût ae fin de competizion.
A jerin presints Gianpietro Benedetti, che al à donât la gnove tastiere dal orghin Zanin screade dal organist di Paris; il Rotary Club Patriarcato Udin, che al à ufiert i prins premis; il sindic di Tresesin Giorgio Baiutti; il cavalîr Francesco Zanin; il president de Fondazione Friuli Giuseppe Morandini. «O tignìn – al à dit Morandini – a contribuî ae incressite dai zovins e tal stes timp a valorizâ il patrimoni dai orghins dal teritori che al à bisugne soredut di sostegn par restaurâ i struments».
«O soi restât une vore colpît dal calôr e dal interès dal public furlan – al à dit Olivier Latry -, ma soredut dal nivel une vore alt dai zovins organiscj che a àn cjapât part al concors de Fondazione Friuli». ❚
Piero Cargnelutti