Condanis pesantis pai ativiscj e pai politics catalans arestâts dopo dal referendum pe autodeterminazion dal 1n di Otubar dal 2017. Dopo un procès di cuatri mês che al è stât une comedie, il Tribunâl Suprem di Madrid al à fate buine ae unanimitât la sô sentence, che e je stade dade fûr ai 14 di Otubar stâts. Za cualchi zornade prime de sô publicazion a vevin tacât a zirâ indiscrezions in cont dai siei contignûts, che po a àn cjatât conferme: si va dai tredis agns di reclusion pal leader di Esquerra Republicana de Catalunya, Oriol Junqueras, in chel moment vicepresident de Comunitât autonome di Catalogne, ai dodis previodûts pai siei coleghis di guvier autonomic Jordi Turull, Raül Romeva e Dolors Bassa, ai undis e mieç pe ex presidente dal Parlament catalan Carme Forcadell, ai dîs agns e mieç par chei altris assessôrs Josep Rull e Joaquim Forn e fintremai ai nûf pai doi imputâts che no vevin incarghis politichis e istituzionâls, Jordi Sànchez e Jordi Cuixart, presidents des dôs organizazions de societât civîl Assembleea Nacional Catalan e Omnium Cultural. Altris trê imputâts a son stâts condanâts a multis pesantis e ae inabilitazion dai uficis publics.
Lis imputazions «penzis» a son chês di «sedizion» e di «intac de casse». E je colade la acuse plui fuarte – «ribelion» – ma e je restade la impostazion che e veve marcât la conduzion dal procès. I leaders catalans a son stâts ritignûts colpevui di vê vuidât une «solevazion publiche e violente cun chê di savoltâ l’ordin», cundut che la uniche violence metude in cjamp intes zornadis dal referendum e intal periodi seguitîf e je stade chê des fuarcis di sigurece spagnolis.
A son imputazions pardabon discutibilis – ancje in cont dal «intac de casse» no risultaressin spesis diretis de bande dal guvier autonomic – ma la sentence e je cence apel, almancul a nivel statâl, intant che si podarà someti il judizi ae Cort europeane pai dirits dal om. La nature politiche di sentence, tant che «svindic» e «cjastì», e je stade marcade de bande dai imputâts intune letare publiche jessude in chê stesse zornade. Magari cussì no, nol è nuie di ce maraveâsi de bande di une cort di nomine politiche – governative a nivel statâl – e fintremai poiade di fat dal partît neofranchist Vox, che si veve presentât tant che «Acuse popolâr» (ven a dî tant che Part Civîl). Tant par capîsi, al merete ricuardât che la plui part dai trentetrê imputâts processâts pal tentât golpe fassist dai 23 di Fevrâr dal 1981 – chel vuidât di Tejero – a jerin stâts condanâts cun penis inferiôrs a pet di chês rifiladis ai principâi leaders catalans.
Cun di plui la publicazion de sentence e je stade compagnade de riativazion de bande dal judiç Llarena dal ordin di cature european viers dal ex president catalan Carles Puigdemont, che al jere stât sospindût.
La societât catalane e à fat partî daurman la sô reazion cun marcjis moltitudinariis e no violentis in dutis lis citâts. Si à metude in vore une plateforme unitarie di mobilitazion che e je stade clamade Tsunami Democratic. Inte zornade dai 14 di Otubar a son stâts siopars spontanis, blocs stradâi, ocupazions des stazions, dai casei autostradâi e fintremai dal aeropuart di Barcelone, che al è stât paralizât e là che lis fuarcis dal ordin a àn doprât la man pesante. Al è stât clamât il Siopar gjenerâl pai 18 di Otubar e ancje il Football Club Barcelona al à dât fûr un comunicât di solidarietât cui presonîrs e di critiche cuintri de sentence: «la preson no je la soluzion». Iniziativis di proteste e di solidarietât a son stadis inmaneadis inaltrò tal Stât Spagnûl, in Europe e tal rest dal mont.
La clime e reste cjaldonone, tra iniziativis repressivis cuintri dai Comitâts di Difese de Republiche, inviadis ancjemò tal mês di Setembar, violence injustificade de bande des fuarcis dal ordin, reazions a pâr de bande di cualchi grup di chei che a protestin, une disinformazion pesante a nivel statâl e la campagne eletorâl pes gnovis elezions politichis spagnolis dai 10 di Novembar. ❚
Marco Stolfo
