Federico Faloppa,
“Brevi lezioni sul linguaggio”,
Bollati Boringhieri, Torino, 2019
Al è jessût che nol è tant un biel libri par talian che al fevele di lenghis e di lengaçs in maniere clare, profonde, sostanziose e semplice. Il so titul al è “Brevi lezioni sul linguaggio” e il so autôr al è Federico Faloppa, professôr di Storie de lenghe taliane e di Sociolinguistiche intal Dipartiment di Lenghis modernis de Universitât di Reading, tal Ream Unît, che za di agns al indrece i siei studis viers dal pluralisim linguistic e de costruzion linguistiche de diversitât e de alteritât, ancje cun riferiment ai stereotips etnics e ai prejudizis.
In pôc plui di dusinte pagjinis, cun cjapitui curts e siôrs, il libri al permet di fâ un viaç dentri di chê competence specifiche di ducj i umans che e je il lengaç, declinât in passe siet mil lenghis, che a son plui o mancul diferentis une di chê altre e che a àn elements di fonde in comun. Faloppa al met adun un vademecum che al jude cui che al lei a orientâsi e a capî, framieç des peraulis e dai concets clâf de linguistiche e jenfri dai segrets de comunicazion verbâl, cuntune atenzion specifiche pai ponts là che si incrosin ancje altris dissiplinis, de semantiche ae antropologjie e fintremai ae anatomie. ❚
Marco Stolfo